Sunday, January 16, 2005
posted by tasty_as_berry at 9:23 AM

السلام عليكم ورحمة الله وبركاته ،،

الحمد لله والصلاة والسلام على أشرف المرسلين سيدنا محمد وعلى آله وصحبه وسلم ...



موضوعي اليوم .... مو عن الزواج ... ولا عن الرياييل ...علشان بعض الناس ما ينأرفون ...



أنا بتكلم عن المشاكل والمصائب والبلاء من رب العالمين ... وكيف على الانسان مواجهة هذا الشي .... هل يصبرويواجه ؟ يتذمر؟ يتهرب ؟ يلعن ويسب وبذلك يكون كفر ؟



اذا الله بلاك إذن فالله يحبك ....فقال سبحانه وتعالى :



بسم الله الرحمن الرحيم { وَلَنَبلُوَنكُم بِشَيء منَ الخَوف وَالجُوعِ وَنَقصٍ منَ الأمَوَالِ وَالأنفُسِ وَالثمَراتِ وَبَشرِ الصابِرِينَ (155) الذِينَ إِذَا أَصَـابَتهُم مصِيبَةٌ قَالُوا إِنا لِلهِ وَإِنـا إِلَيهِ راجِعونَ (156) أُولَـئِكَ عَلَيهِم صَلَواتٌ من ربهِم وَرَحمَةٌ وَأُولَـئِكَ هُمُ المُهتَدُونَ } [البقرة:155-157] .



وفي الحديث الصحيح قال رسول الله صلى الله عليه وسلم :



"أشد الناس بلاءً الأنبياء، ثم الأمثل فالأمثل…" [ رواه البخاري ] .



الحياة يوم مر ويوم حلو .. يوم لك ويوم عليك ... الله ياخذ ويعطي ... واذ ابتليت في يوم من الايام فهذا امتحان من رب العالمين .. فعليك بالصبر والرضا .... لان الله سيفرجها ... وربما يكون امتحان صعب او سهل فكلا الحالتين مواجهة المصيبه بالدعاء والتحمل ... فبالنهاية الله سيعوضها على عبده المؤمن ....



كل شي قدر ومكتوب ... الندم والتحسر ما يفيدون في شي ... إنما يقابل ربه بالدعاء والصلاة ويطلب الرحمة ... وإن شاء الله يستجيب الدعاء ..



الابتلاء ... نعم خير ونعمه من الله شرط الصبر والشكر والتحمل ...وبنفس الوقت الشخص يتعلم من الحياة ويتجنب الوقوع في المصائب ويكشف حقيقة الدنيا و الابتلاء يذكرنا بعيوبنا وكيف نتحاشاها ...



انا ادري ان الشخص ساعات يكون مضغوط يحس المصايب وحده ورا الثانيه ... مريت في جذي موقف ... لكن كنت أدعي لاني ربي اهوه بطلعني من هاذي المشكلة .... نعم اتذمر لكني استغفر واحاول اني اكون قوية ..



وفعلا آخر شي الله يفرجها ويمكن أكثر من ما ابي بعد ... وهذي نعمة من الله ..



وانا راح اتكلم عن ناس فعلا الله راح يطرح فيهم البركة ولهم أجر عظيم عند الله .... منهم المريض والمضغوط نفسيا ماليا الاب والام وجميع انواع البلاء ...



راح ابدي معاكم وان شاء الله ما انسى أحد :



- الاشخاص المرضى ( سكر- التصلب المتعدد - تكسر بالدم.......الخ) الي يحتاجون أبر دائما وعلاج وأدويه ... الله يصبرهم ويعطيهم الصحة والعافية ... صراحة ناس فعلا تتحمل ... تأخذ الدواء بوقته تلتزم في غذاء معين ... ويمكن يحرمون من اشياء وايد ... ونفسيتهم تتعب ... وأقولهم الصبر الصبر الصبر.



- الاشخاص اللي ما ينسون اهلهم ودايما بارين فيهم ..... ويتحملون جميع المشقات لأجل والدينهم ..... واللي عليهم ديون وأقساط .... علشان يعدلون بيت اهلهم او يساعدون او أي كان .... اقول والنعم فيكم والله ونعم الاخلاق .. سواء متزوج او لاء ... الله فيفرجها ان شاء الله ..



- والناس اللي دشوا في مشاريع وخسروا وناس انبافت فلوسها وتعبها راح هدر ..... اقولهم هذا بــــــــلاء وامتحان .... علشان الله يعرف المؤمن ومن الجاحد ... ان الله يراكم ولن يترككم قولوا آميـــــــــــن .



- والمرأه والرجل اللي يتزوجون من شخص مريض ويسهرون على راحته ويجابلونه ويهتمون فيه ..... فعلا ناس بقمة الرومانسيه والاخلاق .... وهذه صفة نادره الوجود .... إلى الامام ان شاء الله .. وبالتوفيج ...



- إلى البنت ... اللي غلطتها بعشرة .. حافظي على نفسج ... وكلنا نخطأ ولكن لابد ندرك الخطا ونتجه الى الله بالدعاء .. ونتعلم من أخطائنا ... والله غفور رحيم ..



- إلى الرجال .... خصوصا الكتومين منهم ... اصبر وعليك بالدعاء .. وحاول انت تفعل الشي الصحيح في حياتك حتى الله يوفقك دنيا آخره.



- وكل زوج وزوجه ... واجهتهم مشاكل بالحياة الزوجية او بالانجاب او أي كان ... إن الله مع الصابرين ..



- إلى كل من فقد شخص يحبه ... نعم نحزن ... لكن البقاء لله وكلنا لنا يوم ... اذا صبرتم وتحملتم الله يشفعلكم يوم القيامة..



- حتى الكوارث والحروب بلاء ...يا ربي يعين الكل ... ويصلح امورهم ... ليرى الله من صبر ومن كفر ...



- واخص بالذكر الدارسين في الخارج ... ومدى صبرهم بالغربة .. ومدى تحملهم الاغواء والاغراءات بجميع انواعها ... ويحاولون اداء فروضهم والالتزام ... وتمر عليهم لحظات الميزانية صفر .. لدرجه يحتاجون الاكل ... الله يبارك فيهم وأقولهم بالنهاية راح يرتاحون .. وراح الكثير وما بقا إلى القليل .



- إلى كل أم وأب ... صبروا على ابنائهم وتحملوا ... ودخلوا مخافر .. وبكوا .. تفشلوا .... اقولهم يعطيكم ألف عافية ونعم الاباء والامهات .. فهذا لا يدل على عدم التربية مو شرط بالعكس ممكن يكونون متربين تربية زينه وبيئة زينه .... لكن هذا مكتوبلكم وابتلاء ... لقياس مدى صبركم وتحملكم ...



- الهم والكرب وأي صعوبة بالحياة ابتلاء .. عليكم بالدعاء ... يا جماعه الايميلات اللي فيها دعاء ما تكلف شي لو قريتوها ... صدقوني أجرها كبير وترفع عنك سيئات ..



الى كل مسلم وأنسان على وجه الارض .... البلاء نعمة من الله ... فأصبر عليها وواجهها بالدعاء والصلاء والشكر ...

ولازم كلنا نحمد ربنا على النعمه .... ناس ما تاكل ولا عندها بيت والا سياره ...!!

اذا أحد حس بالهم والضيقه وان مضغوط ..... يدعي والله يفرجها ... مو يروح يخربط و يسوي الغلط ويزيد الطين بالله ...



الواحد لازم يفكر ..... يعني حتى لما يضيع منك شي ... أدعي راح تلقاه ... وحتى استصعب عليك شي أدعي وراح يسهل ان شاء الله ..



ولا تنسى ان اصابتك مصيبة أن تقول :

"إنَّا لله وإنَّا إليه راجعون، اللهم أجِرْني في مصيبتي، واخلف لي خيراً منها. فإنَّـك إن قلت ذلك؛ أجــارك الله فــي مصيبتك، وخلفها عليك بخير"

"اللهم إني اعوذ بك من الهم والحزن والعجز والكسل والبخل والجبن وضلع الدين وقهر الرجال "

"اللهم لا سهل إلا ما جعلته سهلا وانت تجعل الحزن إن شئت سهلا"





يعطيكم العافية والتوفيج للجميع وجزاكم الله خير

 
posted by tasty_as_berry at 9:16 AM

السلام عليكم ورحمة الله وبركاته ،،،

إلى كل رجل وإمرأة ..... اذا انتو مو قد الزواج مليون مره قلنا لا تتزوجون .. واذا مو قد المسؤولية هم لا تتزوجون ... واذا ما تحبون الياهال هم لا تتزوجون ....



يعني بس كلا خيانه خيانه .... طلاق .... انفصال ...!!



الواحد حتى يكره اييب طاري الزواج ..... الواحد يدور الاستقرار بعد الدراسه والشغل والايام اللي راحت .... يرد للغلب والزعل والهم ..!!



المرأه اتحط العيب بالريال ... والريال يحط العيب فيها ... وكل واحد يشوف عيوب الثاني .. ولا ينظر حق مميزاته .. أو حتى يفكر يصلح شي في نفسه ..!!



أشيا ء سخيفه وتافهة اتحصل ... وإن دل دل على السخافه .. والحياة التافهة اللي عايشينها ..



البنت تحن ابي اتزوج وابي اتزوج .... اول ما اييها واحد تستانس ويعجبها وتقول ابيه ....

وبعدين طلع فيه وفيه .... واهيه كلا مسكينه وما فيها .... واتيي تقول " جان زين خذيت عن حب !!"



واتيي البنت اللي خذت عن حب تقول " صدقوني لا تاخذون عن حب ترى أذيه إخذي واحد ما تعرفينه !! "





ولما الريال تخطبله امه وينصدم ويطلق " يقول هذا مو اختياري وانا غلطت تزوجت عن خطبة أهل .. خلاص بتزوج عن حب "



وأيي الريال اللي تزوج عن حب ويقول " أنا ما ادري شلون حبيتها وخذيتها ... واهيه واهيه ... خلاص مليت منها !!! "



وهكذا .....



انزين الواحد لما يبني قرار الزواج يدرسه وينظرله من نواحي وايد ... الزواج مو لعب والا فترة وتعدي والا سياحة ..!!



وبعدين الزواج توفيج من الله ماله شغل عن طريق حب أو أهل ... والطلاق مو عيب ..!!



لكن لما يكون بأسباب تافهة ... ومثل لعب الياهال ... اهني تكون المشكلة ..



المرأه



الحين البعض منهم حسبالها الزواج راحة ... وبيت .. وزوج .. وكلا حب وسعادة .. وأطلع وايي على كيفي .. بعد حكره الاهل ..

والريال طبعا ... مرتي حرام ما احكرها اطلعها .. اتيي البنت خو مو شايفه جذي بيت اهله طلعي وروحي .. ميخالف...

اهني عاد يكبر الراس .... تبدي تاخذ أرقام واشويه شويه تبدي تتعرف وتكلم شباب... تبدي اتسوي مقارنه بين اللي تكلمهم وريلها ... يطلع الريل مو زين .. ويطلع أكيد عنده سوالف ... وبس خلاص سوت قصة بروحه وأعذار ...!!



