Monday, April 17, 2006
posted by tasty_as_berry at 3:08 PM


الثقة هي أروع صفة بالوجود ....وخاصة في ظل هذا الزمن الصعب الذي لا يمكن أن تضع مقياس ثابت لتصرف أي شخص ولا نملك سوى احتمالات ..

الثقة شي كبير بين البشر ... بدونه تذبل الحياة ..... لن تكون هناك علاقات بين البشر ... ولن نرى زواج ناجح .... ولن نرى مستشفيات يملئها الأطباء .. لا صداقة ولا محبة ... ولا صدق ولا أمانة .... ولا .. ولا... ولا ...


يـــــــــــــــا الله ... شيء كبير ...!! فلنحمد الله على هذه النعمة .....

جميل أن يثق بك شخص ما .... وجميل أيضا أن تثق بنفسك وبالناس من حولك ... تشكي لهم ويشكون لك ... تأتمنهم على أسرارك وهم يفعلون المثل .... تصارحهم بمشاعرك أيا كانت ..


جميل أن تجد من يسمعك ... يشاركك .. ممكن ينتقدك وممكن ينصحك وممكن أن يفرح لك ...

بمن يجب أن نثق ...!! ولمن يجب أن نرتاح ....!! ولماذا يقع الاختيار على شخص غير الآخر ....!!


هل هو التوقيت ..؟
أم إحساسنا الداخلي من ناحية الشخص ؟
أم طريقة الشخص نفسه بالاستماع ؟


ما أروع أن تستمع لماضي شخص أو مشكلته أو لسر ما أو فرحة وحب وحزن .. حيث معه تشعر بأنك أهل للثقة .. صعب أن يحصل عليها أي شخص في هذا الوقت ...


لماذا البعض يخون هذه الثقة ....!!

لـــــــــــــــماذا .... وأقولها بكل أسى ... والله أنه لشي يفطر القلب والعقل :(

لماذا بلحظة .... تتلاشى هذه الثقة ...!!


وبلحظة غضب وحقد ... يبدأ الشخص بقذف الكلام وقذف الاتهامات .... والتجريح .. ويقوم بذكر أمور لم يكن لها داعي ...!! وينسى كل لحظة سعادة وثقة وأمان كانت بالماضي .... وينسى كل أخطائه وزلاته وعيوبه ....

ويا ليت هذا يكون كافي بالنسبة له ... أن يكون تصرفه بابتزاز هذا الشخص بالكلام فقط...!!

بل يتعداهم هذا الأمر .... ويقوم بعدها بإفشاء هذه الأسرار والمصارحات وأي كانت حدود الثقة بينهم ... ليظهر مدى خبثه ومدى زيفه ....!!

ولماذا كل هذا ... ليكون هو صاحب الأخبار الخطيرة .... وحديث الساعة ...!!

هل هذه شهامة ... وشجاعة ....!!


هل يعتقد هذا الشخص انه فعلا ..... بطل بفعلته هذه .... هل أرضى ذاته ... وتشبع قلبه بالسواد بما فيه الكفاية ...!!

والمضحك أن وصف هذا الشخص .... بالمهـــــــزلة هو فعلا قليل بحقه ....فماذا عن " القمامة " !!... لا .. لا.. أيضا لا يوفي بحقه..


أعجبني أن أطلق عليه " الحشرة " ... لأنه يأكل أي شي وفي أي مكان .... ويتواجد في أماكن القاذورات ... ونهايته أما بحذاء أو صحيفة ..... وتتحاشاه الناس في كل وقت ومكان ..:)

فالشخص الذي يخون الثقة أي كانت أشكالها ..... فأقول له حسبي الله ونعم الوكيل ...
والدعاء لأهله ومن حوله .... بالصبر لابتلائهم به وحمايتهم من غدره ....


الضمير..الضمير.. الضمير ... فقليل من الضمير لا يضر ..!!
 
Tuesday, April 11, 2006
posted by tasty_as_berry at 9:12 PM


ربما يقرأ البعض هذا العنوان ويقول بسره ( يعني شنو بالضبط) ... على الرغم من تواجد الزوجين في بيت واحد يتقاسمان الأحزان والأفراح ويتشاركون حياتهم بكل معانيها ... وكل هذا لا يعني أن هناك حميمة بمعناها الصحيح ...!!

