Sunday, March 26, 2006
posted by tasty_as_berry at 10:09 AM




السلام عليكم ورحمة الله وبركاته ،،

طبعا بما اني حطيت وايد على الرياييل بس يعني للأمانه مو شي من عندي : )
وطبعا انا قلتها من قبل الحريم ( البنات) مو خاليين ، وطبعا بما اني وعدت بأني اكتب عن البنات وهااا انا ذااا ...

انا بترك وبطلق اناملي للعنان وبتكلم بشكل عام باللي يطري على بالي ، ارد واقول مو كل البنات مو علشان انا بنيه يعني : ) وبشيل روحي من السالفه ..
في بنات ( اعترف والله دعله ومصاخه

- انا حلوه وكلا الناس تشهق لما تشوفني مع اني اكون مو حاطه مكياج ولبسي عادي
( واهيه اصلا عاديه وغالبا ما شافت الحلا)

- والا كل ساعه واحد معاها بالكليه والا واحد طلع رقمها والا لحقها وكلهم يبونها على زواج سبحان الله
( والمشكله ولا واحد فيهم تقدم ).

- والا يلحقها واحد بالسوق والا بالسياره وتقول واي اشيبي هذا لاحقني ( وكل ساعه لافه عليه واي هذا للحين ورانا امبي وكل ساعه ملتفته تجيك ) ايي ما تبينه .. حقريييه .

- والا اللي تتضحك حق واحد طول الطريج ومستانسه عليه وتأشر بعد ( اهوه عاد يعيد ويلحق يلحق ) اخر شي تقوله يلا .. يلا.. نعم !! ( صراحه لو واحد شري وبايعها شوفي شسوي فيج .

- يا شين اللي اتيي الخيران لابسه تنوره والا كعب لا ومو أي عكب ( مال سبايس غيرل ) انزين يعني انتي يايه تستانسين تاخذين راحتج أي لبسي بنطلون ( والله عاد اذا ابوج ما يرضى وياي الخيران تناقض صراحه .

- لالا وفي نوعيه اول ما تكلم الواحد بالتلفون ترى انت اول واحد اكلمك والصراحه ما ادري شلون دقيت عليك ، ( حتى لو صج سكتي ) .. هذا شي الحين يعتبر خرافي عند الشباب فسكتي احسن لج لان راح يتطنز عليج يقول
( خير انشاء الله).

- يا بنات العلج .. العلج.. العلج تحكمي بنفسج كثر ما تقدرين شغل طقاقات نووووو .

- واللي تهول بمكياج وتسريحه يعني شي رهيب منو قالها انتي حلوه جذي ما ادري ؟ يعني رحمي اللي حواليج رئفي بحالهم شوي ، اذا ما اتعرفين اتحطين مكياج مو شرط ، ترى مو كل بنت حلوه بالمكياج في ناس العكس ، اللي تكبر براطمها المشكله يبين ، واللي حاطه رموش ( يا ما ما بس حق العروس ) ، واللي حاطه لماعي ( فوازير شريهان ) ، ويييع يا كرهي اللي تحط خزامه ( لا وجان زين خشم خنافر وحاطه خزامه يعني اللي ما انتبه حق خشمي يشوفه عدل ) ، والضحك انه بعض المنقبات تخط العين والشدو وهالرموش ولما تشيل النقاب الا اهيه حاطه الاساس بس عند منطقه العين : ) خخخخ

- المشكله ان في بنات متحجبات ويلبسون لبس حسبالهم أغراء وفنتق واهيه اتفشل (جان زين جسم ) مثل البرموده ، لفه المصراوه ام ترجيه لوول يطلق عليهم القراصنه ( واهيه طبعا تمشي وكلها ثقه ان اهيه كوووول ) يعني لبس اصلا مو مال متحجبه ( يعني اهيه جذي خلت الناس تطالعها وتنتبه وتعيب ، بس على لبسها لو قطت الحجاب اهون بقولون والله اهيه اصلا سفور يعني قطي الخرجه اللي على راسج وافتكي ) ، طبعا غير بعض الاخوات اللي تتعمد تلبس شي او عفوا ما تلبس ( جاسياتن عاريات) والا لابسه بنطلون ابيض يشف واذا لحقها واحد استلغث وسعبل عليها ، عصبت !!! والمشكله في بعض البنات يتعمدون برمضان يلبسون شي يفشل !!!

- اما ( البويات : اللي اهيه بنت وتبي تصير ريال) طبعا وييييع مالي شغل فيهم ، الشرهه على البنات اللي تعطي هالأشكال ويه وتتلصق فيها وتصير رفيجتها ، اتصدقون في بنات عيايره لي شافوا مسترجله راحت تتقصع يمها ( والله انزق ).

- اكره ما عندي اللي عندها حبيب وتحبه على قولتها وتموت فيه ( وتلعب من وراه أي شالسالفه !!) أي حب أي بطيخ !! لا وفي صنف وصخ يكون خاطبها من اهلها والولد شاريها وتكلم وتطلع مع غيره شنو نوعها هاذي ؟؟

- في بعض الشباب يواجهون مشكله في اختيار الاصدقاء ( يعني اللي مصلحجي واللي رايح فيها واللي اييب المشاكل واللي يحتر) ، ترى البنات بالضبط نفس الشي يواجهون هالمشكله ، يعني للأسف حتى البنات في منهم المصلحجيه بالضبط نفس سوالف الشباب
( يعني اذا وياج فلوس اطلع معاج - اذا شريتي سياره كشخه كلا وياج - اذا ما لقيت احد كلش وما كو الا انت يلا ادق عليج تطلعين معاي ).

- يا بنات ترى مو كل وحده قعدت جدامج وسوت روحها شريفة روما ( اغلبهم عيايره) ، تلقينها تقعد وااي انا صراحه ما اطلع أقززز... شنو قزز !! امبي شنو هلاقه !! امبي من صجج تقولين جذي !! تسوين جذي !! وكلا مسكينه وعلى نياتها ،
وهالنوعيه ترى تاخذ وتسمع وما تعطيه ، تحاشيها قدر الامكان .

