Saturday, September 24, 2005
posted by tasty_as_berry at 12:27 AM

السلام عليكم ورحمة الله وبركاته ،،،


موضوعي هالمرة عن شباب وشياب النت :) وأنواعهم ونماينهم اللي أكيد مرت على كل وحدة ... نقول الأنواع على مراحل :



عندنا المرحلة الأولى ( اللي توه هاا بادي يتعلم ويدش النت )

طبعا العمر يتراوح ما بين 25 فما فوق .... تلقينا أول ما يدش هاي.. ممكن نتعرف أنا فلان من الكويت ... وطبعا ما يقول شلونج ؟ راح يقول شلونك ؟ كأنه يخاطب واحد ... لأن ما عنده خبرة بلغة النت وشنو المتعارف عليه .. والاغلبية ميح انجليزي ..

ومن تقولين له برب يقول شنو ألووو وينج ألوو مشغولة ( لان مو عارف شنو الطبخه ... بالأظافة إلى انه ما يعرف بالايميل وكل ما قلتي شي قال ترى انا غشيم بالنت .

وهالنوعية يكونون على جزئين :
1- يا ان متحمس وفعلا شاد حيلة يبي يستمر على الجات ويتعلم
2- يا ان داش يبي يضبط يعني سامع عن النت تضبط وياي بجرب دوره .

المرحلة الثانية ( اللي يعني أنا مشغول وما عندي وقت أو أنه كان يقعد على النت وايد والحين بطل )

يسولف عادي وتبدي مرحلة التعارف شوي جك بوم أقول ممكن نكمل بالتلفون أنا بطلع الحين شلون اشوفج بعدين ترى انا ما أشبك ولا أحب النت ... انزين شالسالفه تونا شابكين متى عرفتني ..!! لا انتي مبين عليج خوش وحدة .. وانا ما احب اللف والدوران ..!!

وهالنوعية على جزئين :
1- يا انج تجعمينه وتظلين تكلمينه وكل مره يحن دقي ليما يقتنع والمشكلة يقول ما اشبك وكلا جبال ويهج .
2- ويا امه يعني عنده عزة نفس يعصب ويقول حطيني بلوكد أحسن ويطلع .

والضحك لما تحسين ان شريط موزع عليهم كلهم سبحان الله كلهم نفس الحجي :

· أنا ارتحتلج واحس اني اعرفج من زمان
· صدقيني جربي انتي مو خسرانه ترى انا غير
· وإذا ما عجبتج كيفج لا تدقين
· بس صداقة أي شي تبين انا حاظر
· وإلا اقولج بس مسجات
· الله يخليج انا محتاج اني اسولف مع أحد الحين
· أنا ادق عليج ما يحسب
· ترى انا كول وما راح أئذيك


المرحلة الثالثة ( اللي كلا مقعدين بالنت تمر السنين واهوه للحين بالنت )

وهالمرحلة أنوااااااااااااع :

1- الشباب اللي يدرسون بره ... وهاذول بحكم دراستهم وبعدهم والملل .. تلقينه يشبك ودايما ( أوي ) لان فعلا يكون مو يم الكمبيوتر ينام وكل شي ويخليه شابك ... هالشباب غالبا تستمر المعرفة مدة طويلة معاهم ... وتكونين مفتكة لا يقول بتعرف عليج ولا بشوفج ومن هالسوالف اهوة بديرة وانتي بديرة ....


2- وفي شباب تسولفين معاهم وتستانسين بالسوالف .. وضحك وجذي .. وبعد جم محادثة .. يقولج دقي وجذي أحس اني اعرفج من زمان وأرتحتلج وتقولين له لا خلاص يحترم رغبتج ويظل صديق بالنت ... بس عاد هااااا .. تحملي صكة البلوكد من فترة لي فترة تحملي الحقران .... من تدشين انا مشغول عادي يعني
( فالأنسب انج تحطينه بلوكد ودليت أفضل ليش ما منه فايدة ايميله زينة موجود عندج)


3- وفي شباب تسولفين معاه مدة طويلة وانتو الاثنين مستانسين على بعض ... وكل شي تمام لكن بين فترة وفترة يقولج بطلب طلب ممكن يبي يجس النبض يعني مسوي تمويه ... لما تردين بحمق نعم شنو !! يقولج لا تقاطعين دشي عاد هااا .... يعني يكون داقرج :) ...
ونوعه انا اصلا ما ابي تلفون ومو مال هالسوالف .. يثقل عليج فترة طويلة ... لكن بعدين يقولج طرشي مسج وجذي يعني شوي شوي ما رده بقولج دقي تلفون ..


4- وفي نوع من الشباب عسل .. ضحكي وسولفي واخذي رايه بأشياء وايد ما يبي شي منج بس كونه يدخل يسلم عليج وبينكم ايميلات عادي عنده وحتى لو ياب دقي علي على ضحك وقلتي لاء عادي عنده مو مهم ... وغالبا خواتج يعرفونه وتكون الصداقة مدة طويلة .. وتكون الميانة واصلة حدها ..


5- وفي شباب نوع اللي انا كيوت وفريندلي ... وسوالفي حلوة ... بس للأسف انه مزاجي لأبعد الحدود .... يعني متى ما يطق براسي أسولف وياج ... ونوع اللي أصكج بلوكد متى ما ابي ومن تدشين يهل عليج .... ويسولف جنج نازلة عليه من السما ( الضحك لما تشوفينه يعلق بالمنتدى بحزة ما انتي داخله يعني انتي غبية تطوف عليج)... وإلا يصكج دليت وانتي مو حاسة ولما تحسين وهم انتي تصكين دليت .... يدش عليج ويصير آدمي ليش ....( لان تحرمص شلون انتي تحطيني دليت يعني اهوه أي بس انتي لاء ) ...