نعم للأسف .... اكتشفت أن الزوجان يحدان من هذه الحميمة .... وهذا ما يعاني منه الكثير بحياتهم الزوجية ....حيث :

- يفتقر إلى الرومانسية (يعرف شلون يسوي جو ويعبر عن مشاعر الحب )
- الكلمة الطيبة ( يثمن الكلام ويعرف يختار الكلام اللي يطيب الخاطر)
- الروح المرحة ( المواقف الحلوة لابد منها )
- الأمان والوله ( أن يشعر بالطمأنينة والراحة عند شريك حياته)


بهذا الموضوع قصدت الزوج والزوجة .... كلاهما مسؤولان عن هذا الشي ... وبنفس الوقت كلاهما لابد أن يتبادل هذا الشي ....


كنت دائما أتصور ورسمت في بالي فكرة معينة عن الحياة الزوجية .... وهي أن الزوج يكون لي بمثابة الزوج المسؤول والحبيب الرومانسي والأب الحنون والصديق المقرب ....

ولكن أصدم من هذا الواقع ... الزوجة أصبحت فقط كمسمى وأنها مسؤولية مزعجة وأم لأبنائي وآخذ منها حاجتي الجنسية .... لأنها سنة الحياة التي فرضت علينا ...!!


هل من المعقول يتزوج الشخص بعدما كبر ليشاركه الحياة شخص طوال عمره .... وهكذا تكون نظرته لهذا الزواج ..!!


وعندما أسمع بعض الزوجات يتكلمن عن حياتهم الزوجية ... (أتعجب وأستغرب) هل هكذا تكون حياة الأزواج ..!!

ربما حتى الآن لم تصل المعلومة ولم تفهم وجهة نظري .... لكم


ربما يكون هذا الموضوع جريء وقوي ..... لكن واقع لا يوجد به حرج ولابد أن يناقش ..!!

هذه بعض المواقف التي ممكن أن تبين أساس الموضوع ....

مجموعة من المتزوجات يتناقشون ويتحاورون


- أول ما تزوجت قعدت أبجي خايفة من ليلة الدخلة وانخشيت بالكبت ( طبعا هاذي انا للحين مو مصدقتها !! )

- أمبي أنا من صجج أبطل الليت مالج أمل ما أخليه يشوف ولا شي ( ولا حتى أباجورة )


- أمبي واي انا صارلي فوق السنتين وكنت اعرفه 7 سنين حب وعندي أثنين وللحين ما اقدر أمشي جدامه من غير ملابس أو حتى أبدلهم !! ( ما ادري صج ما ادري جذب )


- اتسبح معاه وإلا أخليه يدخل وانا موجوده ..... ماله أمل .... !! وإلا يسمع أصوات واهو بره !! واي امبي فشلة ( وهي صارلها فوق السنة)


- ريلي قالي قومي قطي هذا بالزبالة .... جان أقوله قطه أنت ما عندك ايد !! ( لو كافخته بالجوتي أحسن )


- أنا أسافر معاه جزيرة وبروحنا .. وإلا نروح شاليه ..!! قطيعة ضيقة خلق بس آنا وياه متجابلين ... لا ويع ما أبي .. كيفة بروح مع ربعه كيفه !! ( طيح الله حظج هذا ريلها كنز ومو عارفه قيمته )


- أنا ريلي كلا يبي يمسك ايدي بالسوق أقوله .... وخر شنو بضيع منك !! (يلعن أبو دفاشة)


- أنا من زمان ما لبست شي حق ريلي ... أحس عادي عنده وما يتكلم يقول لبسيلي !! ( لازم يتكلم يعني ولازم يفشلها تحب جذي )


طبعا هذه بعض المواقف ... أما الكلام في هذا الموضوع كبير ...


ليش المرأة أو الريال .... يحدون من علاقاتهم مع بعض ..... ليش يحطون حواجز ...... ليش يبعدون العلاقة أكثر ما يقربونها ....

ليش الشخص بحياة الزوجية ما يكلف روحه عناء السؤال .... أو حتى يفكر بالتغيير حتى يرضي الطرف الآخر !!


إذا كانت الإجابة بأن ( صـــــــــــــــعب)

إذن سأقول لكي أو لك بجدارة ( أنكم ضيعتوا حياتكم الزوجية ) بامتياز مع مرتبة الشرف ....

وبكل بساطة ذهب ليبحث عن هذا الشي عن طريق فتاة أخرى ...


ذيك الساعة سألي نفسج آنا شنو قصرت !! وراح تقعدين تفكرين يمكن طول عمرج .... وانتي ما عرفتي الإجابة ...

لأن في بساطة هالأمور ما اتيي على بالج ومو معطتها أهمية ....