الريال



طبعا يتزوج ... هذا بعد اذا هد رفيجاته .... غير الخطوط اللي فاتحها ويتكلم منها .... وشنو العذر " كلا مرتي مو مريحتني بالفراش وإلا اهيه ما تعرف شي واهيه مو مثيرة !! " .... وعاد سمعي وعدي من الاعذار ... ينسى مرته اشكثر سامحته ... ينسى اشكثر اهوه خانها وقص عليها .. اشكثر كشت فيها ... اشكثر اهيه طيبه وينقص عليها ... عــــــــــــادي !!



وفي حريم دام خاني ..... خلاص بخونه .... وتصير حياة منيله ب 60 نيله ...



والمشكله الاكبر ..... لما اثنين يحبون بعض سنين .. ويتزوجون بعدين يتطلقون ... على اشياء رهيبة ..!!

يعني اهمه عيل طول هالفترة شنو يسوون ..!!

يعني للحين ما عرفت طبعه .. اسلوبه .. متى يعصب متى يضحك ... متى ومتى ..!! وشنو عيل فايدة السنين هاذي كلها ؟



في زوج او زوجة ... اتيينهم تقولين لها .... شلون الزواج ... حلوو في أحد مقصر على الثاني .. انزين شنو اللي ناقص .. ولا شي ...



انزين ليش الخيانة ....!! ...جذي ما في سبب محدد ...انزين ليش ... جذي ..!!





اللي بقوله ان في ناس حاشهم الملل .... لكن مو متصورين الخلل وين ... ولا لهم خلق اصلا يفكرون .... فتحاول تلجأه حق علاقة أو أي شي ....



يا جماعة الطلاق والله مو عيب .... واذا فعلا الغلط ما يتصلح والحياة مستحيلة بين الاثنين ممكن يحصل الطلاق ... ولا يتم الزواج مزيف وكلا خيانة ...



واذا كنتوا خايفين على الياهال .... ترى ما سويتوا شي ..الياهل أول واحد يلاحظ فتور العلاقة والوضع بالعايلة وما يتكلم ..



يعني في كلا الحالتين .... نفس الشي .... الطلاق وكل واحد يلتفت حق نفسه .. ولا الذنب والخيانة ..



على الاقل النفسية تتعدل وحتى ذيك الساعه الواحد يقدر يربي عيالة في وضع مستقر ..



وبعدين اللي حاس ان الوضع مو مستقر وصعب ماله داعي الانجاب .... حرام الياهال يتغربلون ..!!



لا تتسرعون ... وديربالكم .... خلوا عندكم ضمير اشويه ... والاهالي اتمنى انهم ما يزوجون اعيالهم بسبب قرارات انانية ... ولابد انهم يسألون عن الشخص عدل ...





طبعا في ناس صبرت صبرت ... وفي ناس ملت .. وفي ناس وضعها معلق ... وفي وفي ...

اهم شي الواحد لما يسوي الشي يتأكد ويسأل نفسه اللي اسويه صح والا غلط ..بس



يعني هل انا راضيه على اللي اسويه ؟؟؟

هل حققت اللي ابي ؟ انا سعيد ؟ شنو الفايدة ؟ انزين وآخرة هالشي شنو ؟ متى بصير سنع ؟



ويعطيكم العافية .... وبالتوفيج ...



----------

ملاحظة : اكتشفت ان اللي يراسلني ..... يكلمني بشكل ان كلامي مهم واني اخصائية والا شخص فلته !!

واللي يقراه راح يطبقه ويعتقد فيه .......لكن كلامي في ناس تأيده وناس تعارضه .... ويظل بالنهاية رايي الشخصي .... انا وحدة عادية قاعده اعرض مشكلة تحصل وشنو ممكن الواحد يتصرف ...بس

وبعدين اللي يبي يناقشني .... ما يفرض رايه ... يقدر يقولي رايه بشكل محترم .... وأنا راح اعلق واتناقش معاه بكل ود ..

وعناد على بعض الناس كيفي بكتب عن الزواج والخطاب والرياييل :)))

وشكرا
 
Saturday, January 15, 2005
posted by tasty_as_berry at 12:50 PM



لجمالك ..
-------
(حمام كليوباترا)




ستصبحين كليوباترا عصرك مع هذه الوصفه المبتكره لحمام الحليب الغني ..

اخلطي مايلي:

- ثلاث اكواب من الحليب المجفف
- كوب من دقيق الشوفان
- ثلث كوب من اللوز المدقوق
- ثلث كوب من دقيق الذره
- ملعقه كبيره من اكليل الجبل
- ملعقه كبيره من النعناع الجاف
- ملعقتين من زيت فيتامين (هـ)

عندما يتجانس الخليط خذي كميه كبيره منه وضعيها في قطعة قماش رقيقه واربطيها في حنفية حوض الاستحمام ثم املئي الحوض وانعمي فيه بلحظات رائعه وبشره تفوح عطرا ونعومه ..


(ماسك هندي)





- ضعي 3ملاعق طعام (حمص مطحون) في وعاء.
- اضيفي عليه القليل من الكركم (كلما زادت الكمية تكون النتيجة أفضل ولكنه يعطي البشرة اللون الأصفر ولدلك نحاول التقليل منه) .
- اضيفي كمية صغيره جدا من الملح.
- اسكبي الماء بطريقة تدريجية حتى يتماسك الخليط.
- ضعيه على وجهك والمناطق المسمرة في جسمك لمدة ساعة ومن ثم ازيلية بالماء فقط.

النتيجة: ستصبح بشرتك ذات ملمس ناعم واكثر بياض من قبل. لمعلوماتك هذه الطريقة هندية الأصل تقوم بها العروس قبل الزفاف باسبوع لجسمها بالكامل ...

(معطر للجسم)




اظيفي بضعة أكواب من عصير البندورة إلى ماء الحمام واسترخي فيه لمدة ربع ساعة ، ثم اشطفيه .


(لطرد التعب)




بعد يوم متعب اضيفي كيسا من البابونج إلى حمامك واسترخي لمدة نصغ ساعة .


(ملطف للجلد)



اظيفي ربع كوب من العسل لماء الحمام واسترخي لمدة نصف ساعة .


(لتخليص الجسم من السموم وتنشيط الدورة الدموية)



- لتر ماي مغلي .
- 2 ملعقة كبيرة من نبات المريمية المجفف.
- 2 ملعقة كبيرة من ملح الطعام.
- 2 ملعقة كبيرة بيكربونات الصودا .
- 2 ملعقة كبيرة صابون مبشور.
- 2 ملعقة كبيرة من النشا .

التحضير والاستعمال :

(1) يغلى الماء في إناء ، وتضاف إليه المريمية ، ثم يغطى الاناء ، ويستمر الغليان لمدة 15 دقيقة ،ثم يرفع الاناء من على النار ، ويترك لمدة ساعة للحصول على منقوع مركز ، ثم يصفى هذا المنقوع ويترك جانبا .. ثم يخلط الملح والصودا والصابون والنشا خلطا جيدا .

(2) ويضاف هذا الخليط إلى ماء الحمام ، ثم ينزل المستحم إلى الماء ، ويسترخي به لمدة 10 - 15 دقيقة .. وبعد هذه المدة يضاف منقوع العشب إلى ماء الحمام .. زيظل المستحم مسترخيا بماء الحمام لمدة 15 دقيقة أخرى .

(3) ولابد للحصول على نتائج طيبه ، أن يجري هذا الحمام على مرحلتين ، كما سبق ، حيث أن الحمام الأول يعمل على تخليص الحسم من السموم والرواسب الضارة .. بينما يعمل الحمام الثاني على تنشيط وإعادة الحيوية للجسم بعد تنظيف مسامه وخروج الرواسب منها .


( لتطويل وتقوية رموش العين )



اخلطي :

- ملعقة صغيره زيت الخروع .
- ملعقة صغيره زيت اللوز .
- ملعقة صغيرة زيت ذرة .
وضعيهم في علبة ماسكارا فاضيه ، واستخدميه صباحا ومساء .


(تونيك طبيعي)




استخدمي ماء الورد كمنعش لبشرتك يوميا وينصح به باردا لتنشيط الوجه.

--------

يلا تزهبوا حق العيد :) لا تصيرون كسالة ومالكم خلق .... وكلهم جربتهم والنتايج حلوة ... تحياتي لكم.
 
posted by tasty_as_berry at 12:42 PM



السلام عليكم ورحمة الله وبركاته ،،،




كل عام و أنتم بخير ... وعساكم من عوادة ... وتقبل الله طاعتكم ...

وبمناسبة قرب حلول عيد الفطر السعيد ... حبيت اكتب هالموضوع ...

العيد مناسبة حلوه علينا ولها ترتيبات معينه .. والمناسبه ننطرها بفارق الصبر .. وشلون مع الوقت العادات والتقاليد تغيرت .. أو نقدر نقول الناس نفسهم تغيروا ..

أول الناس يفكرون تكون ذريتهم كثيرة .. حق لم الشمل واليمعات .. ويكون الكل على قلب واحد ..

لكن للأسف الحين ... صار العكس كل ما كثروا الإخوان كل ما كثرت الخلافات .. والزعل .. والقطاعة .. وحتى لو صاروا مع بعض تلقاهم مو على قلب واحد ولا في ألفه ولا محبة ...!!

وصارت اليمعات من مناسبة لي مناسبة ... أو نادر جدا .. وبعد اليد واليده ... خلاص لا أكو زواره ولا شي !!

وين أيام البر واليمعه !! ...

وين أيام لا تيمعنا بالعيد والبوك متروس عيادي ( الحين بالقطاره) !! ...

وين أيام ما كانت يمعه أول يوم العيد مقدسه .. اللي شلون أحد يفكر يسافر فيها !! ..

أول بالعيد ما نطلع إلا والغدا في بيت الاهل ... الحين أول يوم صار بالمطاعم .. الله يا الزمن !!

الحين بهالوقت ... أغلب العوايل تزعل وقطاعه ... ليش عاد !! ... لا والعايلة تكون أصلا صغيره .. وهم ما يدرون عن بعض ...!!

وكل واحد بالعيد ما يبي اليمعه عنده ... واللي مسافر .. والي ما نشوفه خير شر!!

طبعا في عوايل .. ما شاء الله .... لا إله إلا الله ... الله يتمم عليهم ... يمعات وسفرات ومخيمات .. وكلا مع بعض ... وما يطوفون يمعه .. الله يديم السعادة ..

على الأقل نقعد مع إعيال عمنا أو خالنا .. سوالف ..وغشمره.. ميانه .. مثل الاخوان ... لا بغينا خدمه نطلب منهم .. إعيال عمنا وعزوتنا .

يا ربي ..... الحين ولد العم بالغصب يسلم لازم نغزه ... واذا شفتيه بره هااا هذا مو جنه ولد عمي فلان ....!! مو حافظه ويها عدل ...

أذكر وأنا صغيره ويي بالغصب اتييني النومه من كثر ما أفكر باجر العيد .. وأكون مزهبه هدومي ومعلقتهم من الشباصه لي تكرمون الجوتي ...

لا وحتى الأندر وير لازم يديد بجياسته ... وحتى الدلاق لازم يديد .. وحتى دراعه الزواره يديده ..

وساعات أمي حاطتلي حنه بيدي .. والا صبغ اظافر .. وظروري الحمره مزهبه اول وحده ...