لا والضحك لما يراسلج بالايميل وما يبي يدش عليج يعني ترى أدري انج حطيتيني دليت وعادي عندي خخخخخ )

( لا واللي يضحك أكثر انج ظايفته في ايميل ثاني وحاطته بلوكد واهوه ما يدري والاخ ناسي وتلقينهحسباله انتي اصلا مو شابكه فيطلع عندج إن ايميله شابك بمكان والمكان الثاني لاء :)

والبدعة الأكثر أن هالنوع ( حاطين لهم أهمية وان اذا ما سولف معاج بتموتين وتنتحرين جنه انا بأيميلي ما عندي غيره !!


6- وهالنوع يسمونه المنجب ( اللصقة) ...أو بمعنى ثاني كازانوفا ... يعني كلميني ردي علي لا تطولين ... ألوووو وينج ألوووو وينج ... يا أخي انطر حتى ما صار دقيقتين من رديت عليك .. وإلا انتي حاطه بالخارج والا مشغول ... يدش اشدعوه يبا ما تدشين تسلمين ... وإى يدش يسلم ( يا أخي قلنا بالخارج قلنا مشغول خلاص تقبل رغبتي النفسية والجسدية)

والضحك لما يقول انتي قاعده تكلمين أحد الحين ولما تقولين أي يقول أوكي عيل انا ما اعطلج يالله باي واحسن حقريني ولا تردين علي والا تدرين شلون بحطج بلوكد ودليت ....خخخخ
وييييييه هاذي الساعة المباركة ......


7- ونوع اللي .... ترى أنا سنع وما عندي خرابيط وأعرف ربي .... كل ما قلتي شي قالج لالا والا عيب وإلا اشفيج ... والضحك لما يقولج شنو هالتوبك انصحج غيريه والا شنو هالصورة ترى مو مالت بنت ...يعني يأرفج في عيشتج ... وإلا مثلا واهوه يسولف ما تدرين تكلمتي يرد عليج ( أول خن أخلص كلامي عيب تقاطعيني ( وييييييييييع) ... وبعد هالاستشراف والسنع والمنع ... يقولج حطي صورتج ممكن اشوفها .... وإلا ممكن تطرشين بس مسج علشان اعرف اذا بتشبكين ... يا عمي طيير ...


8- ونوع اللي اللهم يا كافي قاضي أو بالأصح مينون ... تلقين ايميله وصخ والتوبك وصخ والصور اللي يحطهم وصخه ... ولما تقولين له عيب شنو هذا.. يا يقولج أو انا آسف ويغيرها على طول ...أو يقولج كبري عقلج وانا ترى ايميلي ما يقصد الجانب الوصخ لا كل من يرا الناس بعين طبعه أو يقولج دام مو عاجبج ليش قبلتي الأدد ... والصوره كيفي اعجبتني ... ولما تسفلين فيه .. والا تدقرينه بكل وقاحة يطرش ايميلات وصخه وكل ما تزفينه يزيد ( هذا عاد معقد صج !!)


9- وفي النوع الغبي ... الي يقفل ..و كل ما قلتي شي قالج هااااا ... يعني شنو .. أييييي .... وكلا يناقشج في مواضيع ما يفهم فيها شي .. يعني أنا اعرف .. فأهني انتي لازم تعطينه على قد عقله ...



10- وفي النوع المليــــــــــــق... اللي التوبك ماله يبعث لج لوعة الجبد ... وغالبا يكون صغير بالعمر ياهل ... اللي يحط القطوو والعتوى انحاش وإلا انا رايح الخيرااااان ... وإلا رايح فرايديز ....أوووووف غثا غثا ..


11- وفي النوع .. اللي يكلمج وأهوه منفس يعني ترى ما اعطي وي ...وكل ما سألتيه مثلا حبيت .... شنو رايك بالشغلة الفلانية ... خلاص حسباله انج تحطمتي فيه ... وما يدري ان ولا شي !!


12- والنوع اللي يسوي ايميلات وصور والمفروض انها تنكت والبنات واي يونس ضحكني و.....وييع على شنو اصلا ما يعرف ينكت !! والمشكلة مستمر ما أدري منو مشجعه !!


13- وفي النوع اللي يحاول فيج دقي دقي ابيج .. ولما تقولين له مرتبطه وأحب وجذي آخر شي لما يشوف ماكو فايدة ... يقعد يقولج عن قصة حبه :/


14- وفي النوع اللي اوصخ ما خلق ربي .... يعني حثالة المجتمع ... بس يستغل انج مطلقة وإلا عندج مشاكل مع زوجج ... ومسوي روحه المنصح والمرشد ..... ولما تقولين له انا ريلي يخوني .. وودي أسوي شي ابط جبده ... وانتي حسبالج تكلمين واحد آدمي ...فيقولج انا عندي طريقة ( أشرايج تخونينه مثل ما خانج ..... ومع منو طبعا معاه أهو ... يا سلالالالالالالالالام ... اللهم صلي عالنبي )


15- وفي النوع اللي يكون معاج بمنتدى وإلا قروب ... فتلقينه فار على بنات القروب أو المنتدى كلهم .... جنه طايح بجبد نفسه .... والضحك لما يكونون البنات كلهم رفيجات ....!! صج مشكلة ..!!


16- وفي شباب .. صج اتحسين ناس سنعة ... أخلاق وسنع ... وخدومين .... وناس تسمعج كلام يريح البال وناس تنصح ...وتعتزين بمعرفتج لهم ... الله يكثر من أمثالهم ....


