Wednesday, January 12, 2005
posted by tasty_as_berry at 9:07 AM





السلام عليكم ،،،

موضوعي اللي راح اتكلم عنه هالمره اهوه ( الخطوبه ) يعني لما ايي الريال مع امه يخطبون البنت ، طبعا الخطبه
انواع :
*
اما عن طريق اهل :
يعني يصير حق البنت سواء من قريب من بعيد ، او أحد من الاهل او الاصدقاء مادحين البنت (طبعا ممكن اذا عندج اهل سنعين يبون لج الخير ، او اذا كانوا اهلكم وايد )
*
او عن طريق حب :
يعني البنت تعرف الولد ومتفقين على هالشي ( عاد انتي وحظج يا اهلج يجكونج وايي يخطبج يا يحس على دمه وايي بسرعه )
*
او عن طريق خطابه :
يعني اهل البنت يتفقون معاها تشوف ريال مناسب حق بنتهم او العكس اهل الريال يدورون حق ولدهم ، او انه الخطابه تكون ماخذه مواصفات البنت ورقمها من ناس وتشوفلها ريل ( طبعا في ناس يشتغلون بذمه ويبون يوفقون راسين بالحلال والبعض لاء ، بعد ما اتم الزيجه تاخذ مبلغ وقدره على حسب من المهر وفي البعض ما ياخذون وفي يكشتون فيها وما يعطونها ) طبعا في بعضهم بدعوا اللي تاخذ على كل الف اميه من المهر ، واللي تاخذ للبدو سعر والحظر سعر ، واللي لازم تملين استماره بالاول .
*
وفي طريقه حديثه اهيه عن طريق النت :
هاذي عاد شلون طريقتها ما ادري بس اهيه تعتبر عن طريق الحب لانهم ما ردهم بكلمون بعض وبشوفون بعض ( وصارت حق ناس )
-----
طبعا انتو كلكم عارفين انه بالكويت ماكو فتره خطوبه مثل اخوانه المصريين احنا يخطبج يشوفج وتشوفينه يسألج وتسألينه واذا في نصيب تحددون الملجه وجذي يعني فتره التعارف اهيه بالملجه ( يعني صرتي مرته على سنه الله ورسوله) واهني عاد يتم التعارف عن قريب للتصرفات والكلام والاطباع فتكتشفين ان شخص لا يمكن التأقلم معاه لان لا يوجد توافق كلش اهني طبعا يحقلج انج تفجين الملجه ، سواء كنتي بكر او لاء تعتبرين مطلقه ، واهني تكمن المشكله !!
نظرة المجتمع للمطلقه ، ليش البنت ما تقعد مع الريال وتعرفه ؟ ليش ما تسولف معاه اكثر ؟ ليش البنت تستعيل ؟
طبعا الوقت اختلف عن قبل الحين صار تفتح اكثر ،
وهذا اللي المفروض يصير ، ان البنت بعد ما تشوفه ويشوفها ويصير في تقبل للأثنين تبدي مرحله التعارف :
- يزورهم البيت تقعد معاه بحضور الاهل على صوب ياخذون
راحتهم بدون خلوه طبعا محد يرضاها لبنته ، بدون تدخل احد بالحديث ، بحيث يتكرر اللقاء ويسولفون اكثر ويشوفون بعض عدل وياخذون على بعض طبعا ما قصدت اييهم وايد يعني مرتين جذي .
-
او انهم يتفقون يتكلمون مع البعض بالتلفون ويعرفون بعض اكثر وياخذون على بعض ، كل واحد يسأل الثاني اللي يبي .
-
او ان الاهل الاثنين يتفقون يطلعون بره طلعه عائليه بحيث الاثنين يكونون تحت انظار بعض ( هذي نادره)
طبعا في ناس يرفضون هالفكره نهائيا بحكم عيب وما يسمح
( وهذا الشي يظلم البنت )
-----

طبعا الحين نتكلم عن عاهات الخطاطيب
، طبعا انا خابره اللي يبي يخطب لازم يكون عارف معلومات كفايه عن البنت وتكون بالمواصفات اللي يبيها ، لكن للأسف ماكو تقدير لمشاعر البنت ( كأنها سلعه ) يعني مثلا :
-
اييون ويخطبون ويستانسون عليها والريال يقعد يسولف معاها وحتى يدخل في تفاصيل
( اخر شي لا والله البنت صغيره عليه !!!!
يعني لو قايلين ماكو نصيب وايد ارحم ....…
-
اييون يخطبون ويدرون ان البنت طالبه ويدخل الولد يشوفها وجذي
( اخر شي لا والله ولدنا يبي موظفه !!!!
ييييييه شالسالفه !!!
-
والا اييون ويقعدون وكل شي ويتمقلوون ويطولون السالفه
( اخر شي لا والله بنتكم سمره وولدنا يبي بيضه والا العكس !!!
ولييييييه .... شنو البنت طرطنقيه ...
اوكي يعني لما يكونون مستحيين يقولون السبب ، لا يقولون شي بس ماكو نصيب وبس .

والمشكله والكارثه الكبرى .....………………

- لما يطلع جيكر ويبي حلوه .
- والا خال يبي بييييييضه .
- والا متين يبي رشيقه .
- والا ماكو شهاده وميح طموح يبي وحده مهندسه والا دكتوره .
- والا حافي منتف يبي وحده عندها فلوس .
- والا شكبره صك 38 والا 35 يبي من 21 لي 25
( عيل ام 30 و31 ما ادري منو ياخذها )
* يعني صراحه بدعوا لا وتقولين يلا متين ميخالف اسويله
رجيم اشوفه يمكن يعجبني ، ولما يشوفج يقول لا ما اعجبتني وانتي عنده ملكه جمال
( ادري بتنغثين ).
*
والا يدقون ويقولون شنو يعني شروط البنت والمواصفات اللي تبيها من الولد
( ويقولون والله البنت ما تبي شي الا يكون ريال مصلي مجابله ربه ...)
وايي الولد يقول شنو يعني شنو اصلي يعني انا كافر مو مسلم !!! أي شـــــــــــي
--->
احنا ما نصير نفس الهنود نروح نخطب احسن لنا ( بس اهمه اييبون المهر ) خخخخ

في رياييل فعلا يحاسبون على هالشغله يكون ذكي ومتفهم
لهالشي فيلمح حق البنت من البدايه يعني انه اختلفوا على شي معين بطريقه حلوه ( بحيث البنت تتوقع الرد)

وفي رياييل يحاولون يشوفون البنت من بعيد ، يعني بدال لا ايي لبيتهم وما تعجبه
( بدون لا البنت تدري طبعا)

طبعا ما انكر ان حتى البنات يتشرطون بعد وعلى اشياء تافهه يعني :
- لا ما ابي ساكن بالمنطقه الفلانيه ..... ما احب .
- ابي يحطلي دور كامل .
- ابي عرس وشهر عسل لا وتحدد المهر الفلاني
( والله عيب )
- حتى البنت بعد في تكون جيكره واييها حلو مو عاجبها وتتشرط .
- او انها تعلق الناس اول أي بعدين لا ما ابيه .

وبالنهايه اقول كل شي نصيب واللي كاتبلج بصير ، لكن دايما اقول احنا نسوي اللي علينا ونتوكل على الله بس ما نتواكل وفي فرق ( يعني مو نعتمد على شي واحنا ما طلبنه وسعينه اليه ) واتمنى التوفيج للجميع .