وأقوم متفززه من صباح الله خير ... يا أروح صلاة العيد ويا امي ... ولا أفر على البيت اقعدهم ..

وأبوس أمي وأبوي .. وأعايد عليهم .. وبعدها نروح نعايد على الأهل ..

ويا حلــو نحن والأطفال .... واي واي متعه عندي .. الله يذكره بالخير ... ولا سوق شرق الألعاب..

لا وفي عيد الأضحى الياهال يخافون من الخروف ... انا اعصب اذا ما قعدني أبوي قبل لا يذبحون الخروف لوووول

لكن العيد بعد ما كبرت ... بايخ ... ودي أهج أسافر .. بس هما يظل له طعم حلوو ...

يعني الي حبيته أقوله .. بسنا زعل وبسنا قطاعه .. الأهل مالهم الا بعض .. وصفوا القلوب والنيه وتسامحوا .. وبالتوفيج للجميع ..

يعطيكم العافية ... وعيدكم مبارك ...

الى اللقاء ،،،


 
posted by tasty_as_berry at 9:40 AM








السلام عليكم ورحمة الله وبركاته ،،



شلونكم ؟ شخباركم ؟ دوم بخير إنشاء الله .... وكل عام وأنتم بخير مقدما .. جود ما أقدر اكتب إيميل قريبا وذلك لسبب انشغالي ...



في شي رهيب قاعد يصير معاي ... بالنت ألا وهو الإيميلات اللي توصلني ...



طبعا في إيميلات بقمة الروعة والأدب والذوق والسنع ... شكر وكلمات صج والله أخجل منها ... ودايما ارد عليهم ... لكن يعذروني الجميع .. بالآونه الأخيره قمت أتردد بالرد ... وأتردد حتى بقبول الأدد بالماسنجر ... مو غرور حشى لله ..



لأن شي رهيب قاعد يصيرلي إن باليوم إيميلات فايرس تجسس ما ادري شنو علتهم مو اقل من 20 ، والله يوميا اكثر من 20 إيميل ، وأنا أحطلهم بلوكد ودليت ..



وفي ناس يطرشون إيميلات ... يسبون ويعيبون ويتطنزون .. علما بأني اكتب ايميلات هادفه .. وانتقد ناس وتصرفات بالمجتمع سيئه وغير مشرفة .. أعترف إسلوبي ينرفز ..



لاء وآل ايه !! يسبون ويعيبون وما يبون أحد يرد عليهم .. ولما ارد عليه .. يقولي من القهر رديتي ..

الحين بالله منو المقهور !!.....لا ويقولي أنا عمري 28 هاذي سوالف واحد هالعمر ..لا وآخر شي يقولي والله لا أوريج اذا ما طلعت إسمج و رقمج ...!!



وأنا عندي قناعة العين بالعين .. والسن بالسن .. والبادي أظلم ...





إنزين وبعدين لي متى ...!! يعني شنو نقص .. وإلا إثبات وجود .. وإلا رغبات شيطانيه .. وحب لأذية الناس ... عقده نفسيه ..



يا جماعة الخير .... ترى كلا بينعاد عليكم .. إن سويت خير بتلاقي الخير ... وان سويت الشر هما بيعود عليك الشر ...



انا سمعت سوالف عن الهاكرز .... شوفوا الهاكرز مثل ( طاقيه الإخفاء) ... يقدر يدش كمبيوتركم بدون لا تحسون ...



الناس أنواع يا إنه يستغل طاقية الاخفاء بالخير .. يا أما بالشر ....



إذا الهاكر خير ويخاف الله ... بالعكس عنده مباديء و إيمان ... ويمكن يحذر الناس من أشياء غافلين عنها ... وفعلا في ناس جذي ... الله يكثر من أمثالهم ..



وإذا الهاكر شري ونفسه دنية .. راح يأذي الناس .. ويتعبث يخرب الأجهزه .. ويبوق صور ناس وفلوس ..



شوفوا يا جماعة الواحد بهالوقت .. ما عنده خصوصيه ولا يرتاح .. لا بالكمبيوتر( لا يقدر أحد يحط موضوع أو صور شخصية) ولا بالموبايل ( لأنهم يقدرون يطلعون الصور الممسوحه )... ولا حتى بطلعة مرتاحه ( اللي يتحرش واللي يضايق ).. ولا حتى في البيت !!



إنزين ... دزيت فايرس .. خربت كمبيوتر .. وبعدين !!

الشخص يا إن يصلحه .. يا إن يشتري يديد ...



انزين ... شنو بس خلاص !!



أنك أخذت صور بنت ... وابتزيتها ونشرته .. هددتها .. أي كان .. وبعدين !!

الصور التركيب اتبين ... وهالسوالف الكل يدري فيها الحين ... وتكون جذي خربت سمعه وعايله ويمكن حياة ...



آخر شي شنو يمكن يصيدونك .. وتروح فيها .. وتطع بالشينه ولا استفدت شي !!



وأذكركم القانون بالكويت للي يفضح بلوتوث أو نت .. غرامه 1000 وسجن 5 سنين .. وإذا القانون ما طالك ... بطولونك أهل البنت ... لان شنو فيها شرف ... وياما نسمع عن هالقصص ..



و المشكله .. حتى الشباب .. ينفضحون .. وتصير سوالف بينهم .. ويصير طق مطاقق وتذبح ..



والله حرام اللي يصير ...



شنو المستوى اللي وصلناله .. صدقوني اللي يأذي الناس .. راح تنعاد علي .. وإذا مو عليه .. بتحوش أهله أو حتى إعياله بالمستقبل ..



عموما انا متأذيه متأذيه ... شنو بحوشني بعد .. وشاريه كمبيوتر يديد شاريه ...



والقافلة تسير والهو هو شسمه ..





وحكمة اليوم : عاملوا الناس .. كما تحبوا أن يعاملوكم ....





سلامو عليكووو ،،،


 
posted by tasty_as_berry at 9:08 AM


السلام عليكم ورحمة الله وبركاته ،،،

موضوعي اليوم special ومشوق حق كل بنت تمر بفترة الملجة أو اللي إنشاء الله راح تمر بالأيام الياية بإذن الله ...

هاذي الفترة إهيه أحلى أيام الزواج يكون فيها التعارف والتجارب اليديدة اللي ما مرت عليج من قبل ... وفي هالفترة إنتي وشطارتج بالتفنن والحركات اللي تبهرين فيها زوجج كثر ما تقدرين ...

الكثير يعتقد ان البنت ما تقدر او نادر انها تسوي شي أيام الملجه إنها يعني تبين شي او تقول أو تسوي ( طبعا ما كنت اقصد الحركات الجنسية أو الجرئة فيها ) ...انا اقصد بالحياة العادية.. والسبب يرجع الى انها خجولة .. فهذا دور الزوج في هذه الفترة !! ... وانا اعتقد هالشي غلط .

طبعا البنات أنواع :


- في من هي فعلا تبحث عن الستر والحياة السعيده يعني تعطي من قلبها ....

- أما البنت اللي معتبره الزواج مجرد تغيير ينتزع منها الملل أو منفذ للهروب من سلطة الأب والأم ... ما اعتقد تحرص إنها تقدم بالعكس هذي النوعية تبي تأخذ وتمتص من الزوج كثر ما تقدر ..

------------

ففي هذه المرحلة لازم يكون لج تخطيط مسبق ...

( طبعا ما راح أتكلم عن الحفلة نفسها لان في ناس تسويها في ناس لاء ، والترتيبات تعتمد على ميزانية أهل البنت اللي المفروض أهمه يسوون حفلة الملجة)

تبين هالفترة تمر حلوه عليج وما فيها نواقص ، فكري دايما شلون تخيلتي هالأيام ، حتى لو إعتقدتي إنها مو موجودة حاليا وبس بالقصص أو الأفلام ...

أنا بذكر بعض الأمور اللي إنشاء الله تساعدج في هذي الفتره من فناتق وحركات وتغييرات :-

1- طبعا بداية أنا افضل برأيي الشخصي ، إن الملجه تكون بيوم والحفلة بيوم يعني بينهم وبين بعض يومين أو 3 ايام أو أقل المهم ما يزيد اكثر من أسبوع
( طبعا في بنات وايد يقولون لاء مو وناسه حلاته يشوفني أول مره وأنا كاشخه وجذي )

أنا أقولكم ليش ؟؟

حلو بيوم الملجة إيي يتعشى عندج ( علشان تاخذون على بعض وما ترتبكين حق الحفلة ) تكونين مزهبه طاولة وشموع ومن هالحركات وما أوصيج لا تنسين (البيبسي بو ليمونه شغل فنادق) ..
وحطي ورد ومن هالحركات وبخري المكان .. ومتكشخه طبعا مو كشخة وخبه شي ناعم وبسيط .. وفاله الشعر .. ومتعطرة .. ( ويوم الحفله رفعي شعرج تسريحه كتغيير )

تدرين ليش حلو تملجين قبل الحفلة !!

صدقيني ما راح يمديج بعد الحفلة تروحين مطعم وتأخذين راحتج معاه .. اولا : حاطه مكياج وايد ، ثانيا : شعرج متروس سبريه ومن هالحجي ، ثالثا : على ما تخلص الحفلة تكون الساعة متأخرة .

2- بيوم الحفلة لما تطلعون طبعا لازم تصورون وخليه الصور عفوية كثر ما تقدرين ، و خليهم يزهبون لكم اكل من البوفيه ، وتعشي إنتي معاه ، بعدها قوليله تروحون عند ابوه(عمج ) علشان تسلمين عليه ، ومنها تتمشون بالسيارة على ما توصلون .

3- طبعا بعدها يا انتي تروحي بيتهم يا اهوه ايي يتغدا أو يتعشى ويزوركم وهكذا ، وأكيد راح يشوف غرفتج وتقعدون فيها ، ويا حلو هالفترة اللي تكون في بيتكم وبدارج .

نصيحة :

إذا أثاث دارج قضى عليه الزمن ويفشل وكل قطعه لون ومن هالحجي ( لا تقولين يلا بتزوج وبطلع !! على ما تشترون اثاث الشقة وتزهبين ، أكيد راح إيي أو ينام كذا مرة عندج )
فحاولي إن يكون مكان حلو ومرتب والفراش كبير وأباجورة ويا حبذا لو كان تكرمون ( الحمام ) يكون داخل الغرفة مو بره ويكون فيه طقم كامل حق الصابون والفرشه وجذي..

وفاجأيه بأنج شاريتله نفس فرشتج يحطها عندج بلون ثاني ، وبعض البجامات ، وملابس جذي على ذوقج ، وعطور ..

4- وطبعا كثري من فناتق بالشكل مره رافعه الشعر مره مطيحتة ، تفنني كثر ما تقدرين خلي يشوفج كل يوم شكل (بحيث كل ما يشوفج يقول يا بختي ) وحتى باللبس مره ¾ ومره دراعه ومره بجامه راقيه ومن هالسوالف …
وإهتمي في بشرتج يعني مره حاطه مكياج خفيف ومره ثقلي ومره مو حاطه يعني خليه يعرفج بجميع أشكالج ...

وطبعا ما أوصيج قبل الملجه لازم تكونين منقعه عند الصالونات .