- في نوعيه اللي عشتو مو أي مكان تدخل واي واي لاء لاء سوق الديره !! سوق اليمعه !! سوق بو 100 !! سوق البحاره ( طبعا قاعدين يرممونه) !! يعني شنو اليديد الكويتيين كلهم دشوا ، ما قلنا كشخي وروحي ، في اشياء اهناك تستانسين تتطمشين او تشترينهم ، صج عقد (بضم العين) ، قولي يمكن هالاسواق فعلا ما تندخل لانه غثقه وزحمه ولويه ووايد رياييل ،
انزين اللي تقول واي انا اروح احط مده بالبحر واقعد !!! شنو هلاقـــه ، بعد بحر بحر شنو هلاقه.

- لا ولا قويات العين تدق عليج نص رنه وحق ربعها الاخت تخش الكرت ، استحي على ويهج
( هذي النمونه تحقرينها احسن لو تدق من الحين لي باجر والمشكله تكون اهيه محتاجتج وهم تدق رنه )

- ولا النمونه اللي تسافر وترد خامه السوق وما تذكرج بشي ، ولما بتيين تسافرين عاد هالله هالله بالصوغه
( صج ويها عريض !! )

- ولا الجعصه اللي حاطه الفلوس على قلبها كلا ما عندي خرده واتيي تقول خنروح مطعم واهيه ما عندها فلوس يعني شنو بالضبط يعني انا البنك المركزي حقج والا شنو !! ويـــــعه وكلا ما عندها فلوس.. مسكينه واهيه اييها من معاش ابوها التقاعدي 150 وفوق كل شهر وكلا ما عندي (مدي ريولج على قد لحافج :/

- واااي ولا اللي يعني انا اعرف انجليزي كل ساعه قاطه كلمه لو مدرسه انجليزيه قلنا يلا متعوده اقصاج يالله عديتي الماده متعلمه جم كلمه من الافلام ( والمشكله مو لايق .
ذيك المره اسمع وحده يمي بغرفه القياس تنادي امها ( مامي... مامي ) انا قلت على هالصوت بشوف كتكوته نعومه يعني هذا اللي توقعت ، والا تطلع ذيك السوده المصك ... يالا الهول انصدمت !!! يا شين السرج عالبقر .

- وفي بنات عشتوا ما يرافجون أي احد ، وفجأه ترفع خشمها على رفيجاتها القدم ، يعني صارت ما ترافج الا الكشخه وتتلصق فيهم وتسوي روحها منهم ، واهيه عمرها ما ركبت طياره ( صج مو شايفين خير ) ، لا وبعد في رفيجات اذا تحجبتي هدتج خلاص صرتي مو ستايلها ( اللي ما يثمنك لا تثمنه .. و قبل قالوا : اللي ما يعدك راس مال لا تعده فايده ).

- وبعدين في بنات انزغ تربط عصاعص من الحره كل شي تسوي والا تقول سواء صح أوغلط
( يا بنات يقولون لج عدوج اللي ينقلج الحجي مو اللي يتكلم فيج ) .

- ترى في بنات حقودات وغيورات ( عين الحسود فيها عود ) لا تسولفين عن كل شي الرسول عليه الصلاة والسلام قال : اقضوا حوائجكم بالكتمان .

- واي ترى انا ما احب الغباء يعني انا حبيت خلاص اعطي مو جذي عاد ( عندج مخ) ، يعني اكره ما عندي لما اقرا مشكله بمجله انا فتاة ابلغ من العمر 21 احببت شاب بشده ثم وقع الفاس بالرأس بدون ان نشعر وفقدت عذريتي !!! شنو فلم هندي !!

- بليز رجاء رجاء لما تبيعين تلفونج مسحي ارقام رفيجاتج واي شي ممكن يتعلق فيج وفيهم
( مو يعني عادي.. وشنو يعني محد يقدر يسوي شي .. مسحيهم وانتي ساكته ).

- عاملي الناس كما تحبين ان يعاملوج .. يعني لما احد يسألج عن شغله لا تردين جنج شامه ريحه خايسه وغاصبينج ... ولا بغيتي شي قطيتي الوي وصرتي فريندلي فجأه .

- في بنات قطيعه ما تمل خلاص خربطتي قزيتي كلمتي بس بس اعنبوج ... ماكو احساس كلش .. هيعيي ركدي بس!!

- في بنات لما توريج شي تقولج شوفي حلو شريته ...خذيته ب 100 دينار ، يعني بالله الحين احد سألج عن سعره !!! وجان زين هذا سعره الصجي .

- لووعه البنات اللي تروح المسيله كاشخه والمكياج والاكسسوارات ، شنو عرس !!! والا مشتركه بنادي متكشخه وتقعد على جهاز الجري خطويتين والقاري دقيقتين وتطلع ، ماكو سالفه !! وفي وحده باطه جبدي عصله ومشتركه وكل يوم حاطه هالابتوب ومجابلته انزين يايه ليش ؟ يعني شوفوا عندي لاب توب والا شنو ؟

- في بنات وي منجب ماكو كرامه ميــــح ...
يعني الواحد يسبها يدس السماعه بويهها ذلفي ما ابيج ... عادي ولا كانه شي صــاير !!

- ولا لما تييج وحده غثيثه وملقوفه تسألج متى بتتزوجين ..!! بالله هاذي شرد عليها !! ، والا هاا محد اخطبج ؟ يخطبونج والا لاء ? ..... انتي اشعليييييج !!! والملاقه لما اتييج وحده توها متزوجه ويايه تتفلسف على راسج
( من عمره ما تبخر) .


- ولا المتزوجات المنحرفات عمه ريلها زين معاها وهم تخونه ... وتطلع مع رياييل واهيه حامل !!! ...
الله يكون في عون الياهل اللي بطنج اذا انتي امه .

وسلامتكم : ) طبعا انا حاولت كثر ما اقدر اني ما اخلي شي وانشاء الله ما نسيت شي : )
الى اللقاء ...
 
Saturday, March 18, 2006
posted by tasty_as_berry at 4:00 PM





السلام عليكم ورحمة الله وبركاته ،،،،

موضوعي هالمره للرياييل ... هل تفكر بالزواج ؟؟ هل الزواج هدف تخطط له وتسعى إليه … ؟؟
( وليش موجه للريال .. لأنه هو اللي يخطب أما البنت عليها تقعد وتنطر)




الزمن والوقت الحين اختلف عن قبل ، قبل كان عندهم الزواج كلمة كبيره وما يقولها إلا اللي قاصدها لأنه الكلمة بحد ذاتها مثل الوعد ، الحيـــــــن اللهم يا كافي الكلمة صارت ملطشه تعشم ولعب وكل شي عادي لا حيا ولا مستحى يعني بكل بساطه ايي ويقول ....