اكيد وايد قالوا يا سلام .... وين الحيا وين الخجل .... على طول أشيل الكلافة وأبيعها...!!

لا بالعكس الحيا وانج تسوين روحج مسبها مطلوب ومطلوب بشدة بعد ....

وحتى الريال يتمنى الخجل منها .... وإذا المرأه ما تستحي ... الريال يكش منها ...

لكن هذا يكون ببداية مراحل الزواج الأولى ....و بعد سنة وبعد الانجاب ..

خلاص اتوقع طاحت الميانة وتعودوا على بعض....


في بنات يضحكوني ... تكلمني بالتلفون عادي لما يدش ريلها ... تعدل الصوت وتسويه رقيق ....!!


انزين وبعدين بتسوين روحج رقيقة وذربة طول عمرج ... وإلا بعدين خلاص يعني تطلعين على حقيقتج جدامه وانج طبيعية ....

ذيك الساعة بعرف انج كنتي تتصنعين !!


الامور اللي ذكرتها الريال يبيها .... الريال يبي يسمع يبي يشوف يبي يتمقل يبي المرأة تدلعه .... والله أن الريال صج صج طفل كبير ....


أنا أدري ان في رياييل جحوش ماكو فايدة فيهم ..... وفي حريم تيوس هم ما يبين بعينها ....


لكن زوجي وحلالي ..... ومرتي وكيفي ..... ليش أخلي شي بخاطره ...كله لا فشلة لا عيب ... لا ما يصير ....

من عذر يفضل رفيجتة ...!!

الرفيجة إذا كلمت متزوج ....!! بتقوله لا عيب وإلا ما يصير !!

لا طبعا ... وإلا جان ما لجأ لها ...


يا جماعة لحد يدقر الثاني .... ما ينفع كلا جد جد .... وحواجز ....لازم يكون فيه غشمرة ضحك فرفشة ....

لا تصيرون شياب وعيايز .....


نصيحة للمرأة :


الريال يبرمج مثل الكمبيوتر ..... بس أقدر أقول صعب تسوينله فورمات .... يعني إذا عودتيه على شغله من البداية .... خــــــــــــــــلاص راح يتعود عليها ...

بعدين تعلمي أن وناسة ريلج معاج أنتي مو مع ربعه ..... يعني ما قصدت تحرمينه من ربعه ....

لكن انتي بذكائج خلي وناسته معاج بحيث من يروح حق ربعه يمل ويبي يرجعلج ...

الريال يحب يشوفج أصغر من سنج .... تغشمري معاه .... تحرشي فيه .... أبتعدي عن امرأة التقليدية .... أو بالأحرى تشكلي بالشكل اللي يفضلج فيه ....

وتفنني بشكلج بحركاتج الريال لعبي بنظره ..... يحب يشوف ... يقولون الريال تتقربين له عن طريق عيونه ....


ونصيحتي للرياييل :


لا تهد مرتك على كيفها .... مو تحريض بس مو معقولة مرتك طالعة طول اليوم ما دقيت إلا آخر الليل تسألها متى توصل !!

مو عيشة هاذي ...

سمعها كلمة حلوة ... هلا عمري هلا حبيبتي ... هلا حياتي ....مو ترد (بألو حاف وإلا نعم بنفس خايسة ) .... وغالبا ما يقول مع السلامة يلا وساده بالوي (باي باي والا مع السلامة مو موجودة بقاموسة) ....

الريال المرأة تقدر تلعب بنظره .....

أما المرأة توصل لها عن طريق أذنها ..... يعني اشتغل كلام حلوو ... طبعا مو سوالف تمصلح .... لاء كلام من القلب ومعبر ..

سوالف عندج معاشج ومالي شغل فيج حيا الله أشتري أغراض البيت ... وين العشرة وين انت ريلها أبو البيت وين عزوتها ...!! وكل راعي مسؤول عن رعيته ...!!

يعني بالذمة وين كفو تعطيك حميمة ..!!

ترى شي عائد على شي ... وأفتح المجال حق مرتك ... إذا شفت شي حلو امدح .... شي عاجبك قولها تكرره .... شجعها لا تحبطها ...

وأترك المزاجية عنك ..... تحبها وتموت عليها وتاخذها غصب عن أهلك .... تالي بلحظه وتمل منها ... وتكتشف ان اهلك صح ... وتبدي اتطلع عيوبها ... واهي أحتمال انها زينة معاك بس منت عارف قدرها ...!!