5- اهتمي فيه كثر ما تقدرين سويله حلو سوي اكله معينه ، ويا حلو وقت الملجة في (رمضان) لها طعم حلوو ، والاحلى لما يمر بعدها العيد عليكم ، سويله شاي أو قهوه مثل ما يحب ، لازم تسوين هالشي بنفسج وتييبينه ، او تكونين مزهبته لما يقولج كاني ياي ..
طبعا: معروف إن الأم دايما إتييب حق الأبو الشاي بعد نوم الظهر والبسكوت والحب ، وزوجج أكيد يبي نفس الشي ..


6- وفي فترة الملجة لما يزورج في بيتكم خلي يتقرب منج اكثر شلون أنا اقولج ...
يعني زهبي البومات الصور مالوت قبل وخليه يشوفج و إنتي صغيره وليما كبرتي .. ( بس بليز صور شغل هلاقة أيام أول والكشه والأشياء اللي ما تتطلع هاذي مو ضمن صور ) ..
بالإظافه الي شريط الروضة أو شريط سفرة او رحلة عايلية ، وقعدوا شوفوه مع بعض ..
وحاولي تورينه هواياتج ، وأشياء تحبين تقرينها ، او تحتفظين فيها ...

وهم العكس صحيح ... لما تروحين عندهم قوليلها يسويلج نفس الشي .... علشان انتي بعد تعرفينه وتتقربين اكثر..

وإذا أيام الملجة صادف عندج حفلة او عرس خليه اهوه يوديج و إيي ياخذج ..( وطلبي منه يكشخ يعني يغتر )

وطلبي منه إنكم تروحون مصور قبل الحفلة لأن إنتي كاشخة وجذي .. ( هالفكرة راح تترك انطباع حلو حقكم الاثنين )

7- وفي فترة الملجة لازم تطلعون تتعشون تتمشون من هالسوالف .... حاولي مو كل مره مطاعم ومجمعات وسينما ...
عادي روحوا البحر ( خصوصا لما تنقين موقع صج رومانسي والجو يكون يساعد والقمره نازله ) أو تشترون أفلام وعشا وتقعدون بالبيت تطالعونهم .. وناسه والله..
أو يعني حسسيه إنج ودج تروحين أي مكان معاه ... وإنج ما تتعنفقين .... حتى الممشى روحي .


8- أكيد في هذه الفترة لازم تزهبون حق الشقة أو المكان اللي راح تعيشون فيه ...
خلج سلسة حيل ومرنه .. يعني لا تكسرين فيه إذا خذا رايج من أثاث أو لون أوفكرة ....
يعني مو تردين عليه : وييييييييييييع ... لا كلش كلش مو شي ... من صجك !!!

لاء هذا رد مو ذرب كلش، بالعكس ردي عليه :
والله اهو زين بس مثلا مو جنه سعره ما يناسبه ... إشرايك نفتر بعد وإذا ما لقينه شي حلو وبسعر حلو نردله ..


حاولي تكونون متفقين بالأختيار ... وحاولي إنج ما تثقلين عليه يعني على قد الميزانية ... ( مو شرط كل ما كان الاثاث غالي وفخم يعني حلو ... في اشياء حلوه ومناسبه بالسعر والبساطة حلوه )


9- وبعدين لما تملجين .. طبعا أكيد ريلج بكون مسئول عنج بمصروف وجذي .. ولما تكونين طالبة أو مو موظفة .. لازم يعطيج مصروف ..

بس إنج تقولين له .. يلا وين مصروفي !! والا روح ادفع مكالماتي !! يلا ودني السوق ابي اغراض !! عندي عرس ابي بدله !!

بسم الله : هذا بالملجة وجذي عيل بعدين شلون !!

اوكي اهوه له حق عليج ..صح ..
بس يعني لما تروحون السوق .. وتبين شي واعجبج تبين تقايسينه ويتي بتحاسبين ..... ( اهني اكيد اهوه راح يدفع يعني معناته شرالج وصرف عليج )

وهذي طريقة اذا تبين تعرفين إذا اهوه بخيل وحزره : روحي السوق معاه ... وإذا ما دفع وطلع من عنده .. الله يعينج ..

طبعا : ما أقصد كل مره مطلعته ويشرليج لاء ..عيل شنو فايده المهر ..!!
لكن أغلب الرياييل ... ما يحب يخلي مرته تدفع لازم يدفع من باب السنع ..


10- وبالنهاية أقولج ...

سوي حفلة ملجة أحلى وايد .. وسافري شعر عسل .. وخلي عنج العرس والمصاريف ... ومليون شخص يحش فيج

( واااي طاعي نفنوفها ... ويع تسريحتها ... ماخذه عن حب !! وي شنو هالعشا !! ) .. .. وحتى تزعل يصير

( اللي ما عطيتونه بطاقة زياده .. واللي ما توجب تزعل ليش ما عزمتيني !!)

لما تردين من سفرة على ذوقج وذوقه ... ذيك الساعه سوي حفلة صغيره كأستقبال ..

والحين هابين بأستقبال اتدشين مع ريلج بنفس الوقت ..
تقعدون اشوي بعدين تطلعين معاه اهوه يروح وإنتي تردين تدخلين تسلمين على الناس وتستانسين معاهم وترقصين بعد ..

أحلى من العرس قاعدة وتحاتين وحالتج حاله .. ومرتزه في مكان .. والناس كلها تطالعج ..


ومباركين عرسا الاثنين ليلة ربيع وعين وقمره .. والله يتمم على الجميع والفال حق الباجي ... صدقوني الله خاشلكم شي زين .. وكل خيره فيها تأخيره .. وبالتوفيج للكل ..

ومع السلامه ..


 
posted by tasty_as_berry at 8:48 AM



إنيي الحين حق عزاء الرياييل ... "

طبعا حتى الرياييل ما يسلمون من العاهات في العزاء ..

المفروض يكون ياي يعزي لابس دشداشه المهم شي مناسب حتى لو بلبس الدوام او بدله ما يفرق ..

- بس في اللي ايي ريحته خايسه ودشداشته معفسه ووصخه .. يعني اهتم بروحك شوي !!
وطبعا يا حار .. يا عطرز ..

- عزاء الرياييل هالأيام صاير حق بعض الشباب أحسن من العرس..!!
تلقاه يترزز بره وعند مدخل البيت بالسبعه والثمانيه والتسعه بعد.. والغتره .. أقل شي.. قوطيين نشا مخلص على مرزامها بس..!!

عدا القواطي اللي على الغتره ككل..!!

هذا غير النظاره الشمسيه اللي ما تطيح من عينه ..

طبعا مو عشان الدموع اللي ما يبي أحد يشوفهم ويشوفه وهو يبجي..
بس عشان النظاره ماركه متعوب عليها..!!وشكله وإنت مقبل عليه من بعيد..

تقول مطرب ناشئ قاعد يصور أول أغنيه له فيديو كليب..!!
ومو ناقصه بس إلا اللي يتمخطرون يمه بالأحمر والأصفر والموف.!!
طبعا هالنوعيه اللي نتكلم عنها غالبيتها من فئة.. طعش سنه..!!

يعني اللي مو مصدقين أي مناسبه يثبتون فيها رجولتهم عقب الفناقر اللي كانو ياخذونها طول عمرهم من أخوانهم الكبار..!!
يعني عقدة النقص عند هالنوعيه صاكه الألف على مقياس الإحباط..!!

وعلى فكره..

- كل ما سبق ذكره من ترزز عالباب وعند مدخل البيت يكون في أوجه إذا كان عزاء الحريم بنفس البيت أو يمهم..!!

إهني عنده إستعداد العزاء يقعد لي الساعه 12 بالليل..!! وينسى المارينا وشرق بهالثلاث ايام ويرابط عند الباب..ويستانس إذا سمع من الشياب إنه العزاء مددوه يوم رابع..!!

- طبعا الزحمه اللي بره وقبل لا تدخل العزاء تخليك تبتون بينهم عشان تدخل..وجنك داخل لعبة المتاهه..!!
وندخل داخل العزاء..ونشوف الجانب الآخر من المعزين..

طبعا النوعيه اللي داخل من كبار العايله..والمعزين فقط..
على إعتبار يخلون مجال للناس اللي يايه تعزي.

- وتعال شوف عاد اللي ما يستحي على ويهه ويتكعكع وجنه القطو اللي براس العاير اللي ميت مو واحد من أهلهم..!!
يعني شويت إحترام لأهل الميت..

مهما كان حتى لو الناس ما تبجي ومو شرط تصير مناحه.. بس عاد مو تكعكع اشكره خبر ولا حيا ولا مستحا من الناس ومن أهل الميت القراب ..!!

- وفي شغله ثانيه بعد يسوونها المعزيين ..وهو أول ما يدخل ويسلم ويقعد..يبدأ يتلحطم ..
صار لي ساعه أدور البيت,,

وصار لي ساعه أفتر..!!ويقعد يتمنن عليهم بالييه..!!
وليش ما حطيتوا لافته هني..!!واللافته اللي هناك مو واضحه..!!

وودك تقوله..يبا إذا مغصوب ليش ياي..!!وتتذكر الجسمي لما يقول والله ما يسوى ..!!
وصج ..والله ما تسوى علينا هالييه وفوقها المنه..!!

الكلام اللي يعاتب فيه التحلطم اللي قاله أكثر من كلام العزاء والمواساة لأهل الميت..!!
يعني غير عظم اللي أجركم اللي قالها وهو داش يسلم عليهم..ما قال شي بعدها.. يمت للعزاء بصله..!!

- واللي دفش ما يعرف يتكلم ... ويرن تلفونه رنه عاليه ويرد بصوت عالي ويطول بعد ويطقها سوالف !!

- غير اللي ايي حسباله داش ديسكو .. جينز ومترصص وجيل وسوالف الهوا ضدي !!

- وفي بعض الرياييل .. ما يصدق على الله يلقى بو فلان وإلا علان وزير والا مدير والا ذو شأن .. يبيه بكلمة راس .. وشخص مصلحة وواسطه .. يعني مو وقته !!


طبعا أتوقع نفس فناتق الحريم مثل ما ذكرت بإيميل ( الحريم بالعزاء) ممكن تصير مع الرياييل .. اتمنى كل شخص يحاول يسيطر على عمره ويراعي ويثمن كلامه وحركاته .. ولازم يعرف إن بالحياة لازم يوجب الناس علشان يوجبونه ويوقفون معاه .. الله لا إييب الزعل والحزن .. لكن كل من له يومه .. وكل من مره عليه عزا .. والله يرحمنا جميعا برحمته .. آسفه على الاطاله .. ويعطيكم العافية .. تحياتي لكم ..

إلى اللقاء ...
 
posted by tasty_as_berry at 8:08 AM


السلام عليكم ورحمة الله وبركاته ،،

عساكم بخير جميعا ... آنا اليوم بتكلم بموضوع قعدت أفكر شنو شنو .. فقررت إني اكتب عن العزاء ، طبعا كلكم عارفين شنو العزاء هو يحصل بعد وفاة شخص بحيث يذهب الناس لبيت المتوفى ويقدمون أحر التعازي والأسى لفقيدهم المرحوم ومدة هذا العزاء هي 3 أيام .

وبمناسبة رمضان سبحانه الله لاحظت إن أعداد المتوفين وايد وايد وهذا نعمه من الله سبحانه بهذا الشهر الفضيل انه ربي عطاهم المنية في هذا الشهر الكريم ..