17- وفي ناس مرضى جذب من عرفتي بالنت إلى آخر يوم كلمتيه وأهوه يجذب .... المفروض يحط التوبك مسيلمة الكذاب ..خخخخخ


18- وفي نوع اللي يؤذيج بشكله .... كل ما دشيتي راز صورته .... وإلا كل ساعة يغيرها ... يعني أشكره قاعد يوريها الباجي .... لا وإذا كان مجسم شفكج تلقينه مستعرض فيه .... واللي يضحك صج أو ما يدش عليج يبطل الكاميرا ... وإلا يقولج ممكن اشغل الكاميرا ( الحمد الله والشكر بروحه جذي بدون لا تطلبين منه ) .....
ويبطلها ويجابلج ويولع زقارة ومسوي روحه يستحي ... انزين وبعدين !!! لي متى .... وآخرتها لما تطلعين لج أي عذر وتسكرينها ... يا أخي ما قلتلك أبي اشوف ...!!


19- وفي نوع العبيط .... اللي يحطلج صورته ويقص ويهااا .. شهالعبط يعني يكون مفرفط قلبي خخخخخ !! والله حالة ..!


20- والنوع المليغ اللي دقي بقولج شي وإلا شغلي المايك بقولج شي ... أنزين قول اهني لالالا ما اقدر اشرح ..! أي شيييييييييييي !


21- وفي النوع اللي سوالفه مثل ويها كل ما قال كلام وصخ والا كلام مليغ وزفيتيه قالج ترى انا واحد كبير وإلا انا صاحب مركز ...لا تكلميني جذي اشوي ويبجي ... يا عمي طييييير ..


22- وها الآن مع النوع الاخير ... انياهاهاااااااا ... عاد هذا توصية ... :))

هذا النوع المدشق ...هذا عاد بابا أوبح ...هذا عاد اللي من96 وأهوه بالنت ... يكبر يتخرج يتزوج اييب اعيال واهوه بالنت .... والناس يديده تطلع وناس تروح وأهوه للحين بالنت .... لا وعنده قروب أو مشرف بمنتدى وشغل عدل ويكتب بعد بالنت .... المشكلة يتكلم عن الناس ... واهوة من فوقة لي تحته غلط بغلط .... والمشكلة يتكلم يعني انا افهم واهوه أغبى منه ماكو ماخذ فكرة من اهني ومن اهني واللي قاله بس كلمة وحدة ... ومن اتيي مرته يصير جنه قطو مخرعينه ..
وخواااااااااااااف ردييييي ....

هذا النوع ماكو هدف بالحياة ... ناس وصلوا مراكز وسوا لهم شي نافع بالحياة إلا اهو قاعد ... ما غير راااز صورة الفودكااا وترى أنا شريب مستانس الحمد الله والشكر.. وهانوع عنده خرابيط على قد شعر راسه إذا ظل فيه شعر بعد ..!! ..

وهذا النوع يبي بنت بأي طريقة لان خلاص يعني راحت عليه ... عسى ما يته وحدة تشكي .. إلا هااا سوالها الاغراءات .... ترى أنا شغلتي كذا وانا عندي شقة وأنا وانا ( نوع مو شايف خير)..... لا والفنتك اليديد مصور الشقة ويحط أركان الشقة ( شقة المجون) خخخخخخخخ

المشكلة هالنوع مو نافع بشي لا أبو ولا زوج ولا صديق ولاشي ولاشي ..!! وكلا عنده ان اهوه شخصية محترمة ... وشخصية نادرة الوجود ...وأن اهوه فلته زمانه ..!!

والمشكلة بدقيقة تصيدينه من غباءه ... يعني لو تدشين عليه باليوم بكذا ايميل عادي .. وتلقينه يسرد لج قصة حياته .... بالاضافة إلا صورته ..خخخخ

واهوه عنده يعني ان حياته life style وانه اهوه ستايله أمريكي خخخخ ... وأهوه اجلح املح ... أنا أروح حفلات فلان الفلاني وانا عندي بشقتي باااار ..... يا أخي قول شي مشرف ..!!

ودايما تلقينه يقولج عن مغامراته .... حشى سندباد البحري ..!!

والطامة ان يا يسوي روحه ... اعزب وراهي ما يفكر بالزواج .... أو يسوي روحه منفصل ...!!

واهوه متزوج وماكل .... من مرته !!

هالنوع عليه العوض ومنه العوض .. آخرته مستشفى الميانين وإلا مستشفى الأمراض السارية ... أعوذ بالله

ومن كثر الدعوات عليه مو مترقع ...و الله المستعان ....

والله كل شي جايز الله الهادي ممكن يتدين .. ويصير أدمي ...نطلب الهداية للجميع ...

وان شاء الله ان شاء الله ماكو نسيت أحد ..


والسلام عليكم ورحمة الله وبركاته ،،،،




معلومة :
أغلب النت إذا مو كلهم إذا عمره من 30 وفوق ... متزوج .. حتى لو قال العكس ليش يدري اذا قال متزوج محد بيعطيه وي ... وهانوع غالبا تلقينه من اول جات يقولج دقي عليه ليش مستعيل اذا مو انتي غيرك ..
اما بو 40 وفوق هذا .... بدون تعليق :/



وسلامتكم ،،
 
Sunday, September 18, 2005
posted by tasty_as_berry at 2:27 AM

السلام عليكم ورحمة الله وبركاته ،،،،،


الموضوع هالمرة يمكن غير كل مرة .... هذا موضوع صراحة أنا اعتبره قيم .... خصوصا إذا كنتي مسرفه .... أو اتييج الفلوس تصرفينها من غير ما تحسين ... أو ساعات تكونين تنطرين الفلوس نطره بس اتييج ما تدرين شنو تسوين .. ويمر الوقت وتروح على أشياء تافهة أو مصاريف عادية ...

والله ممكن أكون أنا مسرفه بعد J لكن ممكن أكون مفيدة ... وبنفس الوقت ساعات أكون موفرة لكن ما أحط شي في نفسي ..

أنا بقول بعض النقاط اللي ممكن تفيدج في حياتج ...