ترى وايد ناس أزواجهم وزوجاتهم ..... من أروع ما يكون .... لكن بكل بساطة محد يبي يكلف ويعني روحة أو حتى ... يفكر ....

ويخسر هالشخص بتصرف بايخ ..... تالي يمكن يتحسف .... ويمكن ما يعي الغلط الكبير اللي سواه بحقها .... !!



بالتوفيج ،،،
 
Sunday, April 02, 2006
posted by tasty_as_berry at 12:34 PM


السلام عليكم ورحمة الله وبركاته ،،،،



تكلمت من قبل كيف تحافظين على زوجك ... وكان الموضوع موجه للزوجة ..

لكن هالمره راح أوجه الموضوع للرجل ( الزوج ) وكيف يحافظ على زوجته .. ويكون زوج سنع ....



الزواج مبني على الاثنين .... وبذل الجهد لابد يكون من الجهتين ... يعني حتى الريال لازم يتمسك في مرته ... ويحافظ عليها ...



لان ما اعتقد في شخص على وجه الأرض يرفض النعمه لما تييله بمعنى " ان اذا الشخص كان معاي زين ولا ضرني ولا قصر معاي بالعكس أعطيه عيوني " ...


طبعا في ناس ما يبين في عينهم شي .... بس الواحد يسوي اللي عليه ...


التعامل والاسلوب :


- يعني لما تسألك مرتك وتطلب منك شي ..... تعلم شلون ترد عدل !! ...... يعني خلك دايما مهتم " هلا حبيبتي .. آمري!" ... واذا كنت مشغول " كاني عمري يايلج بس اخلص اللي عندي "

(يعني تعلم تكون ذرب في التعامل ... لا تصير دفش ودثوي)


- خل أسلوبك راقي بالتعامل ... بين مرتك وأعيالك ... يعني الفاظ بذيئة كيفك تقولها بالدوانيه وانت تتحلطم بالسيارة ... لكن في بيتك لا تقولها ...


- أسلوب اللي كلا إنت ذكي واتعرف ومرتك غبية وما تفهم ... لا تنزل من قدرها .. بينلها وعلمها وفهمها بدال الطنازه والتعيب .!!


- خل السانك حلوو .... وكلا حجيك ينقط عسل .... بس مو على مصاخه ... يعني ابسط شي لما تناديك ..رد عليها " هلا حبيبتي !"


- لما تكون قاعد مع ناس .... لا تخالف مرتك الراي .. خلك في صفها دايما .. لانك لو حطيت روحك مكانها راح تتضايق انها تطلعك غلطان والا كلامك مو سليم جدام احد ..

- لما تعصب .. حاول تتحكم بروحك .. والتفاهم زين .. وعط حق مرتك مجال تتكلم " لا تتعود على الصراخ والتسفل" ..


- خلك مع مرتك كل شي ... وسولف معاها ... شنو صار معاك كل يوم ... تقدر تقولها همومك ... وتاخذ رايها بشي ...وحتى اذا كانت زعلانه لازم اتعرف اتواسيها مو تزيد الطين بله ..

- حلو انك تلاحظ أي تغيير صار بالبيت بالغرفه في مرتك .. وتبدي رايك بالاعجاب .. حتى لو مجامله بس لا تفشلها(حتى الاسلام سمح في ذلك ...)

- لا تصير جنك ياهل .. وأناني . وكلا انت التعبان والمريض المسكين .. ولحد يستخدم اغراضي ..!!



الاهتمام بالمظهر والنظافة :


- يعني انت ريال تروح الدوام تطلع تشتغل .. سواء بالصيف بالشتاء .. الجسم يحتاج سباحه وعطر .... واللي ما يدري في اختراع اسمه "ديودرنت" مزيل رائحة العرق ..


- ضروسك .. أسنانك .. حلجك .. بلــــــــــــيز فوق الزقاير والصفار والحالة الكسيفه .... هم ريحه نفاثه !!! رجاء الفرشه والمعجون صباحا ومساء ..


- حتى الريال يحتاج انه ينظف بعض الاماكن من الشعر ... مو يقول انا ريال عادي اصلا إغراء ....لازم يداري هالناحية...


- يعني يشوف شكله واللي مرته تحب يعني مثل ( لحية - قفل - بدون شوارب - ديرتي ) ... ويهتم في قصة شعره ونظافته .


- يعني بليز بليز ... قرض اظافرك ... شغل العقد اطول آخر ظفر ( ترى ويــــــــــع ) ... سواء إيد والا ريل ...