طبعا العزاء مناسبة حزينة خصوصا لأهل المتوفى .. هالعادة جميع انحاء العالم يقومون فيها ... وهي نوع من توجيب الناس علشان الناس يوجبونك .. ولو تلاحظون إن حتى اغلب الناس المتخاصمين يعزون بعض وينسون الزعل .. ويوقفون إلى جانبهم في هاذي المحنة .. وطبعا على الناس المعزين مواساتهم وتطييب خاطرهم بالكلمات المنتقاه اللي المفروض الشخص يثمنها قبل لا يقولها .. لان الشخص بقمة الحزن في هذا الوقت .

والعزاء له آدابه .. عند الحريم مثلا.. لازم تكون لابسة عبايه سوده وإذا كانت مو متحجبة هم عبايه ولامه شعرها ... وطبعا بما إنها مو رايحة عرس أو حفلة .. لازم ما تكون حاطه مكياج ولا لابسه إكسسوارات..

بس للأسف اللي صاير الحين .. إن بعض الحريم ما يقدرون ولا يعرفون السنع .. وجنها مغصوب اتيي اتعزي ..

يعني مثلا ...

- تكون يايه وحاطه مكياج .. بدون إحساس .. وإذا كلش يعني بتموت إذا ما حطت .. يعني مكياج خفيف !! واللي مصبغة الأظافر !! يعني لازم يراعون أهل البيت ..

- هذا غير العلج اللي يطقطق لا وتسوي تفافيخ بعد .. وإلا اللي لابسه تكرمون ذيك الشحاطه اللي ما بقا لمعه ما بقا زري إلا فيها جنها سندريلا !! وطالعه من تحت العبايه تبرق لا والعبايه مقصقصه بعد ..

- يا فتيات والسيدات المحترمات .. لما تدشين عزا يا تسكرين التلفون يا تحطين نغمه منخفضة يا صامت مره وحده .. يعني مو شي الناس زعلانين وحالتهم حاله ويبجون .. وإنتي تلفونج يرن وبصوت عالي لا وحاطه موسيقى رقص شرقي .. !!لا وترد على التلفون بصراخ الكل يسمعها !! كـــــلش مو شي ..

- اوكي إنتي مو متحجبة وما تحبين العبايه.. ما قلنا لبسيها على طول بس حق العزاء وترى محد كاشخ أصلا .. يعني لما تركبين السيارة كيفج فصخيها ..مو توج حتى ما طلعتي من الباب إلا وفصختيها ولابستلج ذاك اللون الشقاقي !! .. وإذا يمه خايفه على بريستيجج .. !!
ما راح يحوشج إلا انهم ينقدون عليج ويعيبون .. وترى حتى لو أحد شافج طالعه من البيت بقول والله هالبنت راكزه وموجبه الناس لا وأبشرج يمكن يخطبونج بعد .. فخلي عنج الدلع ..

- وإلا لما اتييج وحده .. تعزي وتستلم الأم حجي يعور القلب والحجي اللي يبجي أي ليش .. اهيه لازم تهدا وتسمع الحجي اللي يواسي ويطيب الخاطر مو يسم البدن !!

- ولا الحريم المنافقات العيايره ... أول ما تدش تسوي مناحه يمكن يبجي بجي اكثر أهل المتوفي ... ولما تطلع وإلا تقعد بعيد تصير جنها البخت ما فيها شي.. بس جدام أهل المتوفي ..!!

- الغــــــثا .. لما يكون المتوفي عن طريق حادث .. وتيي مرأه ملقوفة كريهة .. ( الحادث شلون صار ؟ .. ومنو كان معاه ؟؟.. ولا يكون أحد مات بعد ؟.. ويــه إنزين واهوه ليش دايس ؟؟.. وليش مو رابط حزام الأمان ؟؟.. ويــه لا يكون أحد تعور بعد بالحادث ؟؟.. اهوه مات واللي ادعمه مات بعد ؟؟.. والغلط على منو ؟؟ )
أعــــــوذ باللـــــــه ..ســوسه .. سوسه..

- والمواقف .. وإلا إييون ثنتين وإلا شله .. سبحان الله إتهل الذكريات والمواقف المضحكة إي وقته .. ويضحكون بصوت عالي .. إي عيب !!

- يا شين المقراظه .. هاذي عندها متعه بالعزاء تمشي وتحش وتمر على هاذي وعلى هاذي تتقصى الأخبار .. !! يا ســــاتر..

- وإلا اللي يعزون ما يروحون مكان العزا .. يروحون حق القريبه منهم ..هو ليش انحروح واحنا ما انعرف احد ..!! ما يبون يتكلفون .. العزاء في أجر .. صج إن ثقيل إستغفر الله .. بس أجر لج ..

والى اللقاء .. وانتظروني .. بالجزء الثاني اللي اهو عـــزاء الرياييل ...

 
posted by tasty_as_berry at 7:55 AM


السلام عليكم ورحمة الله وبركاته ،،،

شلونكم ..؟؟ شخباركم ..؟؟ إنشاء الله رمضان خفيف عليكم هالسنة ... وإنشاء الله شهر الخير والبركة علينا أجمعين ...

عندي لكم موضوع صراحة يغثني وايد .. ويرفع ضغطي .. اللي اهو لما اركب سيارتي وانطلق بالشارع .. تمر علي بلاوي تسبب لي أزمة نفسيه ..

الواحد لما يسوق سيارته تكون وسيله وضرورة للتنقل .. مو مهمة انتحارية .. ولا أداة يقتل فيها اللي حوالي .. بدون أدنى تحمل للمسؤولية ..

ليش السرعة ليش !! .. تحرق قلب أمك .. وتموت ناس .. وتأذي روحك .. وتتحسف طول عمرك ..!!
الطفاقه ( الإستهتار والرعونة).. ما زيـــــنه يا ولدي .. والشارع ما شــــارع أبوك …

آنا اللي اعرفه انه أسرع حارة اهيه اليسار .. واللي يبي يمشي بطيء بفتح السايد للي وراه .. والسرعة القصوى عندنا بالكويت في الخط السريع اهي 120 ( طبعا وايد ما يعترفون في هالسرعة ) .

يعني .. اللي ما يمشي في أقصى اليسار 120 لازم يأخذ يمين يفتح للي وراه .. لان الشارع مو على كيفه وفي ناس مستعيله .. والسالفة مو سالفة عناد !!
بس أنا أقولكم متى تصير سالفة العناد ..!!

لما إيي واحد غبي والشارع أصلا زحمة والسيايير ورا بعض ويترك (يعني وخر ) جنه مينون !! .. يعني شنو مثلا السيايير كلها تتقلقص ( تتزاحم ) !! بس علشان حظرته يطوف .. اهني لازم الواحد يعانده ويحقره بعد.

وإلا الثاني إيي دايس وحالته حاله أقول اوكي بفتحله مجال لما اقدر ... ويشب العالي !! انزيـــــن ..يعني شنو اركب على السيايير وإلا اذبح نفسي !! إنشاء الله ما مريت .. خلك جذي متى ما قدرت وخرت افتحلك الطريج .

يا شين اللي توهم سايقين وكاشخين بليتهم العالي ..

لا لا وفي ناس الحمد الله معقدين ..!! طول الوقت قاعدين باليمين بس آخذ يسار إيي يأخذ يسار ويدوس يبيني اوخر !! شنو عقده نفسيه وإلا سبـــاق ..

والداهـــــــــية لما إييون اثنين هتليه (صايعين) يتسابقون .. استحوا على ويوهكم .. في عوايل وياهال وناس مالها ذنب ..

واللي يبتون (يتخطى السيايير).. وكذا مره جدام عيني دايس يبتون وبغا يدعم !! انزين لـــــيش !! والمشكلة ما وراه شي ولا مستعيل .. ولما يذبح الناس .. ويرفعون علي قضيه ، أهله اييون يتبجبجون .. لاومو عاجبهم بعد !!

آل إيه … حتى ولدنا بعد انكسرت إيده ما ادري رقبته !! شر البلية ما يضحك .. انزين ولدكم ذبح أوادم لو فيكم خير روحوا عوزوا الناس مو يايين .. لا ويطرشون ناس واسطة خلوهم يتنازلون عن القضية ..

والله مره إنصدمت !! .. يايني واحد دايس ووراه واحد دايس بعد .. أنا ييت بفتح المجال وإلا راعي السيارة الثانية خذا يمين .. إنزين أنا وين أروح ..تميت مكاني .. أثنينهم دايسين إلا الغبي اللي وراي يأخذ السيفتي (حارة الأمان) اللي على يساري .. ويقعدون يتسابقون .. وآنا بالوسط .. آنا قلت خلاص رحت فيــــــها .. يعني بالذمة هاذول رياييل !!

يـــــــاو … ولا لما اييج ذاك الوانيت نيسان .. يا ويلي ويلاه وما فتحتيله !! … مسكينة .. ماله شغل عادي نايم عليج (يميل بالسيارة يبي يودرج ) وإلا بريك بالويه .. وإلا ماشي على السيفتي (حارة الأمان) يشلخج بالحصم يكسر جاماتج ..عـــــاديه السالفة .. عاد هذا ما يتفاهم .. هذا لا تفكرين تقولين هـيي وإلا تأشرين .. رحتي فيها .

وفي منظر ما اتحمله .. لما إيي هندي شاد حيله يترك .. نــــــعم !! .. والله هالهنود طالت وتشمخت .. يمشي جنه شيخ .. لا ويزف بعد !!

طبعا الزحمة والمعاناة في الصبح وقت الدوامات .. حتى البحر زحمة !! شالسالفة الأوادم مجربين جميع الطرق ... واللي يمشون على السيفتي . أي إنثبروا حالكم حال الأوادم !! لا ما يقدورون .. ومن لقطوا دوريه إندعسوا خخخخخ

أي شنو نسيت بعد .. إي إي ..

الحريـــــــم .. قطيعه .. ابو اللعانه .. أنا بنت اوكي بس والله إني طيبه وأطوف .. بس البنات جنه قاعدين في حرب .. جنه تحتر من الثانية ..المشكلة بنت ما تطوف بنت .. بس لو ريال اي عاد غير .. ليش يعني ؟

والهيـــــلق اللي يسولفون معطلين السايد .. واللي يتحرشون بالبنات معطلين السايد .. هـــاذول قمة التفاهة .. يقعدون يسوون حركات جدام الناس جنهم شواذي عيب عيب ..

واكره ما عندي عديمين الأحســــاس .. يصفط سيارته على كيف ابوه !! مو متقيد بالخطوط بالعرض بالطول المهم صفط ونزل بس ماله شغل ..

ولا اللي عنده ذاك الموتر .. والمفروض يكون جنتل وشيك .. والحمد الله ذيك الصحة والعافيه .. يروح يصفط في موقف المعـــاقين !! .. حرام وعيب بعد .. خل اشوي عندك ذرابه وسنع ..بدال لا تقول الحمد الله على النعمة !!

وفي ناس استغفر الله مخهم مصين !! ريال اشكبره طايف الأشارة الحمرة..
حتى الحريم بعد !! .. لا وما يصبرون الإشارة تشب .. جذي نقص لا حول الله ولا قوة ..