* الأغراض تنقسم إلى :

1- حاجات ( ملبس - مسكن – صابون ) أي أمر لابد منه لا يمكن تأجيله مثلا للشهر الياي .
2- رغبات ( المكياج الفلاني – جلسة تدليك – سفره) أي أمر بخاطرج فيه مشتهيته لكن ممكن تأجيله .

في هاذي الحالتين لابد من التمييز ولابد من تقديم الحاجة على الرغبة .. ثم .. إبداء الرغبة المناسبة للمكان والقدرة المالية ..

يعني---- > دام الفلوس ما تكفي مو إلا تشترين مكياج ماركة ( عندج بودي شوب وإلا استاندات اللي بلاند مارك طبي وتخيري )

يعني----> دام ما عندج فلوس مو إلا تدليك شدعوه شهرزاد عاد ( نادي إختج وإلا امج تدهن وتدلكج وبس وأجلي التدليك المحترف لما تكون فلوسج راهية )

يعني----> لاحقين على السفر يا اروح وانا راهية واشتري واستانس واسوي اللي ابي يا ما اسافر .


* نصيحة مني لج الفيزا والماستر كارد لا تعتمدين عليهم ويفضل لو تكسرينها مره وحده وتكنسلينها .. ( إلا إذا مضطرة . . طبعا أهية تنفع بالسفر أو للحالات الضرورية ) .


* هناك إثنان مِنْ أنواعِ توفير -- مدى قريب ومدى بعيد. وانتي لازم تخططين حق الاثنين .

1- توفير المدى القريبِ : يُوفّرُ للأشياءِ الذي تريد مثل عطلة أَو عدّة. تَتضمّنُ مدّخراتُ مدى قريبِ التوفير أيضاً للأشياءِ التي سَتَحتاج ، مثل التصليحاتِ للسيارةِ. أنت لا تُريدُ أَنْ تَشْحنَ تلك الأشياءِ وتَدْفعُ فائدةً عليهم . تُريدُ أَنْ يَكُونَ عِنْدَكَ مالُ وفّيرَ لدَفْع النقدِ.
بعْض الناسِ يشترون بالاغراض لفترةِ طويل جداً وكلا ببطاقة الإئتمان بِحيث ما يقدرون يتخيلون توفير المالِ أَو النقدِ الدافعِ . هؤلاء الناسِ يَقُولونَ لي “ إذا أنا ما عِنْدي بطاقة إئتمان، شلون راح أدفع ثمن السيارةَ عندما تَتوقّفُ ” أَو حتى “كيف سَأَشتري ملابسَ المَدارِسِ للأطفالِ في الخريف. ”

الطريقة لدَفْع ثمن الأشياءِ بعد الإفلاسِ بالنقدِ. وإذا أنت لا تَدْفعُ أسعارَ الفائدة، أنت يُمْكِنُ أَنْ تَبْدأَ بتَوفير النقد ، علشان جذي لازم محد يتحجج اذا ما سدد بالفيزا او الماستر كارد أو وت إفر انه خلاص راح فيها ... ممكن إن يعمل حساب هالشي ويكون موفر وعنده كاش .

2- توفير المدى البعيدِ : يُوفر أولياً للتقاعدِ أَو يُوفّرُ لدراسة الأطفالِ. مدّخرات مدى بعيدِ يُمْكِنُ أَنْ تَتضمّنَ 401 (k) في العمل وتقاعد إضافي من المحتمل كجيش جمهوري آيرلندي.


* لما تروحين الجمعية تشترين أغراض وهاذي طريقة صراحة أنا اتبعها ... أكيد تحتاجين( شور جيل - قطن أذون - قطن عادي - كلنكس ) وانتي تشترين شوفي الاسعار وقارني بينهم ... أنتي يمكن بتشوفين فوارق بالسعر ممكن الفرق كبير وممكن اشويه ..

لكن 100 فلس على 200 على 300 جم يصيرون بيكثرون ... عندج مثلا قطن الاذون كلا قطن وعود ... أخذي نوع رخيص في أنواع تكون رديئة وحيل بو طقة وفي أنواع زينة ..

عندج القطن بعد كلا واحد أخذ حجم يكون كبير ورخيص بنفس الوقت حتى يعمر معاج ... شوفي الانواع اللي انتي جربتيها وقارنيها واخذي الانسب لج بالسعر ..

في ناس بقولون قطيعه شهالفقر .. بالعكس هالشي بفيدج .. وفي ناس وايد تتبع هالشي .. وفي ناس تاخذ وتحط ولما تروح المحاسب واي جنا طلع وايد !!


* لازم يكون عندج بعد نظر ... يعني أنا اذا شريت الشغله الفلانية .. شكثر راح يبقا وشنو وراي .. وشنو ممكن أحتاج بعدين ... وأنا شنو ناوية أسوي ..


* قبل لا تشترين الشغلة إذا في مجال تجربينها .. جربيها ... لأن في إحتمال كبير إنج على كثر ما كنتي تبينها .. بس تجربينها ما تكون مثل ما فكرتي وتكرهينها على طول... وإذا كانت مثلا غالية بتكونين استغنيتي عن هالفكرة .


* هاذي طريقة قالتها لي رفيجتي شايفتها في كتاب أمريكي ....
( إنج لما تشوفين شغلة وينيتي عليها تبينها خلي حق نفسج فرصة إذا بعد 10 أيام للحين تبينها أخذيها )


* صرفي أشتري كل اللي تبين بس شنو يعني قدري إنه آخر فلس ينصرف بمعاشج اليوم اللي وراه ينزل المعاش اليديد عرفتي ! يعني خلي معاشج يكفي عدد الايام بالضبط J


* إذا مو قادرة على خط الفواتير حولي للدفع المسبق لأن خط الفواتير إنهيبه على المدى البعيد ..