- اشرايج فيني انفع زوج .. !! طل بعينك ..
- أم العيال .. !! أي شي ..
- شنو يعني عادي مرتي وكيفي .. !! طيـــــر زين !!
- ها لو اييج ترضين فيني .. !! اهلج يعطون ..!! واهوه متزوج اصلا خخخخ

المهم اللي بقوله انه الزواج نص الدين ، وهذا حال الدنيا الواحد بييله يوم ويتزوج ويكون عنده عيال وبيت ، وكل شخص عموما لازم يمر بمراحل عمريه في حياته ( الطفولة – المراهقة – النضوج – الشيخوخة ) يعني بالمختصر كبرت وعيت على سوالف زينه وشينه و لعبت بما فيه الكفاية بس عاد لازم تعقل ...

طبعا الرياييل أنواع :

1 - في رياييل يقدسون الزواج ويشغل بالهم هالشي ويحاول يوصل لمركز حلو ووظيفة محترمة بحيث يكون مرغوب فيه ويعيش حياة سعيدة ومريحة ، وحتى يحط في باله عمر معين لما يوصل هالعمر لازم يبدي يشوف زوجه المستقبل .

وهذا النوع من الرياييل يعني يفكر في هذي المرحلة في حياته ويخطط لها (ويعتقد انه الريال إذا صار عمره كبير مثل يعني 30 و32 وما تزوج اوووف كارثةشلون جذي ) مثلا يعني ..
لما يمشي في السوق يشوف أثاث معين أو فكره معينه يحطها في بالها ويقول هذي بسويها في بيتي لما أتزوج ويخطط حق عرس يونس أهله ويفكر بشهر عسل حتى.. وهذا شي حلو طبعا بالضبط نفس أحلام معظم البنات وهذا يدل إن مهتم .
أو إن مثلا يشوف اثنين مع بعض يحز بخاطره يعني يبي يعيش هالجو أو يشوف عيالهم يكون وده بياهل يبي يحس بالأبوة .. وفعلا لما يبي يخطب سواء عن حب أو أهل يحاول يختار بعناية بأسلوبه وذوقه الخاص .

2 - وفي رياييل يكونون متحمسين حق فكرة الزواج ويخطط وجذي وبعد جم خطبة خلاص يمل .. يحس بالإحباط ، أو انه مر في موقف معين خلاه يشيل هالفكره من باله يعني مثلا يكون حب وحده ومفكر يخطبها آخر شي يكتشف إنها مو زينه أو خانته فخلاص يأخذ موقف من الارتباط والزواج .

3 - وفي رياييل طموحين جدا يفكر في دراسته ومركزه ووظيفته وبما إن وصل لهدفه ذيك الساعة يصير خير ..
لكن خطوه الزواج معاه تطول وتأخذ وقت .. لان لازم يتأنى ويفكر ويبحث عن انسانه توافقه من جميع النواحي .. لان شخص مرغوب فيه والكل يتمناه بهالمواصفات وغالبا يتزوجون كبار بالسن .

4 - وفي رياييل يقدرون يتزوجون واهلهم يبون هالشي الحين قبل باجر لكن .. هل اهوه يبي يتزوج عن حب !! هل يبي خطبه أهل!! ..
هذا النوع من الرياييل لا يرفض فكره الزواج عن حب والزواج من انسانه عرفها ..لكن خايف ..خايف ..خايف !! لان عرف وشاف وسمع عن بنات الله يستر عليهم وعن علاقات زوجيه بقمة الفشل وعن خيانات زوجية بأشكال وأنواع.. فيكش من طاري الزواج .
وهذا النوع غالبا يفضل إن يعيش جو الزوجة والأسرة بالحرام !!

5 - وفي رياييل ..( الأم تقول : يا وليدي تزوج يلا متى نبي نفرح فيك .. يرد عليهم : إنشاء اله .. إنشاء الله ) مل من القز !! ربعه تزوجوا !! اكبر إخوانه ‍‍‍‍‍‍‍‍‍‍ ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍.. يلا نتزوج ليش لاء .
يروح يخطب يشوفها أعجبته يلا ميخالف ويتزوجها واييب عيال منها .. بس ألفه محبه مــــــــاكو ..بس بالاسم زوجة وأم اعياله .
وهذا غالبا لاعب لعب يعني وحده مو مكفيته ‍‍‍‍‍‍‍‍‍‍‍‍‍‍‍ ‍‍‍!!‍‍‍‍

6 - وفي رياييل ما يدرون وين الله قاطهم .. ماله شغل بالدنيا .. اللي يبيه يسوي .. وهالنوعيه أكل ومرعى وقلة صنعة .. وهذا النوع عديم إحساس .. تـــــافه جدا ( يحتل مراكز حلوه يكمل دراسته بس يظل تافه
.
وغالبا عنده شقة وسيكل وسفرات … الخ من الفسوق والمحرمات ..


7 - وفي رياييل يقدرون يتزوجون وبسن مناسب وكل شي تمام ليش ما تبي تتزوج ؟؟ ‍‍مو مفكر بهالشي مو الحين ليش ؟؟ مو مهيأ نفسيا .. تو الناس .. أي إي قول بعد ما شبعت بنات أبي اخربط بعد إي إي .. احسن بعد ويع ريل ومو مقتنع ومغصوب لــــوعه .
طبعا هالنوع يختلف عن النوع اللي قبله بأن أخف شويه يعني هذا ممكن إن يتزوج بس الأول أشك .