طبعا الحزام ترى شي ظروري .. وياما المرور تكلم عنه .. بس لا حياة لمن تنادي .. أنا بداية ما كنت احبه بس مع الوقت تعودت عليه .. جربوها مني والله .. ومع الوقت قمت أحسه شي حضاري ..

ويا جماعة ترى الطريج له آدابه .. يعني عيب ترفع ريلك صوب السكان وتأرفنا بأصابعك.... عيب تتفل من الدريشه ( تبصق بالشارع) .... والا تقعد تنقف ( أي تضع الأصبع في الأنف وتبحث عن الذهب) عيب .. عيب .. عيب .

وســـــلامتكم ..

أي صج إلا بقول ليش اللي عندهم فـــــــراري .. إيي عند البنت يخفف وما يطالع !! لاء انتي طالعيني .. ولما يحس إن محد عبره يدوس وحالته حاله .. شنو من عمره ما تبخر !! خخخخ
ويــــــه بس خلاص تحلطمت وخلصت .. تعبت ..

إلى اللقاء .. في تحلطومه جديدة
..
 
Wednesday, January 12, 2005
posted by tasty_as_berry at 10:41 AM

هل تعلمون.....

أخر اكتشافات الفراولة





بالاظافة الى فوائدها الصحية العديدة تعتبر الفراولة منشطا جيدا للعلاقة الزوجية بسبب غناها بعنصر الزنك الذي يؤكد الباحثون تأثيره القوي على تلك الفاعلية . كما ان الفراولة غنية بفيتامين E الذي ينشط جريان الدم ، وبالتالي تدفقه الى الاعضاء التناسلية فتساعد على اتمام العلاقة الزوجية بمزيد من النجاح والمتعة .



في عرس دائم..





لتكن ايامك أيامك جميلة دائما كأيام زفافك تمام.

كافئي نفسك بطقم من الملابس الداخليه الجميلة لتضفي البهجة على حياتكما الزوجية.



نصيحة للرجل





تتذرع 19% من الزوجات بالصداع ، عند عدم رغبتهن باقامة العلاقة الزوجية لأسباب صحية أو قد تكون اشارة من الزوجة نتيجة لغضبها من زوجها بسبب موقف معين حدث بينهما . انها حجة قديمة تتبعها النساء حفاظا على مشاعر الزوج.

لذا فهي تتوسم من زوجها التفهم الكامل لظرفها وعدم احراجها وذلك باعطائها الوقت الكافي للراحة لحل المشكلة .



لها








لا شي يفرح زوجتك اكثر من هدية جميلة تعبر عن اهتمامك بها .



له






اقتني لزوجك هدية جميلة من حين لاخر ، فهذه اللفتة الجميلة منك تعزز اواصر المحبة بينكما .



قوة الخزامي

(LAVENDER
)




احسست بنوع من التوتر النفسي . استعيني بخلاصات الزيوت الاساسية ذات التأثير الفوري .

جربي اضافة قطرتين من خلاصة اللافندر الى وعاء صغير به ماء دافيء وضعيه في غرفة الاستقبال .

ليعطر أريجه فراغ الغرفة،ستشعرين فورا بالراحة والاسترخاء.

كما تستطيعين ان تنعمي بحمام دافيء لك ولزوجك به بضع قطرات من زيت الافندر لزاله الاكتئاب وتشنج العضلات وارتفاع الضغط والزكام وليساعد على الاسترخاء.

حاولي ازاله آلام رأس زوجك بتدليكه بهذا الزيت حتى ينعم بالراحه بواسطة يديك .



فوائد الشاي الأخضر







الشاي الأخضر يمنع رائحة الفم

الشاي الأخضر يحمي الكبد من الالتهاب

الشاي الأخضر يساعد في محاربة التهاب المفاصل


الشاي الأخضر يقوي المناعة

الشاي الأخضر يحمي من مرض الزهايمر


الشاي الأخضر يساعد في محاربة الحساسية

الشاي الأخضر يساعد على حرق الدهون


الشاي الأخضر يحمي القلب من الأمراض

الشاي الأخضر يساعد في تخفيض ضغط الدم


الشاي الأخضر يساعد على الوقاية من التسمم الغذائي



التوت

(BERRY
)




المشروبات الرمضانية كثير الفائدة..يقلل العطش ويزيل حموضة المعدة ويخفض الحرارة..





الى اللقاء :)...

 
posted by tasty_as_berry at 10:24 AM


سواء ريال او مرأه سألوا نفسكم هالاسئله وردوا بصراحه بدون مكابره :

هل انا محظوظ ؟ الشي اللي ابيه احصله غالبا ؟ والامور دايما لصالحي ؟

هل انا قوي الشخصيه ؟ واقدر اخذ حقي ؟ ومتحدث بارع واعرف كيف اتصرف؟ وثقتي بنفسي قويه ؟

هل انا طماع ؟ الفلوس دايما بالمقدمه ؟ ودايما القليل مايكون كافي ووافي ؟

هل انا حقود ؟ لا انسى واتمنى السوء للغير بس لانهم افضل مني ؟

هل اعترف بالغلط ؟ ممكن ان اقول ( آسف) ؟ هل اعتقد انني دائما على حق ؟

هل انا فاشل ؟ لدي هدف ؟ حققت بالحياة ما أريد ولو جزء بسيط ؟ لا احاول الوصول للأفضل ؟

هل اجرح مشاعر الغير ؟ اثمن كلمتي ؟ احاسب تصرفاتي ؟ اراعي ظروفهم ؟

هل انا عاطفي ؟ رومانسي ؟ حنون ؟ دائما افكر في اللحظات السعيده في حياتي ؟

هل انا اناني ؟ دايما كلمتي ورايي اللي يمشي ؟ مالي شغل بالناس المهم مصلحتي ؟

هل انا خدوم ؟ ممكن اني انفع الناس ؟ احذر وانصح ؟ والا ما اخدم الا اللي عندي مصلحه منه ؟

هل انا بخيل ؟ لازم ابدي من باب الذوق واعزم اللي معاي ؟ ممكن اتبرع ؟ ما اخلي على نفسي
قاصر ؟

هل انا متكبر ومغرور ؟ دايما انا احلى واحد واحسن واحد ؟ ومستحيل احد ينتقدني ؟ و كل الناس محتره مني ؟

هل انا ذكي ؟ بحيث افهم الامور واستوعبها ؟ لا يمكن استغفالي او النصب علي ؟

هل انا عبيط ؟ دايما اسأل اسئله تافهه ؟ لما احد يسألني اتوهق ما اعرف شقول وابلم ؟

هل انا محبوب ؟ الناس تحب تسولف معاي ؟ تسأل عني ؟ والا يتهربون مني؟

هل انا اجتماعي ؟ احب الحفلات والعزايم واليمعات ؟ ممكن اني اشارك في مناقشه ؟ اتعرف واصادق واختلط بالناس ؟

هل انا حسود وغيور ؟ اريد ما للغير لي واتمنى زوالها منهم ؟ دائما الاحظ ما عند الغير ليس عندي واحاول الحصول على ما يملكون بالذات ؟

هل انا طيب ؟ بحيث يستغلني الغير ؟ ويعتبرونه غباء وسذاجه مني ؟ احاول ارضي الجميع ؟

هل انا كريم ؟ اعطي ولا اطلب مقابل ؟ تتقاسم ما لديك حتى لو كان القليل ؟

هل انا عصبي ؟ دايما ما تعجبني الامور ؟ ويتعكر مزاجي لاتفه الاسباب ؟

هل انا مرح ؟ فعلا اسعد وأضحك اللي حوالي ؟ استطيع ان اشيل حزن وهموم الناس ؟

هل اتسائل انا جميل ؟ حلو ؟ مملوح ؟ عادي ؟ جيكر ؟

هل علاقتي بأهلي قويه ؟ اقعد معاهم ؟ اشكيلهم ؟ اطلب المساعده منهم ؟

هل انا دعله ؟ كلا ابي واذا ما سويتوا لي بزعل ؟ كلا قاعد بروحي ؟ كلا مالي خلق ؟

هل انا صبور ؟ تحملت اشياء وايد بحياتي ؟ اتحمل الانتظار ؟ ثابت عند الشدايد ؟

هل انا عندي قلب ؟ جربت الحب وفشلت ؟ وودي الاقي نصفي الثاني واعيش معاه باقي العمر ؟ والا
طوفه ؟

هل انا جذاب ؟ استغلالي ؟ حقير ؟ قذر ؟ منحط ؟

هل انا زوجه او زوج ناجح في حياتي الزوجيه ؟ تجاه شريك الحياة ؟ الابناء ؟ البيت ؟

هل انا خواف ؟ اذا شفت هوشه انحاش حتى ما اشوف ؟ من الظلمه ؟ من افلام الرعب ؟

هل انا تافه ؟ اسوي شي وادري غلط ماكو منه فايده بس اظل اسويه ؟ اروح للغلط بنفسي واحاول ابرر غلطي باي عذر؟ ضيعت اشياء بحياتي بدون لا احسب حساب أي شي ؟

هل انا مسكين ؟ مأكول حقي ؟ ودايما اطيح بمواقف خايسه ؟ والمشاكل اتييني لي عندي ؟

هل قريت هذا الايميل وحسيت ان الاسئله سخيفه ولا فكرت في بعضها بحياتك لانك توب ؟؟ قريت بعض الاسئله وحزت بخاطرك ؟؟

اشوفكم على خير : ) الى اللقاء …
 
posted by tasty_as_berry at 10:03 AM


هل الرجل أناني ؟؟؟ حسنا لنرى ماذا يفعل بالحياة الزوجية :) ...


* اذا رجع البيت والغدا مو زاهب راح يعصب ويتنرفز وما ادري شنو ...

لكن ...

شنو اذا مثلا سويتي الغدا وانتي تعبانه عليه ورجع وقال والله الربع بالدوانيه اغصبوني آكل عندهم.. انتي اهني شنو مطلوب منج :/ تتقبلين برحابه صدر .

------------------

* اذا تعبث بشي بالبيت وخربه عادي فدوه عن عمره ..

لكن ...

انتي خربي شي بالبيت تقوم يوم القيامة :s

--------------

* اذا كان مواعدج وكشت فيج والا طلع عذر.. عـــــــــــــــاديه السالفه ..

لكن ...

انتي اذا كنتي مضطره وأجلتي الطلعه ، صرتي انانيه وما تحبينه ويطنقر وحالته حاله :/.

-----------------

* اذا عفس الدار وطلع ما همه انتي الخدامه لازم اتنظفين من وراه .

لكن ...

اذا انتي عفستي الدار تبين تدورين على شغله يعيب لما يشبع ( جنا اهوه اللي بنظف).

-------------------

* اذا داس بالسياره وصورته الكاميرا عادي كان مستعيل.

لكن ...

اذا انتي صورتج الكاميرا يا ويلج ويلاه ، يحمق ويعصب شنو هذا وليش تدوسين ومن وين لنا فلوس المخالفات .

------------------

* اذا اهوه بلع وطلعتله ذيك الكرشه ، هاهااااي اهوه ريال من قده :)

لكن ...

اذا انتي حملتي وولدتي وحالتج كسيفه وصرتي دبدوبه التخينه والله لا يكرهج بعمرج ..

