Friday, February 29, 2008
posted by tasty_as_berry at 10:24 PM

مغامرات أو بالأحرى فناتق عزيز


عزيز يبلغ من العمر 7 سنوات

(1)

دانة تساحل أخوها : اللي ما بيسمع كلمة أختو شو بنئلوا !!

رد عليها عزيز بخبث ودهاء :
مو شاطر مو شاطر

( يعني لا تساحليني ما راح اسويلج اللي تبين )

(2)

أم عزيز : تدرس دانة يالله درسي وكتبي وإلا تبين تصيرين طرارة وخمامة !!
تليقف عزيز وكارونا وكانت واقفة ( كارونا اهية السيلانية ):
ويكرر كلام أمه أي صح درسي تبين تصيرين خدامة تغسلين الحمامات..!!

طبعا أم عزيز قالت بقلبها هذا اللي بينطق

لما راحت كارونا

الأم خذت عزيز وقالتله : يا يما جم مرة قلتلك لا تقول خدامة عيب وحرام
اهية مسكينة فقيرة هادة بيتها وديرتها علشان تشتغل واتييب فلوس لا تقول عنها جذي

وبعدها بأيام

راح عزيز المصرقع ويطامر عند كارونا ويقولها : انتي خدامة فقيره ما عندج فلوس

أم عزيز حست كارونا فيها شي قالت لها : اشفيج !؟

كارونا : ماما عزيز ما ادري اشفيه علي يقولي جذي مع ان ما كان يقول !!

الأم : عزووووووز تعال

(وقالت حق كارونا روحي داخل)

تعال تعال آنا شنو قايلتلك ذاك اليوم
هااا !!

آنا مو قايلتلك لا تقول حق كارونا خدامة شكو رايح لها وقايلها فقيره هااا

عزيز : بطل حلجه قام يبجي

الأم : وأنت يعني ويا ويهك يكون غني رايح تقولها فقيره وانت عندك فلوس !!

رد عزيز بكبرياء : أي عندي

الأم : من وينلك !!

راح عزيز ياب بوكه : شوفي عندي ( ويطلع 200 فلس ) كااا

الأم : يعني هاذي اسكت فلوس الحين أن عدتها يا ويلك فاهم

(ومن بعدها عزيز توبة )

(3)

آنا أبوس ايد عزيز وأقوله :
عزيز هل تقبل الزواج منييييي ؟

عطاني نظرة استهزاء جان يقولي : شكو !!

آنا : ليش ؟ عادي ؟

عزيز : شنو أحنا قاعدين في باباي مغامرة !!

طبعا آنا انسدحت من الضحك

(4)

عزيز : يما شلون المرأة اتييب ياهل ؟

الأم : الياهل يطلع من بطنها

عزيز : أي بس شلون صار في بطنها ؟

الأم تبلع ريجها : تتزوج وبعدين تصير حامل وتييب ياهل

عزيز : أي بس شلون يعني تصير حامل ؟

الأم : شوف حبيبي المرأة والريال لما أثنين يحبون بعض

الأبو: ينغزها ومعصب ( انتي هييي شقاعده تقولين )

الأم : اشفيك أصبر !!

الأم ردت تكمل حق عزيز : لما أثنين يتزوجون ويحبون بعض ويعيشون بسعادة الله يعطيهم عيال

عزيز: يعني بس جذي الله يعطيهم عيال ؟

الأم : أي يعني يقعدون يدعون يا ربي يعطيني ياهل أبي ياهل وعلشان اهمة زينين مع بعض ويحبون بعض الله يعطيهم ياهل ..

عزيز بلم اشوي : وقال إييييييييييه

( مثل اللي يعني ما اقتنع بس ما يقدر يقول شي )

(5)

أم عزيز تتصل على البيت تطفر اعيالها وتغير صوتها

أخذ عزيز التلفون من دانة اخته

وقال انتي منو منو تبين ؟

جان تقوله امه : من معاي من حاظرتك ؟

جان يرد عزيز بكل وقار : انا عبدالعزيز من جنوب السرة

لووووووووووول

قلتلها يعني لاسكلي وإلا يعني مثل جنوب أفريقيا خخخخ

ويستمر المسلسل

 
Monday, February 18, 2008
posted by tasty_as_berry at 10:20 PM

السلام عليكم ورحمة الله وبركاته ،،،

ها أنا من جديد ... عاهدت نفسي أن اكون ذات روح معنوية عالية وإيجابية ...
وبما أنني بالآونة الأخيرة غلب علي الطابع المتشاؤم والسلبي ...
فقررت الإبتعاد قليلا ...

وفي فترة ابتعادي استطعت تخطي العديد من الأمور ..
والتي بها عالجت روحي وكياني .. وأيضا التقيت بأناس رائعين ..

فبحمد الله قد أديت مناسك العمرة والتي هي الأولى بالنسبة لي ..
فكان شعور رائع لا يوصف .. ولكم اود تكراره..

تحياتي لكل من :
lawyer
غريب
(أنتوا حاجة اوريجينال خالص )



وجكرا