8 - وفي رياييل شغل قبل ما يأخذ وحده يعرفها ولا عن حب ‍‍‍‍‍‍‍‍!! شغل قبل !! خخخخ حتى أول يأخذون عن حب…!! أي شــــــــيء .. لا عفوا هذا شغل تخلف .. يعني اللي أمه اخطبتها غير اللي يعرفها !! هاهــــــــاي .. يا روح أمك .
عاد هالنوعيه بالأخير يطيح عـــــلى ( اسنع بنات الديره ) خخخ وقعت في شر أعمالك ..
واللي اقصده إني أؤيد الزواج عن حب وزواج الأهل وكل شي بهالدنيا له عيوبه ومميزاته ، يعني بنات الديره مو لعبه بعد ما تشبع .. يلا يما شوفيلي زوجة ، مع انه البنت اللي عرفها من احسن ما يكون ... اللي بقوله
( انه ليس بالظروره اختيار الأم هو الأفضل دائما )

9 - وفي رياييل خنت حيلي ميت على الزواج ... وما لقه نصيبه .. ويتعب نفسيا من هالشي .. وما في طريقه ما جربها .. التلفون .. حب .. نت .. اهل ..كل شي ..
كل شي نصيب وكل تأخيره فيها خيره بتلقى اللي تبيها آخر شي ..آمين..


10 - وفي رياييل كمل واخذ الشهادة واشتغل وكل شي يعني عريس لؤطه .. وخوش ريال والله .. بس ما يبي يتزوج حاليا .. يعني ما حس انه يه الوقت لقى اللي يبيها .. يبي اقتناع كلي .. يعني عنده إن كل شي بوقته حلو .

11 - والحين هابين الرياييل يتزوجون صغار يعني 20 و 21 ياالله الهادي شي زين وحلو بس إنشاء الله يكون يعتمد عليه وقد المسئولية وغالبا يكونون للحين ما خلصوا دراسة ويأخذون عن حب وإلا مسويله مصيبة وغصبن عليه يتزوج .


طبعا الحين الغالبية قال وانتي شكوا !! تزوجوا والا قعدوا !!
وآنا بقول كـــــيفي … خخخخخ

الزواج اعتبره شي حلو باستثناء اللي شوهوا صورته .. اللي يبي يتزوج لازم يكون قد الزواج والزوجه والعيال والمسئولية .
الزواج ما يعتمد على عمر معين آنا عن نفسي اعتبره مو مقياس كلش ، و بخصوص الشخص إذا كان يفكر بالزواج أو يخطط له أو يكون هدف له أنا اعتقد انه يعكس أو يعتمد على طريقة حياته واسرته وأمه وأبوه يعني بمعنى ..

* يا انه كانت حياته مع أهله مشاكل وحصل انفصال وتفكك بالعايله ولا في سند مادي أو معنوي فبالتالي أثر فيه واخذ موقف وكش من الزواج .. أو .. أو إن عنده أمل في إن كل شي نصيب وان يقدر يعيش حياة افضل ويجرب الحياة الزوجية ويحاول يخليها سعيدة يعني ويحاول يصلح ويسوي الأشياء اللي كانت غلط في حياته بين أهله ، وهذا الشخص قوي واعتبرها شجاعة وإصرار .

* أو انه حياته كانت حلوه ويمعه وكل فرد بالعايله متهني وأسرته تسانده نفسيا وماديا واهوه يبي يعيش هالدور يتزوج ويفرحون فيه وجذي بدون تعقيد.


والنهاية كل شي مو مقياس لان الدنيا الحين والمقاييس انقلبت فوق تحت .. اللي بقوله اللي يبي يتزوج يتزوج عن قناعة شغل أهلي حنوا علي واغصبوني أظن عيب ريال اشكبرك اهلك اغصبوك .. لا تؤذي بنات الناس وياك .. ونصيحة اللي ما تزوج وعنده القدرة يلحق على عمره وإلا بيتحسف إن ما تزوج بعمر مناسب ..

يعطيكم
العافية .. وعساكم عالقوه ..
 
Monday, March 13, 2006
posted by tasty_as_berry at 12:14 PM

السلام عليكم ورحمة الله وبركاته ،،،


هل إنت أصيل ؟؟ أم بيسري من ساير الناس ( غير أصيل) ؟؟
من أي قبيلة ؟؟ من أي فخذ ؟؟ منو نسايبكم ؟؟
عجيبه أول مره اسمع بهالعايلة ؟؟ شنو أصلكم !! أي منطقة ؟

ويظل هالشي مقياس في أشياء وايد .... ونحن الآن في القرن 21 .... ويظل العديد من العوائل تضع هذه المسأله أولوية ...!!
إلى متى !! الله اعلم ..!!

هل معقولة أصبح الانسان يعيبه فقط أصله ؟؟ ماذا عن شهادته ؟؟ أهله ؟؟ اخلاقه و أطباعه ؟؟

صراحة لست خبيرة في أمور الاصول والقبائل بشكل بحت .... لكن أسمع الناس تقول "هذا معروف أصيل" .... وناس تقول "خوش عايلة زينين بس مو أصيلين " ... وناس تقول لا " مو أصيل أصلا اهو بيسري " ..

ما فهمت صراحة ... يقولون أصيل وأصله من الزبير كانوا بالعراق وذهبوا الي الكويت وناس من الاشراف ( الاردن ) وناس مو كويتيين اصلهم من السعوديه .. وناس ينقالهم كويتيين كويتيين معروفين ...

يعني معقوله بالدنيا في آدمي مثل الفقع !!!

اوكي نقدر نقول قبيلة .. وتتفرع في جميع الدول العربية .. لكن أصيل شنو مفهومه اهني بالكويت ما ادري ؟؟؟

هل الفلوس اهيه المقياس ؟؟
هل المنطقه ؟؟
هل اللبس والشياكه ؟؟
هل الاقرباء والاصدقاء والنسايب ؟؟
هل الوظيفة ؟؟


مع الأسف حتى الآن الكثير من العوائل تتعصب وتؤمن في هذا الشي .. لدرجة إنها لا تصادق الناس الغير أصيلين مثل ما يقولون ..

وحتى انهم يعنسون بناتهم .. ويرفضون تزويجهم ليش (( للحين ما يه الأصيل المنتظر !! ))

لنفرض مثلا أوكي يلا مو أصيل من ساير الناس أو مثل ما يقولون زينين بس مو أصيلين ... والنعم والله ... انزين منو ربعه ؟؟ وين يروح ؟؟ شسوي ؟؟ شنو يشتغل ؟؟ شنو شهادته؟؟ يسأل الناس عنه ؟؟ أهله ؟؟

ما عليه خلاف الولد خوش ولد والكل يمدح فيه وبأهله وشراي والبنت تبيه.....
بس هااا!! مناسبين فلان.... بس هااا !! طلعوا مو أصل ..... ( لا لا ما نعطي احنا أصيلين ولازم أصيل ) ....