----------------

* اذا اهوه دخل نادي ودفع ذاك الاشتراك وشراله ذيك العده ( الحديد) وذيك البروتينات كل نوع اغلى من الثاني وقطهم ما استخدمهم :) ما هوه سيد الرجاله يعمل اللي نفسو فيه .

لكن ...

يعني مثلا انتي ماله داعي تشتركين بنادي ليش!! والا ليش يعني هالاسراف وكل هالكريمات وهالصالونات هاااا !!!

------------------

* اذا اهوه ما عرف شغله والا غلط والا نساها والا شي ... اخخ شلون جذي والله راحت علي .. ها ها ها :s

لكن ...

اذا انتي نسيتي والا ما عرفتي ... اشفيج انتي اشفيج .... غبيه !!!طالع هذي ما اتعرف !!

-----------------

* لما يشوف التلفزيون على كيفه القناة اللي يبي لحد يكلمه :/

لكن ...

لما انتي تبين تشوفين ... يعطيج ذيك النظره @@ ويقفل القنوات :s

------------------

* اذا اهوه استمرض لو بس منشول يسوي فلم وانا بموت ولا تهديني وسويلي وحطيلي وجابليني

لكن ...

انتي اذا كنتي مريضه وتعبانه يقولج عن الدلع تحركي قومي علشان يخف المرض واكلي بندول وتصيرين زينه .

------------------

* اهوه يطلع مع ربعه ويقز كل مكان ما بقا فلم ما بقا كافي ولا مطعم الا راحله حتى بمجله ليالينا مصور :)

لكن ...

انتي قوليله طلعني كل ما كو مكان كلا وين اوديج !! ... :/

------------------

* اهوه يجابل النت لي الصبح شغل والا قاعد يكلم رفيجه بأمريكا واهوه طايحله مغازل :s

لكن ...

انتي قعدي اشويه تبين تشوفين شغله يقعد على راسج يلا ما عندنا حريم تدخل النت :/



وفي الختام اقول الله يهديهم ويكملهم بالعقل :) انياهاهاااااااااااا



اوفواااا .... ومغسي بكو ....
 
posted by tasty_as_berry at 9:07 AM





السلام عليكم ،،،

موضوعي اللي راح اتكلم عنه هالمره اهوه ( الخطوبه ) يعني لما ايي الريال مع امه يخطبون البنت ، طبعا الخطبه
انواع :
*
اما عن طريق اهل :
يعني يصير حق البنت سواء من قريب من بعيد ، او أحد من الاهل او الاصدقاء مادحين البنت (طبعا ممكن اذا عندج اهل سنعين يبون لج الخير ، او اذا كانوا اهلكم وايد )
*
او عن طريق حب :
يعني البنت تعرف الولد ومتفقين على هالشي ( عاد انتي وحظج يا اهلج يجكونج وايي يخطبج يا يحس على دمه وايي بسرعه )
*
او عن طريق خطابه :
يعني اهل البنت يتفقون معاها تشوف ريال مناسب حق بنتهم او العكس اهل الريال يدورون حق ولدهم ، او انه الخطابه تكون ماخذه مواصفات البنت ورقمها من ناس وتشوفلها ريل ( طبعا في ناس يشتغلون بذمه ويبون يوفقون راسين بالحلال والبعض لاء ، بعد ما اتم الزيجه تاخذ مبلغ وقدره على حسب من المهر وفي البعض ما ياخذون وفي يكشتون فيها وما يعطونها ) طبعا في بعضهم بدعوا اللي تاخذ على كل الف اميه من المهر ، واللي تاخذ للبدو سعر والحظر سعر ، واللي لازم تملين استماره بالاول .
*
وفي طريقه حديثه اهيه عن طريق النت :
هاذي عاد شلون طريقتها ما ادري بس اهيه تعتبر عن طريق الحب لانهم ما ردهم بكلمون بعض وبشوفون بعض ( وصارت حق ناس )
-----
طبعا انتو كلكم عارفين انه بالكويت ماكو فتره خطوبه مثل اخوانه المصريين احنا يخطبج يشوفج وتشوفينه يسألج وتسألينه واذا في نصيب تحددون الملجه وجذي يعني فتره التعارف اهيه بالملجه ( يعني صرتي مرته على سنه الله ورسوله) واهني عاد يتم التعارف عن قريب للتصرفات والكلام والاطباع فتكتشفين ان شخص لا يمكن التأقلم معاه لان لا يوجد توافق كلش اهني طبعا يحقلج انج تفجين الملجه ، سواء كنتي بكر او لاء تعتبرين مطلقه ، واهني تكمن المشكله !!
نظرة المجتمع للمطلقه ، ليش البنت ما تقعد مع الريال وتعرفه ؟ ليش ما تسولف معاه اكثر ؟ ليش البنت تستعيل ؟
طبعا الوقت اختلف عن قبل الحين صار تفتح اكثر ،
وهذا اللي المفروض يصير ، ان البنت بعد ما تشوفه ويشوفها ويصير في تقبل للأثنين تبدي مرحله التعارف :
- يزورهم البيت تقعد معاه بحضور الاهل على صوب ياخذون
راحتهم بدون خلوه طبعا محد يرضاها لبنته ، بدون تدخل احد بالحديث ، بحيث يتكرر اللقاء ويسولفون اكثر ويشوفون بعض عدل وياخذون على بعض طبعا ما قصدت اييهم وايد يعني مرتين جذي .
-
او انهم يتفقون يتكلمون مع البعض بالتلفون ويعرفون بعض اكثر وياخذون على بعض ، كل واحد يسأل الثاني اللي يبي .
-
او ان الاهل الاثنين يتفقون يطلعون بره طلعه عائليه بحيث الاثنين يكونون تحت انظار بعض ( هذي نادره)
طبعا في ناس يرفضون هالفكره نهائيا بحكم عيب وما يسمح
( وهذا الشي يظلم البنت )
-----

طبعا الحين نتكلم عن عاهات الخطاطيب
، طبعا انا خابره اللي يبي يخطب لازم يكون عارف معلومات كفايه عن البنت وتكون بالمواصفات اللي يبيها ، لكن للأسف ماكو تقدير لمشاعر البنت ( كأنها سلعه ) يعني مثلا :
-
اييون ويخطبون ويستانسون عليها والريال يقعد يسولف معاها وحتى يدخل في تفاصيل
( اخر شي لا والله البنت صغيره عليه !!!!
يعني لو قايلين ماكو نصيب وايد ارحم ....…
-
اييون يخطبون ويدرون ان البنت طالبه ويدخل الولد يشوفها وجذي
( اخر شي لا والله ولدنا يبي موظفه !!!!
ييييييه شالسالفه !!!
-
والا اييون ويقعدون وكل شي ويتمقلوون ويطولون السالفه
( اخر شي لا والله بنتكم سمره وولدنا يبي بيضه والا العكس !!!
ولييييييه .... شنو البنت طرطنقيه ...
اوكي يعني لما يكونون مستحيين يقولون السبب ، لا يقولون شي بس ماكو نصيب وبس .

والمشكله والكارثه الكبرى .....………………

- لما يطلع جيكر ويبي حلوه .
- والا خال يبي بييييييضه .
- والا متين يبي رشيقه .
- والا ماكو شهاده وميح طموح يبي وحده مهندسه والا دكتوره .
- والا حافي منتف يبي وحده عندها فلوس .
- والا شكبره صك 38 والا 35 يبي من 21 لي 25
( عيل ام 30 و31 ما ادري منو ياخذها )
* يعني صراحه بدعوا لا وتقولين يلا متين ميخالف اسويله
رجيم اشوفه يمكن يعجبني ، ولما يشوفج يقول لا ما اعجبتني وانتي عنده ملكه جمال
( ادري بتنغثين ).
*
والا يدقون ويقولون شنو يعني شروط البنت والمواصفات اللي تبيها من الولد
( ويقولون والله البنت ما تبي شي الا يكون ريال مصلي مجابله ربه ...)
وايي الولد يقول شنو يعني شنو اصلي يعني انا كافر مو مسلم !!! أي شـــــــــــي
--->
احنا ما نصير نفس الهنود نروح نخطب احسن لنا ( بس اهمه اييبون المهر ) خخخخ

في رياييل فعلا يحاسبون على هالشغله يكون ذكي ومتفهم
لهالشي فيلمح حق البنت من البدايه يعني انه اختلفوا على شي معين بطريقه حلوه ( بحيث البنت تتوقع الرد)

وفي رياييل يحاولون يشوفون البنت من بعيد ، يعني بدال لا ايي لبيتهم وما تعجبه
( بدون لا البنت تدري طبعا)

طبعا ما انكر ان حتى البنات يتشرطون بعد وعلى اشياء تافهه يعني :
- لا ما ابي ساكن بالمنطقه الفلانيه ..... ما احب .
- ابي يحطلي دور كامل .
- ابي عرس وشهر عسل لا وتحدد المهر الفلاني
( والله عيب )
- حتى البنت بعد في تكون جيكره واييها حلو مو عاجبها وتتشرط .
- او انها تعلق الناس اول أي بعدين لا ما ابيه .

وبالنهايه اقول كل شي نصيب واللي كاتبلج بصير ، لكن دايما اقول احنا نسوي اللي علينا ونتوكل على الله بس ما نتواكل وفي فرق ( يعني مو نعتمد على شي واحنا ما طلبنه وسعينه اليه ) واتمنى التوفيج للجميع .

 
Monday, January 10, 2005
posted by tasty_as_berry at 1:02 PM

عزيزتي الزوجة


تعتقدين ان زوجج يخونج وان
العلاقه بينج وبينه صارت بارده ، يمكن تكون ردة فعل الزوجه أنواع اما انها لا تتحمل
(ملت من تصرفاته) وتترك الزوج ولا تغفرله ، او انها (قويه) لا تستلم بسهوله وتحاول قد الامكان انها تحتفظ فيه ، او انها (ضعيفه) تخليه على كيفه وما بيدها حيله ، اوانها (لا تبالي) تقول بالطقاق ما رده بيرجعلي انا ، او انها ( تنتقم)
فتبادله بنفس الاسلوب .

المرأه مو كل يوم لها زوج ، فلازم اتحافظ عليه واتييبه صوبها كثر ما تقدر وتأثر عليه وتكون قريبه منه لانه البعيد عن العين بعيد عن القلب ،ادري لكل شي حدود وترى مافي انسان كامل.



عاد شلون اتييبينه صوبج وتأثرين فيه انا اقولج :

-

لا تكونين كثيره المتطلبات ومسرفه راعي ظروفكم الماديه كثر ما تقدرين لا تضغطين عليه من
(قروض ، سلف ،
ديون) اهوه ريلج وحبيبج وابو عيالج خافي عليه ولا تكونين طماعه لان هالشي راح يأثر ويطلع عليج وعلى عيالج.

مثلا:
ابي السياره الفلانيه - سفرني – عندي عرس ابي بدله غاليه.