- وسوالف ساعة ذهبيه ( اصلا حرام الريال يلبس ذهب) ... وشغل خواتم وسلاسل ...سوالف الراب وخواتم المشعوذين ... (ما فيها حلا كلش ) .. وتروالي الاكسسوارات حق البنات .. يعني حدك الدبله بس ..


- يعني وانت قاعد بالبيت لا تصير شايب شغل مكسر لا وبدون اندر وير ( الله يفشلك) ....البس .. يعني شورتات .. بجامات سنعه .. تريننجســــوت ...



الصفات :


- الحنان ... خلك حنون كثر ما تقعد .... طول ما انت يمعها دفها بحنانك ..يعني وانتوا مثلا بالصاله قاعدين تطالعون التلفزيون ... قولها "حبيبتي تعالي قعدي يمي وحط ايدك على جتفها .."

أو مثلا : حط راسك في حظنها ... تدلع عليها .. بين انك تستانس معاها ... وتحب تتقرب منها .


- الحب ... اول ما اتيي لمها حيل .... قولها احبج ... ولهت عليج ... حتى لو تتصل عليها في وقت اهيه ما تتوقعة وتقولها " واي ولهت عليج "


- المرح والوناسه .... كلا جد بجد ما لاينفع وفيها ملل .... تغشمر معاها انخش عنها ... تعافر .. خرعها ... المهم تمرون بلحظات ما تنسونها ... حتى لو تلعبون ظلمه....


- الكرم .... اعوذ بالله من البخيل .... اذا ما صرفت الفلوس على بيتك واعيالك وين توديهم !!! ...

( شغل اشتري جراغي ...اقط فلوس على مخيم الربع... والا

اسافر ..) ... يا أخي قطهم على بيتك ابركلك ...


- الصراط المستقيم .... خلك ماشي سيده دام تبي مرتك تكون بالمثل .... تصونك صونها .. تحبك حبها ..( يعني لا تخربط وتكام بنات وتخونها ) ..... ترى اكره شي اللي عيونه زايغة .


- الشجاعه .... خلك ريال قول وفعل .. يعني لا تصير خيخه وما عندك كلمة ... مرتك تبيك وقت الشدايد وريال يسندها ويستر عليها .. لا تصير سكانه أمه .... والا كلمه اتييبك وتوديك .... وبعدين عيب تشوف زهيوي .. تقول حق مرتك انتي طقيه !!!


- السنع ... يعني سواء مع مرتك أو عيالك ... مع اهلك .. اهلها .. خلك ذرب سنع .. اتعرف تتصرف تكلم ...مو كلا روحي انتي بروحج .. روح معاها .. موكلا مالك خلق شي .!!


- الصراحه ... شغل لف ودوران والجذب اللي ما له داعي .. عـــــــــــــــيب .. عيب .. مرتك بتكون عارفتلك يعني بتجذب على منو .. وبعدين الجذب حبله قصير ما ردها بتطيح عليك.


- العدل .... لا تمشي الامور على كيفك .. حط نفسك بنفس الموقف .. واعترف بالغلط .. وتأسف بعد .. كل شي له حد ..


الحياة الاسريه :


- لازم تطلع مع مرتك او انت وعيالك كلكم مع بعض .... تتغدون والا تتعشون بره .. او تودي اعيالك ألعاب .. تتسوق مع مرتك .. وتعطيها رايك ..


- لازم تشتري أغراض الجمعية .. وتشتري احتياجات البيت .. هذا واجب عليك ..وتسأل دايما شنو يحتاجون ..


- حلو إنك تدخل بهديه او شي حلوو حق مرتك ... وحلو انك تفاجئها بأشياء لا يمكن تتوقعها ... أو بالدوام مثلا طرشلها ورد في مناسبة معينه " اصلا راح تطير من الفرح " ..


- حلو تلعب مع اعيالك ... تقضي وقت بالبيت .. لازم اتحس ان عندك اسره وانك زوج وأبو ..


- خل عندك طولت بال حق مشاكل العيال ... والبيت ... وحاول تحلها بدال التذمر ..


الحياة الرومانسية :


- هذا أهم جزء بالموضوع كله ... خلك رومانسي ... والرومانسيه فــــــــن ... لكن مو صعب ... الرومانسيه بالكلمه ... بالحركه ... اختيار الوقت المناسب .. الأستعداد النفسي ... حتى المكان ...