والضحية منو البنت ... بدال لا يقولون احنا نشتري ريال ... يخلون الأصل أساس لكل شي ....!!

وهاذي النوعية لا يهمها الفلوس والمركز كثر الأصل ..

وفي ناس تأتيها نفس المواصفات ....
بس شنو عنده فلوس .... اوكي أكيد نوافق .. مع انه مو أصيل .. وأنهم رفضوا أشخاص مو أصيلين قبله كثير ..!!

وهاذي النوعية الفلوس بالمقدمة عندنا فلوس نعم اهوه
أصيل بنظرنا..

وفي العكس ناس اهمه يمكن يكونون عاديين والنعم فيهم ...
أييهم واحد عايله وأصل وفلوس .... بس لا يعتمد على روحه ولا أكو شهاده .. وأسألوا عنه.. سفرات .. ولا شي زين يذكر ..

اهني بقولون لا والله بنتنا وما نرضا .. نبي شخص احسن لها .. أوكي أصيل عل العين والراس بس ما يستاهل بنتنا..

وحتى الأصيل مو شرط يرضى بأصيل .. بالعكس يمكن يرضى بشخص من ساير الناس ... و به من الصفات اللي الكل يتمناها ...



حتى للأسف بعض الدكاترة بالجامعة ..... ينظرون للعائلة والأصل .... في الدرجات !!

وحتى أثناء البحث عن عمل !!

وللأسف اصبح بعض الكويتيين فعلا مظاهر ...

يعني لم تشوف وحده عادية ( مو أصيله) كشخه ... وسيارتها كشخه وحاطه سايق .. ورفيجاتها كلا فلان وعلان ....

تطلع اهيه نفسهم أصيله وبنت عايلة أوف أوف .... ليش لان عندها فلوس !!

وحتى بعض الناس تعتقد انها فئة فريدة من نوعها وأنها من الطبقة الرفيعة والباجي مو أوادم ...

وأهمه لا سنع ولا منع على الطل...

وفي ناس واي واي عسل صج ... ونعم الجار والصديق والنسب والذكر وكل شي ... ناس سنعة متعلمة فاهمة .. وعارفة أنه الشخص لما ينقال له أصيل مو شرط يكون دايما أصيل بأخلاقه ...

من تواضع لله رفعه ...

حتى الرسول محمد – صلى الله عليه وسلم – لم يحث على ذلك بهذا الشكل عندما
قال :" تنكح المرأة لأربع : لمالها، ولحسبها، ولجمالها، ولدينها، فاظفر بذات الدين تربت يداك "..

أي من حسب ونسب والنعم فيه أي من عائلة طيبة وكريمة ويشهد لها الكل..... وليست بالطريقة المعقدة اللي تحصل الآن .. وركز على الدين ..

والحديث القائل" تخيروا لنطفكم .. أن العرج دساس"
بمعنى.....

" إذا كان رب البيت بالدف ضارب فشيمة أهل البيت كلهم الرقص" .... يعني ماله شغل أصيل وبيسري !!

واللي شايف خير ما يقول أنا وأنا وأنا .....



الأصل مو قاعدة الواحد يمشي عليها ولا مقياس ... ترى الشخص الزين نادر الوجود لازم الشخص يكبر عقله وينظر لها من الناحية الصحيحة ..

وأنا أتكلم أهني ليس فقط .. عن وضع الأهالي حتى بعض البنات .... شايفين روحهم من هالناحية ... والشباب بعد ..

ومشكلة لم اتيي عايلة ... مصدقه عمرها .. ورافعة خشمها .. مثل اللي يجذب الجذبة ويصدقها .. الحمد الله والشكر.. واهمة ولا شي..

كلا بصوب واللي بحب وحدة بصوب.... آخر شي أهلي ما يرضون فيها ... والله عيب يعني توك تكتشف أهلك ما يرضون !! ..
صارت هالأيام حجه حق المقصة ..إهني البنت فعلا اتحس إنها ناقصة مع إنها من أحسن البنات ...

انا والله الرياييل ما أدري شلون صايرين ... يكون أصل وفصل ويروح ياخذ غير كويتية .. لا وغربية بعد ... ولما اتيي بنت الديرة لالالا مو أصيله ..!!

شوفوا أسامي الأسرى والشهداء ... إذا بتعرفون منو الأصيل والبيسري ..!!



فبالنهاية احنا بشر... نبحث عن انسان .. وعصر الجاهلية خلاص ولا ..

اتمنى التوفيج للجميع .... إلى اللقاء
 
Sunday, March 05, 2006
posted by tasty_as_berry at 10:03 PM



الزواج .. هو علاقة مشروعة مقدسة .... يكمل الإنسان بها نصف دينه ... وهي علاقة يشبع الإنسان بها احتياجه للحب والحنان ومشاعر الأمومة والأبوة والانتماء الأسرى ولا شك أيضا شهوته الغريزية ..


الزواج ليست علاقة لابد من حدوثها إنما مسألة قسمة ونصيب ... بمعنى ليس كل من انتهت به الحياة بيوم من الأيام كان متزوج !!


لماذا !! وكيف !! هذا من علم ربي و مشيئته ...


اللهم لا اعتراض


رغبات الإنسان تختلف من شخص إلى آخر ... وتختلف من رجل إلى امرأة ..


هناك من يريد الزواج ويتمناه .... وهناك من يرفض لأسبابه الخاصة ..... وهناك من يدعي عدم رغبته بالزواج وهو يريد العكس .....


هل من العيب أن تأكدي رغبتك بالزواج ... !!

هل من الحرج أن تتكلمي بصراحة برغبتك بالزواج !!

وطبعا هذه الأسئلة موجهة للفتاة وليش الشاب ....


للأسف أقولها بالفم المليان ( نعــــــــــــــــــــــــــــم)


لماذا ما الخطأ في ذلك !؟


فأنا فتاة حالي ككل الفتيات أرغب بزوج وأبناء وأسرة .... أكبر يوم بعد يوم وأصبح سني سن زواج ... فما العيب !!


