Saturday, September 23, 2006
posted by tasty_as_berry at 3:52 PM

مبارك عليكم الشهر .... وتقبل الله منا ومنكم صالح الاعمال إن شاء الله :)


 
Wednesday, September 06, 2006
posted by tasty_as_berry at 1:59 PM






هذا حال الرجال منذ الصغر وحتى الكبر في (الديوانيات) ...لا اعلم ماذا نسمى هذه الظاهرة هل هي إثبات ذات أو رجولة ... يقولون هو مزاح يفضله الرجال ويعرفون التعامل معه ولكنه في الواقع مزاح ثقيل غالبا ما ينقلب إلى غضب وشجار يضر الطرفين ....

اتعجب من طريقتهم بالتفكير ... فهذا هو محور حديثي اليوم ... فاصبح الرجال الآن في الدوانيات يحملون شعار البقاء للأفضل ...!!

=====
من جم يوم قريت موضوع بالجريدة عن إثنين اطفائيين أصدقاء .. واحد تقريبا في بداية العشرينات والآخر 45 سنة ... كانوا يتضاغطون وبو 45 سنة ثقل العيار .. صار زعل وبالآخر تعذر له وقال أنت مثل ولدي ..

لكن الأسف لم يشفي الغليل ... الشخص ذو العشرينات دخل ومعه مسدس ورما ه بطلقات مما أدى إلى وفاته وذلك أمام أصحابه...!!

( والله اعلم ما للموضوع من خفايا ربما هي اكبر من ذلك)

لكن هل من المعقول .... يكون هذا مستوى نقاش ..!!

وهالموضوع يتكرر ربما لا يؤدي للقتل .... لكن يسبب زعل كبير وممكن تشابك بالأيدي .... ويطلع من الديوانية وما يرجع لها ثاني ..

ليش عاد ... جذي !!

ويقعد الطرف اللي حسباله كينج نافخ ريشة وللأسف أصحابه يتلصقون فيه ...ظنا منهم بأنه الحريف ذو اللسان اللي محد يقدر عليه..

وغالبا ما ندخل ديوانية .. ونلقى لكل شخص تعلوقة أو لقب معين ... ممكن تسبب الحرج للشخص ونفسه .... وأحيانا الحمد الله والشكر مستانس ربعه يتطنزون عليه حسباله نك نيم

يعني يقعدون بالديوانية :

- فلان يا الأصلع ....
- طاعوا كرشته ...
- يمعود انت ريحة حلجك ...
- روح زين انت ويا بيتكم الفقر وأبوك البخيل ...
- ترى فلان سكانه مرته ....
- طالع من اتدق مرته شصير فيه ...
- وإلى آخره من الملاغة
..

متناسين أن هالأفعال ممكن تأثر وتضرعلى :

1- شخصيته
2- أسرته
3- تصرفاته
4- علاقته معاهم


مو كل شخص يرضى بهذا الشي .. ولا يتحمل ملاغة البعض ... لكن منو اللي يعرف يحسب حساب حق هالشي !!

في سالفة سمعتها من ريل اختي بالديوانية عندهم واحد دثوي هتلي اللي اهو ... يعني يبي يضغط واحد معاهم وهالشخص هذا من ذوي الاحتياجات الخاصة نوعا ما ومرته هجرته ..

فبدون سالفة جذي الهتلي يبي يضغط الشخص من ذوي الاحتياجات الخاصة .. ويقوله انت لو فيك خير ما هدتك مرتك ... بالذمة هاذي غشمرة!!

مو غريبة ولا اتعجب أن الناس تتهافت على مسرحيات هالوقت ... وتموت ضحك وممكن تحضر العرض مرتين او ثلاثة... خصوصا الشباب ليش لأن مسرحيات الحين ماكو هدف بس يعيب على هذا واضغط هذا وامسح الأرض بهذا وبس ..

!!والغريب أن هالأمر من الشباب لي الشياب .... يا ساتر ..

المشكلة بالموضوع ان اللي يضغط ممكن يكون عاهه من فوقه لي تحته وغالبا هاذي الأشكال اهي اللي تفرق النقص ... لكن ممكن اللي جدامه مو عارفله ومتوهق بالرد عليه ...

للأسف أن بعض رجال هذا الوقت ... يكون اهتمامهم منصب على هذه الأمور!!

مرات امشي بالشارع مثلا مثلا واحد تافه يعلق على رفيجه وإلا يتحرش ... فيقط تعليقه مثل ويها يعني يكون قاعد يضغط ...

جد جد تلوع جبدي ... اتذكر الكرة المدورة لما يقولون فيها ( طيبة قلبك .. وضحكة سنك ..وريحة دلاقك ) ... ( شوفي حواجبك جنهم خيوط لابجين ) ..!!

أحس صج صج سوالف ياهال ...

ترى أن يينه للضغاط ... ترى والله الرياييل ما يعرفون شي ...

والله لو تدخل بنت الديوانية .... تبجي اللي قاعدين وتطلع ..... :))

ترى البنات ضغاطهم يبجي ... يحبط ... يعقد ... يرسم على الويوه علامة تعجب .. وكل هذا احتمال بكلمة منها وتعبيرات من ويها

فيعني مع احترامي الرياييل لا يكشخون وايد :)


لكن ببساطة مو هذا اهتمام البنت ...

فاشرايكم بالموضوع بصراحة !؟