* طبعا في حال المعاش راهي وانتي رايقه إهني عاد كيفج يعني معاشج واستانسي فيه ... بس اللي خنت حيلي كراف ومعاش حده حده ... اللي مو ملحقين كل ما بغوا شغله طلعتلهم شغله ثانية ... الحمد الله على كل شي ..


* حاولي انج توفرين بحساب ثاني .. أدري إنه هالطريقة صعبة .. بس يفضل الكرت ما يكون عندج يكون استقطاع وتنسين الحساب نهائيا J


* لازم تشتركين في جمعية مع اهلج أو رفيجاتج المهم شراكة مضمونة على حسب إمكانيتج هاذي فكرة حلوة ممكن تستفيدين منها .( الجمعية : تشتركون مجموعة تدفعون قسط معين وكل شهر دور وحدة منكم بحيث كلكم ترد لكم فلوسكم)


* واذا عن الملابس ... الحين خو مو مثل قبل الحين بين فترة وفترة تنزيلات وانتوا شايفين اشكثر تنزل الاسعار ... فانتهزي هالفرص ... ودايما نطري التنزيلات ( قمة النحاسة والمصاخه .. إن حبكت وقت التنزيلات المعاش مو نازل J )

بعدين ترى السوق اييب اليهد .. التفصيل ارخص وأحلى إذا كانت تصميم غريب وحلو ..



* إذا انتي موهوبة وعندج هواية وحرفة معينة تقدرين تبتدين فيها أول شي بين أهلج اشوي اشوي لما تشوفين الاقبال .. مثلا تصممين ملابس وبداية تتعاملين مع خياط .. أو تسوين اكسسورات إذا كنتي مبدعة بشغل اليدوي ... ( ترى بالكويت كل شي يمشي ) ... يعني بالبداية حطي ميزانية شوية تجربين فيها وشوفي شكثر طلعت وشوي وشوي ليما تنجحين في هالشي .


* ترى الكويت كلها مطاعم وكل ما تروحين مكان آخر شي لازم مطعم .. تروحين سينما لازم تاكلين .... مسرحية تاكلين ..... كافيه تاكلين ..... تتمشين سوق آخر شي تاكلين .... أولا صرف فلوس ثانيا حق المتن ...

فالانسب أن الواحد يوفر ماليا وجسديا J منها صحة وراحة نفسة وجسديا لان المطاعم نهيبة وانا شخصيا معاشي كلا رايح على المطاعم والاكل اللي ما منه فايدة .


* اقري كتب عن التوفير وسبل تقدرين تستثمرين منها .. وغيري اسلوب حياتج .. لان النفسية لها عائد على طريقة صرفج للفلوس..

يعني مثلا على حسب طريقة الشخص ...

في بنات .. اذا ضاق خلقها والا زعلانه وعصبت راحت السوق على طول ... وفي بنات اذا كانت مرتاحة عال العال .. ورايقة ما تبي تطلع ومو شرط تصرف تبي تريح بالبيت وتوفر .. وكل وحدة على حسب ..

يعني لازم تكون النفسية اوكي ... ترسمين طريقة حق حياتج وهم حق ميزانيتج يعني لازم اتحددين كل شهر شنو تبين ....

------

وأخيرا أقول إن شاء الله الايميل كان له فايدة وحاولت كثر ما اقدر احصل معلومات من صديقاتي ومن تجارب شخصية ومن مواقع اجنبية ..

انا يمكن وجهة الكلام للبنات لكن الكل ممكن يستفيد منه ... واتمنالكم التوفيج وعساكم على القوة
 
posted by tasty_as_berry at 2:12 AM

السلام عليكم جميعا ،،،



الحوبة كلمة كويتية وعلى حد علمي خليجية أيضا .. وتعني ان الشخص عندما يقوم بظلم شخص آخر بأي شكل من الاشكال او عمله مصيبة أو طيحه في مشكله ..



الحوبة تلحقه حتى يعاقب على فعلته .. بمعنه اللي يظلم واللي يسبب المشاكل للناس سواء معنويا وماديا الله راح ينتقم منه حتى لو كان آخر يوم بعمره ..



الحوبة .. ترى تخرع .. وناس وايد يخافون منها .. لدرجة إنه يتأسف ويتسامح ويكره اليوم اللي غلط في ويطلب انه الشخص يعفو ويصفح عنه بس علشان ينجو من الحوبة ...



محد أحسن من أحد الكل ياخذ نصيبة وإذا مو بالدنيا بالآخرة إن شاء الله ..



هل تخاف من الحوبه ؟ هل تعمل حساب الآخره والعذاب ؟ هل لديك ضمير ؟ هل تضع نفسك دائما مكان الناس حتى تستطيع استيعاب مشاكلهم وأزماتهم ؟



عندما يغلط عليك أحد او يحطك بمشكلة ممكن تقول الله يسامحك انك تاخذ من حسناته ..لانك صفحت عنه والله يأجر على هالكلمتين .. أو ممكن تقول الله ينتقم منك .. أو ربي يشوف فيك يوم ..



ترى هالكلام مو شوية ... يعني اللي يظلم واللي ما عنده ضمير شلون ما يحس في هالشي ولا يؤنبه ضميره !!



شلون ممكن يعيش حياته يعني سبحان الله إذا مو فيه في اهله في أي شخص منه قريب علشان راح يتعذب ويحس أكثر ...



شلون الأنسان ممكن يكون على هيئة شيطان سبحان الله ..

ممكن يكون طمع ؟ أو سوء تربية ؟ أو عدم مبالاة ؟ أو مكابرة ؟






يعني مثلا الشخص يسوي شي حتى لو غلط ويؤمن ومقتنع بأنه اللي سواء كان صح ... فيكابر ويصر والناس أنواع



النوع الاول



قلبه أبيض.. ممكن مع الوقت يحس بغلطته ويتأسف أو أحد يحاول يصلح بينهم ويحاول يعدل الوضع ...