عندما تكبرين وتكبرين ...... ولم توفقي بالزواج .... أصبحت عانس ( والتي يختلف تقييمها من شخص إلى آخر )


رغم جمالك وأخلاقك وتقدم الكثيرين لك ولم يكتب النصيب .... أيضا أنتي عانس ..!!


عندما تكونين ناجحة ... ومتعلمة ولا تحتاجين إلى شي وأنتي بقمة زهوك ... أيضا أنتي تعتبرين عانس !!


و كونك تريدين الزواج وتقولين هذا الشي بدون خجل .....


فيا عزيزتي عليك تحمل الآتي :


نظرة الناس لكي بشفقة .... وكأنك ( البنت المسكينة الفقيرة ذات الحظ العاثر ) ... وفي كل مناسبة وفرح .. من عيونهم تقرئين أفكارهم .. لتأتي امرأة تلقي عليك السلام بحرارة تعتصر قلوبها مصحوبة بعناق عنيف تقول بكل أسى ( الفال لكي يا ابنتي ) أو ( الله يعطيج) ...

وكأنك ( متسولة على باب الله )


الغريب في ذلك أن هذه المرأة لم تعتاد على قول هذا الكلام لكي .... سبحان الله من بعد ما زوجت بناتها .... وكأنها حملت همك ... والآن قد حان دورك ..!!


والمضحك أن هذه المرأة بناتها كانوا من النوع الذي قد ضربوا الرقم القياسي ... برغبتهم القاتلة بالزواج .... والرقم القياسي أيضا من ناحية عدد اتصالهم بالخاطبات !!


وكانوا يحترقون ويحترقون عند رؤية إحدى صديقاتهم .. قد تزوجت .. ويتحسرون على أنفسهم ...


حتى أنهم يبدؤون بالتكلم عن عيوب هذه البنت المتزوجة وكم هي ليست جميلة وماذا كانت سمعتها وينتقدونها ويخرجون كل ما فيهم من حقد !!


فبالتالي هذه النوعية من الفتيات .... بعد أن يأتي نصيبها و تتزوج ... قد أصبحت " الملكة " ....

ويصبحنا غيرها من ( الغير متزوجات) .... هم الجاريات !!


وتتذكر نفسها عندما كانت تتحسر وتتحسر ...فتعتقد أن الناس كمثلها بالنفس الدنيئة !!


وتبدأ بالحركات كأنها المخلوقة الوحيدة التي تزوجت .... ربما يقول البعض لماذا يأخذنها الفتيات بهذه الحساسية .... هل لأنها لم تتزوج والأخرى سبقتها !!


لكن الفرق واضح ... والتعبيرات والأسلوب تبين نية الشخص وماذا يقصد ..

فتقوم بمحاولات استهزاء وخباثة منها .... وتستغل هذا عن طريق المعرفة والصداقة القديمة بينكم ...


فتقول : " مازلت تريدين الزواج حتى الموت " .... " أين هم خطابك !"

و
الواقع هو أن رغبتك بالزواج كانت طبيعية بالنسبة لرغبتها القاتلة ..!!

فتقولين بسرك " الله يا الزمن نسينا ما كلينا !!"


ودائما تعتقد أنك حسودة على الرغم ... من أنك فرحتي لها أشد الفرح ... ووقفتي معها أكثر الوقفات كأخت ... وتتمنين السعادة لها من كل قلبك ...


لكن ماذا أقول غير " كلن يرى الناس بعين طبعه "


وأيضا تحملي وجود النساء الذي يطلق عليهم " السوس "


عندما يسألون الأسئلة الغبية :


- متى ستتزوجين !!
- ألا يأتي أحد لخطبتك !!
- لماذا لم تتزوجي حتى الآن !!



فيبدأ الناس بقذف الخطاب إليك .... أيا كانت حالته .... وبمعنى أصح ( حالته كسيفة) وكثير ما يحدث أن هؤلاء الخطاب قد تقدموا لبناتهم فتم رفضهم ...


فتصدقوا به عليك .... على الرغم من أنه لا يتوافق معك وأنتي أفضل منه بكثير !!


متناسين الكثير من الصفات والمميزات بك .... لأنهم يعتقدون أنك عانس .... كونك لم تتزوجي حتى الآن وأنه لم يتقدم لكي أحد... !!


مستبعدين أيضا أن كونك عازبة حتى الآن عائد على ترويك وتأنيك في اختيارك كون كل من تقدم لكي ليس من هو الشخص المناسب ليكون شريك حياتك ...!!

وبكل وقاحة تمدح وتثني هذا الشخص وتحاول إقناعك على الرغم من حالته إلا انه خير الأزواج ..!!


ويعتقدون بعض الناس أن كل الفتيان ( مشافيح ) مثل بناتهم ...!!


المؤلم والمبكي ..... عندما تتزوج إحدى صديقاتك العزيزات ... والتي تحبينها جدا وتتمنين السعادة لها وكنت مرشد ومنصح وعون وملاذ عند الحزن والضيقة ...


وكنتم تتسلون ولكم العديد من الذكريات .... وكل واحدة تشكي للأخرى وتعلن عن رغباتها وماذا تريد وتتمنى .... وتتحاورون بمدى رغبتكم بالزواج ...

وكنتي تخبرينها برغبتك بالزواج .. لأنها تفهمك .. ولأنها صديقتك العزيزة ..


ولو أتى موعد زواجها ... لكنتي أول الفرحين بذلك .... وتهمين بمباركتها وعناقها ... من سعادتك ومشاركتك لهذه المناسبة معها ...


فجأة تأتيك رسالة هاتف منها ....


تقول :

" آنا ملجتي اليوم "




وعندما ذكرت في بداية هذا الموقف (المؤلم والمبكي) ليس تحسر على حظك وكونها تزوجت قبلك !!!

بل ...


حسرة على كل سنوات الصداقة التي مرت وتجمعك بها .....


وهذا لا يعني إلا شي واحد ؟


كأن صديقتك تقول لكي :


إنك شخص عادي بحياتي .... وحتى لو لم أخبرك فلن يوجد أية مشاكل ...