- ترى الحياة الزوجية وبالتحديد... وقت ممارسة الحب ... دائما اللوم على المرأه وانها بارده ولا تعرف تتصرف وتوفر الرضا الكامل للزوج !!.... المرأه بطبعها حياوية .. والرجل والمعروف دايما هو المتحكم وسيد الموقف ... لابد ان يزيل الخجل ويعرف كيف يتصرف ...



- المصارحة حلوه في هذه الأمور ... حتى يسعد الاثنان معا ويتحقق الرضا الكامل .... وهذا ليس عيب ..

العيب الحقيقي : لما يستمر هذا الوضع البارد والتذمر ... ويلجا بعدها الزوج او الزوجة للعلاقات المحرمة والخرابيط .


- لابد من توافر التهيئة النفسيه والمكانيه والزمنية ... يعني شغل يلا بسرعه وأي شي .. ما ينفع .. لابد يكون في تقدير لوضع الزوجة وهل اهيه في صحة تساعد .


- إذا مرتك ما تلبسلك كلمها قولها فهمها قولها أحب جذي تسوين جذي ... ما فيها شي !! .... اشترلها مره شي على ذوقك .. بين لها بمجله مثلا أحب جذي .. حتى لو تسريحه معينه صبغه معينه قولها اللي يعجبك ..


- ترى مو معناته انت ريال معناته اتعرف كل شي وعندك ثقافة جنسية كامله ... وانك مو مقصر على مرتك ...لازم تسألها شنو تبي ؟ وشنو تفضل ؟ وهل اكتفت بالكامل ؟


- شيل من بالك الافكار الخايسة .. اللي مرتي ما تقول جذي ما تسوي جذي .. " أحس جنها مثل البنات اللي رايحين فيها " ..هذا ان دل دل على تفكيرك المصين ...


- حلو انك تاخذ اجازه إنت ومرتك ... تسافرون مكان هادئ تغيرون جو .. مو كلا قاص عليها ومسافر مع ربعك ..( وماشاء الله كلا بتييب بضاعة والا تشتري سياره!! )


- ترى ما فيها شي اذا سويت فكره او مفاجاة ... وحطيت شموع وسويت ديكوريشن حلوو وقلت حق مرتك يلا شوفي ... عادي ترى هالسوالف مو بس حق الحريم ..


عش الزوجية :

- لازم يكون عندكم مكان ... صج يتسمى شقة او مكان ينسكن فيه .. غرف كفايه ومطبخ وتكرمون حمامات ..... اوكي بالبداية يمكن يكون هالشي تقزوره ... لكن الوحدة ما تقدر تستحمل أكثر .. يعني مسكنها في محكر !!


- بعدين اهتم اشوي في بيتك ..الاثاث .. الصحيه .. الكهرباء .. مو كلا انزين انزين وماكو شي ...!


- إدفع الايجار أول بأول ... مو ياهل انت بعد حسبالك مطوف مكالماتك ..!!


الاخلاص :

- بدونه الزواج يخترب ... اذا ما اخلصت حق بيتك ومرتك واعيالك ... بعد خلاص شنو فايدتك !!


- اذا تبي مرتك تخلص لك يا أخي اخلص لها ... عاملها بالمثل ...!!


- صلح الغلط بدال لا تعفس الدنيا !! مو حسبالك راحتك بره مع فلانه وعلانه !!


- وانت تمشي بالسوق مع مرتك اذا وحده فصعه تطالعك صد عنها .... مو طايحله مكاسر وجنه العيد ..


- وبعدين لا تقص على عمرك ... انا مخلص حق مرتي " خو بس فريند " ... لا يما هذا لما تتزوج امريكية قول هالحجي !!

وإلا تدري ... دامك فري جذي بعد ييب حق مرتك فريند !! اشمعنه انت ..


- لما ما تقصر على مرتك وتقولها الحجي الحلوو .. وتروح اتكلم من وراها .. وتقول " انا ما قصرت معاها كل شي مسويلها " ... شنو هالحجي شنو هالتناقض ..!! ...يعني صج عايش حياة مزيفة .... انزين ماكو شعور !! والا يعني هذي يسمونها كماليات جدام الناس ومرتك !!


كل زوج ينظر حق تصرفاته وشنو اللي سوا وشنو للحين ما سوا ... لا يقول ما أدري والا ما كانت عندي تجارب كل الناس جذي ... في شي اسمه سؤال في يسمع في يقرا ...


ويحاول يعدل الوضع ... لان خلاص تزوج وخصوصا لما يكون في اعيال ....


يعني حاول انك تعطي مو بس تاخذ ...


واتمنى التوفيج للجميع..... إلى اللقاء ..