النوع الثاني



قلبه أسود .. انه يظل مكابر لين سبحان الله يطيح موقف خلاص ما يلاقي أحد يمه..



دايما الناس تقول " الظالم سالم " أو "الطيب مأكول حقه" لكن هذا كلا محسوب بيوم القيامة ...



إذا الظالم سلم فهذا .... عقاب من الله لأنه عاش وزاد فساد وظلم وكلا بميزان سيئاته..



وإذا الطيب كلوا حقه ... سيعوض بإذن الله بالقيامة .. ويكون في ميزان حسناته ...



وفي ناس من كثر ما أهمه طيبين يطوفون ويسامحون الشخص.. ودايما يحطونله مبررات .. وأنه كان مضطر ..



وفي ناس تروح .. وتزيد الوضع سوء وترد الصاع صاعين .. وهذا غلط ..

الانسان يعالج المشكلة مو يعالج الغلط بغلط
!!



إذا الشخص كان سيء ليش الانسان يوصل نفسه لمثل المستوى الدنيء !!



بالعكس لازم يكون أرفع منه .. والله بأذنه راح ياخذ حقه ..ويعوضه ..



وياما سمعنا قصص وعبر عن ناس ظلموا وأذوا وسرقوا وضروا ناس ... وشافوها بالدنيا ..



اتمنى .. إن القلوب تصفى .. والضمير يحي .. وأن محد يكون بقلبه شي على أحد ..



قال رسول الله – صلى الله عليه وسلم- " تهادوا.. تحابوا"



والشخص قبل لا يسوي شي يفكر مليون مره بفعله و شنو ممكن يمس أو يضر..



وترى كل شي مؤقت يمكن الظالم يفرح ويفرح بس بالاخر خلاص ما يبقاله شي ولا حتى صدر يضمه أوشخص يسمعله ..



اتمنالكم التوفيج ....وإلى اللقاء
 
posted by tasty_as_berry at 1:12 AM


السلام عليكم ورحمة الله وبركاته ،،

شلونكم :) وشخباركم ؟؟

الحياة الزوجية عالم جديد يعيشه الزوجين ويعرفون يتعاملون ويتأقلمون مع بعض ...

بعض الازواج يجعلون حياة زوجاتهم تعيسة .. فكيف ممكن ان تتعامل معاه بهالحالة .. :)

طبعا للضحك ..هاااا .. علشان محد يسويلي سوالف الفتنة أشد من القتل :/



أولا :

النساء النساء النساء ....مخلوقة عظيمة... اهيه ام أخت بنت زوجة ... لوما اهيه ما انوجد الرجل على الارض ..

والرياييل يحبون المرأه ويركضون وراها .. والمرأه تقدر اتييب أكبر راس ..لذلك استغلي وضعك بأنك المسيطرة :))

بعدين علميه ان ladies first ... وانه اهوه مافيه ذرابه ..

وكلا قولي رياييل آخر زمن .. صج ما تنعطون وي .. وعيونكم زايغة ..

وبين فترة وفتره دشي علي فجأه وخزيه جنج معصبه .. خرعيه اشوي ( يعني حتى لو عنده شي والا مسوي راح يخترع ويرتبك ويضحك ضحكه خرعه وراح يقولج اشفيج!!! )


ثانيا:

أغراض البيت .... غصبن عليه بيشتريهم ... لان اهوه ريال البيت ... واذا ما شرا ... اشتري الشي حقج وخليه ميت من اليوع والا اشتري من بره قولي انا مسويه رجيم :)

واذا سوالج شغل استعباط ما اييب الاكل ولا اللي تطلبينه ...يعني مثلا اييبلج شامبو بدال شامبو ...

روحي الحمام وفرغي الشامبو ماله والا سكري البيلر ( علشان يتأدب)..

وبعدين الحمد الله شهادة وتشتغلين لا ويمكن معاشج اكثر من معاشه .... عندج فلوسج ..
ولا مذلة أحد....!!

وإذا تنيحس انتي هم تنيحسي معاه ولا تحطين فلس بالبيت ..



ثالثا :

فرفطي قلبه قعدي غني وسوي روحج مستانسه وايد ...
وحبطيه قوليله شنو هاللحيه روح اخلق شنو مجرم ...!!!

والا قولي واااي شنو هالريحه ... وسوي روحج تلحقين الريحة ليما توصلين عنده .. قولي هاذي آخرتها منك ..!!

المهم نرفزيه ... تدلعي على مخه .. ..واي اليوم شنو هذا تحرشوا فيني ..!!

واذا انتي تقرين مجلة وكان في عنوان خيانة الزوج .. قوليها بصوت عالي .. ومن هالسوالف ..

وكل ما مر عليج منفس ... قوليله الزاني والزانية .... خخخخخ :)


رابعا:

قولي واي ... تصدق فلانه تكلم على ريلها ...!!

وكل مره وانتي جبال المنظره ... قولي واي ما شاء الله كل مالي وأحلو ولا جني قاعده اكبر ..

واهتمي بروحج خلي يموت غيره .. ويعرف انه العيون عليج ...

ودايما قولي انا الزين معاي زينة معاه ... لاني احب اعامل الناس مثل ما يعاملوني ..

واذا طلع أحد بالتلفزيون قولي واي اشحلاته .. اهوه راح ينقهر ويقولج الحين هذا حلوو !!!


خامسا :

اذا ياج وقالج فلانه اكلها حلووو ... قولي اي والله اتصدق وااي عليها نفس عجيب بالطبخ ..

يعني لا تتركين له مجال يفوز عليج ... وين ما ايي تعاليله ..

وقولي واي انا وديت كيكه .. ريل رفيجتي ين عليها وقالها الا تاخذين المقادير ..

واي واتصدق يوم اهيه سوتها جان يقولها بس ايد رفيجتج غيررر .. :))

طبعا لو مو صج شلخي علشان يفور ..