وكوني تزوجت قبلك ..... وأنتي ترغبين بالزواج ..... ومدى معرفتي بذلك ...

فأنتي هي العانس الآن .. فلابد من حماية نفسي من حسدك و غضبك على حالتك .... !!


قال الرسول محمد - صلى الله عليه وسلم- " اقضوا حوائجكم بالكتمان "


حسنا حتى لو كنت قريبة منها وهي شخص عزيز علي .....

تقولين من حقها فهي حريصة على نفسها ... والإنسان أحيانا يحسد نفسه ... وهذا شي وارد ..

وتقولين أيضا إن كانت لا تريد دعوتي فربما أنا شخص غير مهم وعقد قرانها كان للعائلة فقط .....


فتعذرينها بذلك .....


لكن أن تخبرك بخبر عقد قرانها بهذه الطريقة حيث كان بإمكانها الاتصال بك ...!!


تسترجعين الأيام والمواقف وكل فترات هذه الصداقة .... وتتساءلين ...



ماذا فعلت لأستحق ذلك !!؟؟


والإجابة هي :
.
.
.
.
.
.

( ضريبة كونك تمنيت الزواج ورغبتي به )
 
Saturday, March 04, 2006
posted by tasty_as_berry at 1:17 AM

Ladies & gentlemen



أهدى هذا الموضوع إلى كل شخص .. أيا كانت حالته الاجتماعية ... وأيا كانت ظروفه ...


جميعنا نحتاج إلى التغيير والتجديد ... صح !!


والكثير منا يشعر بالملل .. والروتين القاتل .... حيث ممكن أن يكون لديه العديد من المشاريع والخطط ... والتي لا يعرف متى وكيف ... يبدأ بها .. وغالبا ما يؤجلها ... لان المزاج مو أوكي ..


وغالبا يكون السبب ..... عدم توفر المال ...!!

لكن والله أن عدم توفر المال ليس هو المشكلة ... المشكلة في الانسان نفسه .. !!



أولا : لازم يحط في باله ..... أن هو عايش في هذه الدنيا سواء توفر له المال الذي يريد ام لا... فلابد أن يتأقلم معاها ويعيشها صح ...


ثانيا : لابد أن يسعى إلى هذا المال ... ولا يعتمد على غيره ويصبح عاله على المجتمع .... بالمختصر يقوم بعمل كل ما يستطيع ويتوكل على الله ... وليس أن يتواكل ..


في مقولة تقول " الفلوس وصخ دنيا " لكن وبدون شك .... كلنا نريد الاستحمام بها : )


أنا مؤمنة بأن الله سخر لنا الكون كله من بحر وطعام وحيوانات ... إلى آخره من خلق الله ...


بمعنى أن التغيير ..... ليس بالضرورة أن يكون مرتبط ... بالسفر .... وشراء المعدات وكل ما تريده النفس ... حتى أكون سعيد ...

وليس مرتبط أيضا ... بجملة " بالفلوس كل شي أقدر أحصل " ...

ما أنكر أن كل شي الحين بثمن .. وإذا توفر لك كل ما تريد ... تهيئة النفسية وأصبحت مرتاح ...


لكن كثير من الأحيان ... نلاقي كل شي حوالينا .... أب و أم يحبونا وأسرة محافظة .... وبيت وسيارة ومصروف ووظيفة..... وتقريبا كل أسبوع مطاعم ... و أحلى الملابس ... ولدينا من يحبنا ويخاف علينا ويحاتينا ....


اللي أكثر من مليون شخص يتمنى ويدعي ليل نهار يعيش هالعيشة ... ومو حاصله !!


ليش نتذمر ....؟ وللأسف آنا أكثر الاشخاص بالتذمر ... !!

فعلا عادة سيئة أحاول التخلص منها تدريجيا...


يعني بعضنا ... يحتاج إلى تغيير كبير بحياته .... ويقول " جان زين اسافر " أو " أبي تغيير قوي وشامل وهو الزواج " أو " بحصولي على الوظيفة سوف تنحل المشكلة "


واللي ما قدر يحصل هالشي هل هذا نهاية .. الشخص ...!!


أحسن طريقة ممكن الشخص ينسى أحزانه ومشاكلة والملل ... ويفكر في التغيير دائما ..

ببساطة يعيش حياته ...


والله حرام ترى احنا وايد نعقدها ... وبالضبط أهلنا يعقدونها .... .لا تسوين لا تحطين ... لا تروحين ...ما يصير .... الناس شقولون ..!!



البنت أو الولد يوم ورا يوم يكبر وتتغير رغباته وطريقته بالحياة وذوقه ... ولازم الأهل يتفهمون هالشي ... دام أهو مو قاعد يغلط أو يطيح بمشكلة !!


والبنات غالبا يعانون من هالمشكلة عدم تفهم رغبتها في حالة الملل والضيقة .....


أما الرجال أعتبره حر وطليق وللأسف كثير منهم اتعجب من فراغه الكبير وملله الدائم ..

انت ضايق خلقك.... اطلع ... روح الديوانية ..... زهقت !! تمشى .... هم زهقت !!


ليش ما تروح الممشى ... والله جد .... ليش ما تروح النادي .... الرياضة احسن وسيلة لتهئية النفس .... راحة واستجمام ..... والمشي طريقة لتقوية الذاكرة ..... خصوصا لما يكون الجو حلو .... اجعلها عادة لك كل يوم ....


عندك البحر روح تسبح عيش يومك .... احنا بنات نموت على تسبح البحر ... حيا الله بحر المسيلة الخايس ...!!

روح الحداق وايد شباب يحبون الحداق .....


العب رياضة .... كرة قدم طائرة تنس ارضي ... سكواش .....


عندكم ملعب الصابون .... والله انا ميتة ودي العب ملعب الصابون ..... بس شنو ما يصير علشان انا بنت ...!!

روح المخيم مع ربعك استانس جراغي و تشوي و بقيات .... روح الشاليه هم مع ربعك كل ويك اند ونس نفسك ...


اطلع تمشى وايد شباب انا مااحب المجمعات ولا المطاعم ... ليش اروح واطاعل هالبنات .. ولبسهم !!

