Tuesday, August 15, 2006
posted by tasty_as_berry at 7:11 PM

السلام عليكم جميعا ،،،،

مر علي موقف قبل جم يوم ... ويعني ما قدرت أبي أحد يشاركني هاللحظة البديعة ... طبعا بحكم عملي لازم اتعامل مع الكثير من الناس والفئات والشخصيات ...ولازم اعطيهم على قد عقلهم وأسكت عنهم :)

انا قاعدة ورا زميلتي بالعمل ..

وإلا اتيي ذيك العميلة يت تسوي معاملة ... وتستهل على رفيجتي فلانة شلونج وتدلعها ورفجتي أصلا ما تعرفها اول مره تشوفها ...قارية الاسم من البطاقة وطالعة فيها !!

رفيجتي حاطة صورة بنتها الصغيرة على جهازالكمبيوتر ... وإلا تشوفها العميلة المصرقعة .. وتقولها هاذي بنتج ..!! عطيني اشوفها .... واي باخذها أوريها بناتي ... طبعا رفيجتي اخترعت شكو يعني لا اعرفج ولا تعرفيني !!

قالت لها هاذي فيها لزاق مره ثانية اعطيج غيرها .... وطبعا تصريفه ..

جان تقول العميلة : " أي عاد انا كلا اقصص صور ياهال من المجلات أحر فيها بناتي!!" ..... أنا قلت بقلبي :الحــمـد الله والشــكر ...:/

اشوي ... لفت علي العميلة وآنا ورا رفيجتي وتسألني ..

العميلة :
" انتي فليبينية !! "

أنا:
ضحكت ... لاء بس في ناس قالولي من قبل

العميلة :انتي بنت العايلة الفلانية

أنا
: لاء

العميلة:
واي تشابهين وحدة من هالعايلة .. إي انتي شكلج فليبينية أو سورية
بالله شياب اللي ياب ...!! (أنا بعرف الفليبينية وين والسورية وين ..!! )

جان تسألني العميلة : " انتي متزوجة ؟؟؟

أنا :
لاء

تتوقعون شنو ردت علي .....!!

جــــــــــان ترد علي وتقـــــــــــول :

العميلة : " عاد تصدقين أن امس محمد العوضي مسوي ندوة عن ..... العنـــــوسة !!!"

طبعا كانت صدمة لي رد غير متوقع من وحدة صاحية.. ويهي صار فيه علامة استفهام وتعجب !!؟؟.. ما ادري يعني كان ودي اقولها عنوسة بعينج ... طبعا اكتشفت انها مخروشة فتبسمت لها وخليتها تولي ..

العميلة : جم عمرج ؟ أنا : 25

رفيجتي ردت عليها : هـو لـيش ...!! تونا صغار ... اسملة علينا .. انا توني متزوجه وعمري 22 شنو يعني ..

العميلة : اي انا بنتي اصغر منج بسنة وكلا اقولها يا العانس !!!!

أهني أنا سويت روحي لاهية .. وبعدت عنهم ...

ما وعيت إلا رفيجتي تناديني أن العميلة قاعده تكلمني ... قلت بقلبي: وليييييييييييييه ..!!

العميلة : أي تقولين انتي مو متزوجة ..!! ليش يعني ما تزوجتي أهم اييون يعني شنو يصير ...!!

طبعا أنا من النوع اللي اعصب وما امسك نفسي بس ما ادري شلون مسكت نفسي مع هاذي ... كان ودي أقولها وانتي شكوووو !!

أنا: والله نصيب ... يعني اييون مرة الرفض مني ومرة منهم .. وكل شي على كتبت الله ..

أنا سألتها : انتي عندج بنات .

العميلة:
أي عندي ثنتين مو متزوجين ....

قلتلها : اوكي ليش ما تزوجوا ..!! جان تقول أي عاد انا كلا أقولهم يا العوانس يا العانسات ...!! ... (قلتلكم مو صاحية ..:))

أنا : حرام عليج ليش جذي تسوين فيهم اهم صغار ..!!

العميلة : أي ليش أهمه كلا يقولون لي يا العيوز يا الحيكرة ....!!!

( أهني عاد أيقنت أن المره عندها كرت أحمر رسمي .... :))

العميلة : بالله عليج أنا جيكرة .... وترفع النقاب ... ( طبعا الأخت متنقبة ) ..

أنا : لاء وين عيوز اشحلاتج وشزينج

العميلة : إي شفتي شلون أنا لو يصير عمري 70 وإلا 80 نفس الشي ما اتغير ... ( حشى تعلم الغيب !!! )

ردت العميلة : على فكرة ترى أنا ..... ( خطابة ) .. أهني قلت من عذر بس هم للحين مينونة ما تغير شي ..!!

بس ترى أنا ما اخطب أي شي مو أي أحد ...!! تدرين بعد الحين كلا .. أيـــــــــدز .. أي أنا اخاف ..!! محمد العوضي يقول اللي بيتزوج لازم فحص طبي واللي ما يبي كيفه هذا معناته خايف وفيه شي ..!

انا زوجت ولدي خطبتله ويبي يتزوج أربع ... وأنا متزوجة 3 مرات وأبي الرابع الحين ... وأنا ريلي الاول انا شته ما ابيه يبي يتزوج ثانية وبعدين ردلي وبس شتة ...

وأخوي بالسعودية كلا يقولي تعالي تزوجي مسيار ... تدرين بعد المسيار حلال ... بس الحين محد كفوو والله ..!!

طبعا كل هالقرقة ووراها عميلتين ينطرون وأحنا ابتلشنه وإلا رفيجتي تناديني تبي تصرفها ... أهني حست جا تقول ويه يالله انا ماشية شكلي سويت لوية ....

وبس طست ....!!

فشرايكم يعني هاذي وحدة صاحية...؟؟ وشلون كانت ردت فعلي معاها ؟؟