سادسا :

كلا بيني انج احلى منه ومعروف الحلوه تاخذ جيكر ..خخخ :)

واذا قالج ترى انتي مو حلوه ....
قوليله مو انا خليت الحلاة كلا لك ..!!

واذا قالج يا الجيكره .. قوليله اي والله اتصدق ... اشوه انك رأفت عليه وتزوجتني ..!!

لا تتركين له مجال يعيب ... دايما اهتمي بنفسج ...
واذا حاول يعيب ... قوليله أصلا امك قالتلنا انك لما شفتني ينيت علي وقلت ما ابي غيرها ...خخ

حتى لو ما قال بس جذي رفعي ضغطه واذا قال :جذابه..!!

قوليله: علينا ..!!



سابعا:

واذا تذمر وقال فلستوني .. أذيتوني .. قوليله ...

مو الرجال قوامون على النساء ..!!

قولي بعد هذا الزواج اللي مو قده لا يتزوج ...!!


ثامنا :

طبعا .. الواحد مو معصوم من الغلط ..

اذا صدتي علي شي .. اي كان .. حطي بالذاكرة ..

ودايما قوليله تذكر يوم سويت وحطيت .. وييييييييك وييك .

ما ابيك تعيدها فاهم ..!! خخخ مثل الياهل ..

اذا قالج انتي غبيه والا ما اتعرفين ...تطنزي عليه .. كلا قوليله البروفيسور ..

واذا كان اقل منج بالشهادة .. قطيها بويهه ... قوليله معاك فلانه الفلانية بكاليريوس او ماجستير اين كانت شهادتج ...!!



تاسعا :

وايي اليوم رحت .. سوق الاتحاد أو سوق المعلم .. لقيت شلة هنود ملتمين يشترون باجامات ..

نفس النمونه اللي اتحبها ... ييت بشتريلك ..بس حسافه ماكو مقاسك ..!!

والا مثلا قوليله .. طلبت مقاسك من المحل لفلاني قالي .. اللـــــــه !!... هذا المقاس يمكن تلقينه في محل المقاسات الكبيرة..

وانتي لما تشترين حق نفسج .. قوليله شوف من السوق الفلاي بالسعر لفلاني ...



عاشرا:

بهاذي عاد انتي صيري الاحسن ... واذا اهله زينين صيري معاهم زينه ...

الاهل بصوب وأهوه بصوب ... بالعكس كلا قوليله اخاف انت مو مولدهم . متبنينك !!..خخخخ :))


الحادي عشر :

شوفي .... اهني عاد سوي أفلام وقصص وكل شي من خبرة .. ولعبي في اعصابه .. طلعيله قرون ...

خلي اشوي ويبجي ....

كلام فاضي مثل ذلها وقت المعاشرة وخلها اهيه تطلب كلام فاضي ..!!

حبيبتي انتي المسيطرة اهني ..

مثال : اذا حسيتي يبي شي وقاعد ينطر ... سوي روحج مشغوله وماطلي .. وسوي روحج مندمجه بفلم .. وكل ما تكلم قوليله اششش خل اسمع ..

ويا حبذا لو كنتي كاشخه ..ولما تخلصين وتدشون الغرفه اول ما يروح والا تكرمين يدخل الحمام ..

سوي روحج نمتي على طول ... ولما يقعدج قولي اووو تعبانه .... خخخخ :)



الثاني عشر :

دايما اذا يبي شغله منج ... بنفس الوقت قوليله حبيبي .. انا بعد ابي جذي وجذي ...

طبعا ما راح يرفض لان مصلحته عندج ... فدايما عاملي ... ان كل شي بمقابل ...:)


إلى اللقاء ،، :)





 
Friday, September 09, 2005
posted by tasty_as_berry at 1:03 AM

السلام عليكم ورحمة الله وبركاته ،،،



شلونكم وشخبارك؟ اتمنى انكم بخير وبصحة وعافية خصوصا في وقت عصيب تعيشه الكويت بسبب الارهابيين والله يشافي المصابين ويرحم الشهداء ويغمد روحهم الجنة يا رب ...



انا من زمان ما كتبت شي المخ مقفل شوي ... ييت ابي اكتب عن الارهاب أرفت أوي أوي لاعت جبدي وما كملت حسيت مجرد اني اتكلم بالموضوع راح انغث



المهم أبي اتكلم في موضوع بخاطري من زمان اتكلم فيه ... يبيله قعده اللي أهو الحــــــــــــــــــــــــــــــــــب



الحب شي حلو .. ما نقدر نستغنى عنه حب الام الابو الاخوان الاصدقاء والناس جميعا ... والحب أنواع طبعا ...



انا بتكلم عن حب الطرف الآخر ... الي ما يعوض بحب ثاني ... في ناس تقول دام الاهل يحبونج واصدقائج وكل شي ما راح يكون عندج نقص ..



وانا اقول ماله شغل ... راح تنسين الموضوع مرة مرتين يمر الوقت لكن تحتاجين هالشي عاجلا أم آجلا ... هذا شي فطرة ..



انا ما أقول ان ظروري ولازم كل بنت تحب لا مو شرط ممكن تحب ريلها .. هم شي حلو .. لكن اذا طول الريل !!



علشان جذي يقولون الزواج ســـــــــــــــتر..



طبعا الحب له أصول ... ولو قوانين ... الحب شعور ايي من كيفه المحبة من الله ...



بس منو اللي يقدر الحب ويمشي على الاصول !! منــــــــــو!!



اللي مو قد الحب لا يحب ...اللي ما عنده كلمه .. مو قد المسؤولية .. ما يعرف يتصرف .. لا يعلق بنات الناس ..