يا أخي لا تطالع .... يعني يا اطلع اشوف البنات يا ما اطلع .... اقعد لنفسك اشرب قهوة أكل اللي نفسك فيه ...


اشتر قاري واخذه كل مرة تمشى فيه ... يعني انا صج يعجبوني الشباب اللي يشتريله قاري ويتمشى .... صج مونس عمره ... رياضة ومنها يضيع وقت ...


هم انا بنت ودي اسويها ما اقدر ..... بنت بالممشى وإلا واجهة راكبة قاري امبي ......لاء فصعة ما يصير !!!


يعني برايي أن الشباب الفرصة كبيرة جدامهم ..... لكن مو الكل يستغلها صح ....


لكن نصيحتي للكل ....


ان يعرف يونس نفسه بنفسه ... وإلا راح ينهار مع الوقت ....!!


ترى الأكل ونوعيته له دخل بالنفسية والمزاج .... اترك المشروبات اللي تحتوي على الكافيين ولا تكثر منها ...


تناول الفواكة وبكثرة .... او الخضروات .... كل صبحية بطريج الدوام اخذوا 4 جزرات ..... وعادي انقلب ارنب بالطريج ....

والله شوفوا بشرتكم ذيك الساعة شنو بتصير ....


تناول الفيتامينات .... من الصيديلية .... الفيتامينات مو شرط حق المريض ... في انواع من الفيتامينات نسبتها بسيطة بالأطعمة .. عادي جدا ناخذها من الصيدلية .... منها فايدة للشعر والاظافر والبشرة ....


او حتى ادوية مضادة للأكسدة أو أطعمة غنية بمضادات الاكسدة (الفراولة - الشاي الأخضر) ..... خصوصا لكبار السن ... لا تسبب انسداد الشرايين وتصلبها وتفيد زينة للجسم ... ومنها بذور العنب ...

قللوا من المأكولات الدسمة والدهنية ..... ما وراها إلى الانتفاخ ...!!


شربوا المــــــــاء ... مو بس لما تحسون بالعطش والجفاف ... الجسم يحتاج على الأقل إلى لترين ونص من الماء يوميا ...


ملل .... تابعوا مسلسل معين ....وشوفوا أفلام ..... الأفلام وايد مفيدة .... مرات كثيرة توصل معلومة أو فكرة .... أو هدف ..... وممكن تأثر على الشخص من نواحي كثيرة ....

أشتركوا بأحد الدورات المعلن عنها اللي توافق ميولكم ... منها خبرة واستفادة ... مثل ( تداول الاسهم - البرمجة اللغوية العصبية - مكياج -كيف تعرف ذاتك )


غرفة النوم ...... الشخص يقضي فيها وقته .... ممكن تغير الاثاث كتغيير طبعا اذا كان قديم ....

ما تقدر تغيرها ....مفلس ... هم مو مشكلة ...!!


غير أماكن الأثاث .... حركهم بطريقة ثانية ... حط ورد علشان تنفتح نفسك .... افتح الشباك الصبح تدخل الشمس اشوية ... علشان الغبرة وريحة العطنة تروح اشوي ...


استخدموا مبخره الزيوت العطرية .... الزيوت العطرية لها فوائد كثيرة وخاصة على المزاج ....مثل زيت الورد واللافندر و روز ماري و أنواع متعددة ...


ابتعدوا عن التدخين .... يعني مو شي جديد .... آثاره على المدى البعيد ...

الجو هالأيام حلو ... بدا يدفا الصبح شمس وغيوم مفرقة .... والبحر روعة .... اقعد على البحر تأمل البحر .... منظر عجيب ...


زور اهلك من زمان ما زرتهم ... أصدقائك ... حتى لو تلفون تسأل عنهم ...


نصيحة مجربة ..... ابتعدوا عن السهر السهر السهر .... وحاولوا كثر ما تقدرون تعدلون نومكم ... السهر يعفس المزاج عفاس ومن كثرة النوم تعور الظهر ...

قعدة الصبح تبعث النشاط وتخلي الشخص مرتاح ....


نصيحتي للبنات ...


اشتري شريط من أشرطه سندي كروفرد وتدربي عليه ... أول مرة جسمج كلا راح يعورج .... وهذا طبعا ماكو لياقة .... استمري عليه ... وايد تمارين عجيبة ..


دامج بنت... ولازم تهتمين بشكلج .... يعني المكونات الطبيعية مفيدة للجسم وللشعر ...... كل اسبوع او كل يوم وترك .... حطي خلطة معينة .... واستمري عليها ... راح تلقين النتايج تسرج ....


أما حاجة الشخص للتغيير ...... من ناحية ..... " الحب " ...

يعني مشتهية أحب .... ودي أحب .... هاذي عاد لما تحج البقر على قرونها ....

كل شخص ومدى قبسته بالحياة ...



يا جمــــــــــــــــــــاعة ..... العبادة العبادة العبادة .... بالتلاتة

قوموا بالفرايض ..... أدعوا كل يوم .... أن الله يثبتكم .. و ادعوا لكم ولأهلكم ..... و صل صلاتك الخمس والسنة كل يوم ... هاذي اكبر راحة بالوجود .... صوم دينك والسنن ... راح تحسون انكم سددتوا دين وزيادة بعد ...


اذكر ربك طول ما انت بالسيارة تسوق .. وكل ما لقيت لافته تحمل اسم الله أذكرها دايما الله يحفضك بالطريج ... ولا تنسون دعاء الركوب أول ما تصعدون السيارة ...


التواضع .... " من تواضعه لله رفعه "حب الناس عاملهم بمعاملة طيبة ... ساعدهم .... قال رسول الله –صلى الله عليه وسلم " من فرج عن مسلم كربة ، فرج الله عنه كربة من كرب يوم القيامة"

وحطوا في بالكم ان كل شي بالدنيا له هدف ... واللي صار صار ... ماله داعي الشخص يتندم ويتحسف .... المهم يتعلم من الدنيا ....


ويحاول يفهم نفسه وذاته ... اكثر وأكثر .... يتعرف على عيوبه ويحاول يصلحها .... وإذا مر عليه موقف .. يشوف الجانب الايجابي بنفسه ولا يشوف الموقف كله سلبي كلنا لنا ايجابيات ....

وعيشوا حياتكم ...

وتحياتي ،،،،