-الزوج والريال عموما كالطفل يحتاج حق اهتمام ورعايه سويه يا دهينه لا تنكتين ( بس لا تصيرين دعله زياده عن
اللزوم )
يعني :
* اذا شفتي عليه شي يديد لاحظيه وسألي من وين وجم سعره.
* فاجئي بعطر ببلوزه بشي يحبه ونفس ذوقه .
* أكليه وسويله الاكل اللي يحبه ( حتى لو مو متعوده تطبخين طبخي راح يستانس .
* جهزي البانيو وحطيله زيوت عطريه مهدئه وبنفس الوقت جهزي ملابسه والفوطه ويفضل تسبحينه بعد : ) حتى اذنه انتي نظفيها بعود قطن اذون
( انصحج في هالشي لان نادر أي وحده تسويه فراح يكون شي مميز

- حاولي كثر ما تقدرين تكونين حلوه بعيونه احلى واحلى من اول ما شافج وارتبط فيج ، لا تهملين عمرج وتقولين اهوه شافني في كل الحالات وانا مرته خلاص ، بالعكس ابهري كثر ما تقدرين بشكلج .

يعني :
* حافظي على جسمج ( رجيم – رياضه) ولونج ( سوي تان اذا كان يحب هاللون – كريمات حمايه وعنايه) ونظافتج ( شكلا ورائحه ومحتوى أي كل شي يقظي على الروائح ).
* حاولي تصبغين شعرج بين فتره وفتره على الموضه وتقصين القصه الحلوه عليج ( طبعا لا تهولين بعمرج استشيري ناس ذو خبره ) وظروري تسوينه بين فتره وفتره مو بس اول ايام بعدين عادي عندج .
* كوني ذويقه في لبسج وألوانج بحيث يلاحظ يسألج متى شريتي هاللبس حلو ولايق عليج ( طبعا مو كل ما كان سعر اللبس غالي كل ما كان حلو لا ابدا الذوق والترتيب اهم شي) .
* طبعا ما تنسين شكلج داخل البيت مو بس بره يعني شغل دراريع مهتمله وباجامات مرقعه كل قطعه غير الثانيه عيب ، تدلعي خو انتي في بيتج ومتعي ريلج بالنظر يعني ( شورتات ، ثريكوارتر ، بجامه زقرتيه ، يعني شغل دلع
* اهتمي بأظافرج بديكير ومنيكير فرنسي وصبغيهم بين فتره وفتره خلي يحس بأنوثتج ونعومتج .
* حطي مكياج حلوو( لان في رياييل يحبونه خصوصا لما يكون متقن) او ناعم كلش اذا كان ريلج ما يحب المكياج او خليج على طبيعتج خصوصا لما تكونين ماشاء الله حلوه وملامحج روعه ما يحياي مكياج .
* يعني طبعا ماله داعي اتكلم عن ازاله الشعر في المناطق الخايسه بليز.

- كوني ناجحه في حياتج ولا تكونين كسوله وتعتمدين على زوجج ولا تستسلمين خصوصا لما تكونين نشيطه وعندج افكار وشاطره في مهن وايد ( بيني حق ريلج انج طموحه وتقدرين تسوين اشياء وايد واهوه راح يكون فخور فيج

مثلا :
* سوي مشروع في أي شي تحبينه وراح ينجح معاج
* دشي دورات تستفيدين منها ( مكياج – تداول الاسهم – انجليزي.
* خلي يلاحظ تربيتج حق اعياله ومتابعتج لهم في كل شي من احتياجات ماديه ومعنويه .

-حبي اهله سواء زينين والا لاء معاج وبلعيهم حتى لو غصب كثر ما تقدرين علشان ريلج ولا تخلين احد يمسك عليج الزله وطوفي وصيري انتي الاحسن ( الله راح يوفقج بدنيتج ويطرح فيج البركه

يعني :
* لا تتدخلين في شي بين زوجج واخوانه او امه وابوه .
* اذا في شي ما اعجبج التزمي بالصمت ولا تعلقين .
* اذا حسيتي ان مشاكل وايد بتصير حاولي تبتعدين شوي تفاديا للمشاحنات .

-لما يكون مريض لا تخلينه لان الرياييل لما يمرضون حالتهم حاله صيري ممرضه ليما يطيب .

يعني :

* ييبي الاكل لي عنده ووكلي .
* دلكيه ودهني وحتى شربيه الدوا .

- لازم تلاحظين ريلج وتدرسين رغباته ومميزاته وعيوبه وشخصيته وشنو يحب وشنو يكره ومتى يكون معصب ومتى لاء .

يعني :

* يعني تعرفين متى بالضبط اتيين تسولفين معاه .
* اذا عصب انتي رخي وتركيه لما يهدا .
* اذا متضايق وزعلان طيبي خاطره .
* وابتعدي عن أي شي يضايقه .

-شوفي عزيزتي الشرع حلل العلاقه الجنسيه للريال والمرأه بالزواج ولا تنكرين مدا اهمية غرفة النوم لدى الزوجين والمده التي يقضونها فيها ، يا حبيبتي انتي حلال زوجج ما عدا ان يقربك في الحيض والنفاس ومن الدبر ، امتعيه قدر المستطاع اهوه زوجج واذا ما شاف المتعه منج صدقيني راح يلتفت لغيرج هذا شي لا شك منه نصيحه نصيحه نصيحه ( لو كنتي بكل شي زينه معاه وريلج مو مرتاح معاج بالسرير سوف يتعب نفسيا وبدوره يأثر على علاقتكم الزوجية) .

يعني :

* اسأليه بكل صراحه ما يفضله وما يحتاج اليه حتى تكونان منسجمين ومندمجين وحتى اخبريه عن رغباتك ايضا هذا من حقج وحقه شرعا .
* اقرئي الكتب وشاهدي البرامج المفيده وثقفي نفسك جنسيا وذلك لاكتساب خبره تجعلك تفهمين وتتنبئين برغبات زوجج وتصرفاته وهذا موقع راح يفيدج وايد
www.raf7.com .
* ما كو داعي اتكلم وايد عن الاغراء وتفنن باللبس والألوان ( يالله ما كثر محلات قمصان النوم ) ادري ان مدة هذا اللبس 5 او 10 دقايق او حتى اقل لكن له تأثير طيب جدا لدي زوجج .
* طبعا تكلمت عن الاهتمام والنظافه وارد اتكلم عنها اثناء المعاشره
( خلي منج تفوح ريحه بخور عطور بودر كريم خلج ورده معاه – اهتمي بريحه شعرج بحيث أي حركه يحس بالريحه الحلوه وانتي معاه " عندج خمريه او عطور مخصصه للشعر ").

- كوني صريحه وواضحه معاه وخليه لج زوج وصديق وحبيب وابو واخو وكل شي .

يعني :
* اخذي بالسوالف معاه وسمعيله كثر ما تقدرين ، ولا تقديرنه وضحكي على نكته قالها حتى لو ما تضحك .
* قوليله كل شي تمرين فيه بيومج خلي معاج على الخط وزرعي فيه الثقه .
* نصيحه وتحذير لج خلي الماضي يولي وتركي عنج وانسي ولا تفكرين تذكرينه حق ريلج بأي شكل من الاشكال حتى لو اهوه طلب منج ترى الريال ما ينسى .
* خلي لما يكون متضايق يلجأ لج انتي ولازم ترفهين عنه وتشيلين الضيقه بشطارتج وبذكائج.

- اذا بيوم غلط زوجج وتسرع لا تشدين عليه اذا كانت اول مره .

يعني:
* لا تذكرينه في هالشي دايما .
* ولا تقولين له كلا منك وتزيدين الطين بله .
* واذا تكرر الغلط ناقشيه بأسلوب حلو وذرب بحيث يقتنع بكلامج .

- دايما سأليه بين الوقت والثاني شنو يحتاج ؟شنو مضايقه؟ وهل انتي قصرتي معاه بشي ؟ علشان تكونين بالصوره .

- انا ضد ان الريال يسافر مع ربعه بكثره السفر يخرب خصوصا رياييل بروحهم الثقه مطلوبه نعم ( و اكيد الريال من حقه يسافر ) بس كل شي له حد ، بالعكس خلي ما يحب السفر الا وياج وما يستمتع فيه الا معاج .

- خلي دايما مبهور فيج وبتصرفاتج وذكائج وحسسي بالنعمه والعز اللي اهوه فيه ،بحيث يفكر انج مرغوبه فلازم يحافظ عليج ولما يشوفج بعيونه تسوين الف مرأه اهني راح ينقد على عمره ولا يفكر يخونج او يقصر بحقج .

واتمنى يكون كلامي وافي وشافي : ) ادري في منكم قرت الايميل وحز بخاطرها لانها اتبعت هالاساليب واحسن بعد ولكن ما فاد ، ادري والله في رياييل طبانه ودفاشه وما يبين فيهم شي ولكن بالنهايه بينج وبين ربج ونفسج انتي ما قصرتي
بشي انتي سويتي اللي عليج والباجي على ربج .

اما بخصوص ما ذكرته انج تهتمين بشكلج وجذي وانج تكونين ناجحه ، في رياييل يحكرون حريمهم وكمكمونهم ونقبونهم
ويفرض عليها هالشي ولا يخليها تشتغل ، ولما يطلع معاها عيونه زايغه على هاذي وهاذي انزين ليش ؟؟
للأسف جهل وانانيه او انه من كثر ما خربط بدنيته يخاف ينعاد عليه .

تحذير :
لا تسكتين عن اللي يطقج وما يحترمج اللي يطق مره مو ريال خلج قويه ولا تضيعين حقج.

واخيرا اقولج الريال اذا تعود على شغله راح يمشي عليها فعوديه من البدايه ان مثلا ماكو سهر بالدوانيه لنصايف الليل ، ما يفكر انه يطقج ، بيني انج مو سهله دامج سيده وزوجه مثاليه لازم يكون معاج بالمثل .

ويعطيكم العافيه ويوفقكم دنيا وآخره.
بس تكفون عدلوا حياتكم لا تخونون ، واللي مو قد الزواج يا ربي لا يتزوج ويشحطط اعيال الناس معاه ، ترى ماكو شي
غصب حتى البنت الحين ما يغصبونها ، تركزوا وتصبروا في اختياركم .
اوفواا ….. ومغسي بكوو


 
Saturday, January 08, 2005
posted by tasty_as_berry at 12:42 PM

هل انت رومانسي ؟؟ هل تبحث عن الرومانسيه ؟؟ عندما ترى هذه الصور هل تشعر بالنقص ؟؟ هل تعتقد ان حياتك
الزوجيه تخلو من الرومانسيه ؟؟



البعض يخطىء عندما يعتقد ان الازواج يفتقرون الى الرومانسيه وهذه المرحله فقط في اول ايام زواجهم



البعض يخطىء عندما يعتقد ان في هذه الصور مبالغه ولا يوجد اشخاص بقمة الرومانسيه .



البعض يخطىء عندما يعتقد ان كلما كبر به العمر كلما اصبحت الرومانسيه مستحيله .




البعض يخطىء عندما يعتقد انه لا يستطيع ان يعيش لحظاته كما نرى في هذه الصور .



نصيحه :
عيشوا حياتكم الزوجية بأيامها الحلوه وأجعل أيها الزوج زوجتك هي امك واختك وحبيبتك وصديقتك ، وقدم لها الورود والمفاجآت ولا تعتقد انها امور تافهه انما هي امور تترك أثر جميل ومفرح لدى الزوجة ، ولا تهملوا بعضكم البعض ، فالزواج هو اندماج قلبين وروحين وجسدين ليكملان باقي العمر ونصف الدين معا.