انا اللي اعرفه الحب ... أثنين يحبون بعض دام استمروا وحابين بعض نهاية الحب لابد انها تكون زواج .. إذا كان في ظروف راح تنحل لكن لازم يتزوجون .. وإذا حسيت انك ما راح تقدر تاخذ البنت ولظرف اقوى منك خلاص تعتذر وما تكمل من البداية ..





ما تبي تتزوج لا تحب .. لا تعشم .. تبي تلعب يالله ما كثر البنات اللي يبون يلعبون لا وبدون فلوس بعد تبي روح ...



لكن تفر على بنت وتجذب وتسوي قصص وانت متاكد انها بنت نظيفه بنت زينه بنت تخلصلك وتصونك تعطيك

عمرها ... انزين ليش تستغلها

لا عشتووو ما يبي أي بنت ..ما يبي أي شي ..... !!



مو انت أي شي .. ما تصلحلك الا اللي نفس نمونتك تدري ليش ...!! علشان في أي وقت تعطيك طاف وتمشي...وتخليك تولي



الحين شنو...

يحبج يموت عليج .... ويبجي وتلقينه جبال ويهج وين ما تروحين .... بس شنو ما ابي اتزوجج ..!!



المشكلة يقول احبج ... شنو إحساس ..!! شنو قلب..!!



واذا سألتي ليش ما تتزوج ... قال ما عندي فلوس .. انا مو قد المسؤولية .. ما راح تقدرين تتحمليني .. اهلي ما يرضون ..!!



أنا برايي كل ما طالت الفترة كل ما مصخت السالفة وبينت عدم الجدية ..ترى زمنه الحين غير أول الحين كل شي نعرف كل شي مفتح جدامنا .. تعرف الشخص من عيونه من صوته .. من فترة قصيرة ..



الواحد لما يحب يتعلق بالشخص .. بعد فترة خلاص يتمنى قربه .. يتمنى يكون شي أكبر بحياته ... يبي يعيش معاه في بيت واحد يبي عيال يبي يشاركه لحظات وايد .. يبي الشي علني وبعلم الجميع ..



لكن بعض الرياييل ما أدري شنو موقعهم من الاعراب الحين .. شنو هدفك .. شنو اللي للحين ما حققته .. !!



مــــــــــــــــــــــــــــــاكو ...



المشكلة كلهم يقولون ما نبي نتزوج ..... بس تهده البنت ينزل عليه الوحي ويروح يتزوج ويطيح على بنت مثل ويها ...



والوقاحه لما يقول يعني شنو أجذب تبين اعشمج ... انا قاعد اقولج الصج ... بنات ما يبون الصج يبون الشخص يقص عليهم ويعشمهم بس ..



عادي نحب بعض نقعد مع بعض نرتاح مع بعض انحس في بعض ... وما راح اوقف نصيبج بالعكس اتمنالج الخير .. اتمين عزيزه وغالية .!!!



يـــــــــــــــــــــــاه ..... شلون جذي !!



انزين انا شنو بالنسبة لك ..هذا حوار ؟



(أصدقاء )... لا ..لا .. قاعدين بأمريكا ..!! بعدين اللي تبي واللي في بالك مو حق الاصدقاء ..!!



(اختك) ..... هاهااااااااااااااااااااي ما اعتقد !!



(مرتك ).... أي تكفى قول أي خل اضحك ...



بقول : لاء.. انتي حبيبتي ... في أي قاموس ما ادري .. !!



قصدك "خليلتي" طبعا بمعنى أذب يعني



لاء لاء لاء انتي مو خليلتي الخليلة تاخذ فلوس .... انتي لاء ....خخخخخخ







يعني يكون مادح يخرب بيتــــــــــــــــــــك





المشكلة الحين الغالبية تفكيرهم وصخ وصخ وصخ هدفه يكون واحد لا غير





طبعا ما انكر ان في بنات يبون يلعبون ... وذكرت هالشي يعني :

تلعب + يلعب = ينيازون كيفهم بالطقاق



الحب اعمى علشان الجذي البنت لما تصدق وتحب .. تضحي وايد .... بس عاد مو أروح أخذ قرض علشانه !!



هذا اسمه غباء وسذاجه ... لما يكون سلف وينردون .. غير لما ينقص بعقل البنت وينلهفون ولا كانه شي صاير ..



المشكلة يجذب ويعيش الدور ويصدقه ... والله قهر ..!!



للأسف إن البنت كل ما كبرت تحتاج الحب ... لكن وينه الحب ..!!



انا ما ادري حتى شلون أعرف اذا الشخص يحبني والا لاء .. صار الجذب فنون .. والتصنع حرفه ... للأسف تشوهت صورته ..



واللي يبينه عيت النفس تبغيه واللي نبيه عيا البخت لا يجيبه ..



اشفيه الحب الشريف .. اشفيه ..!! ليش ما يكون خالي من الرغبات الجنسية ..!! صعبة يعني وايد !!



يا تصيب .. يا تخيب ... الهوى قسمة ونصيب ... الله كريم





والله عاد قلناها مليون مره اللي بيلعب بحسبه البنت ... اخته قاعد يصير فيها نفس الشي ... الدنيا دواره ...



وهم قلنا الفرصة الزينة ما تتكرر ... والبنت السنعه ما تتطوف ....



نصيحة للبنت كوني قوية .. وانتي حره نفسج ... لا تضعفين .. لا تستسلمين .. لا تطوفين ..



تبين الحب لازم اتحبين الشخص اللي يخاف عليج ويحترمج غصبن عليه ... واللي ما يبي بالطقاق ..



ما اقول كل الرياييل جذي .. بالعكس في ناس تحب وناس تخلص ولا تعشم ناس زينه ... لكن انتي وحظج ..



هاذي مو دعوة للحب ... لا لا مثل ما قلت الحب ايي صدفه ومن الله ... لكن هاذي دعوه للخوف من الحب ..



واتمنى الخير للجميع ...... إلى اللقاء ..