Sunday, December 11, 2005
posted by tasty_as_berry at 12:09 AM

وايد أقعد أفكر في هالسؤال ...

يعني بمعنى لو كان للوحدة ماضي بجميع الاشكال .. هل هذا شي راح يظل يلاحقها طول حياتها ..!!



يعني البنت إذا مرت في علاقات وفشلت أو حتى كانت الضروف والزمن أقوى منها أو حتى أغواها الشيطان وندمت على فعلتها أو بحكم جهلها وصغر سنها.. هل هذا معناته انها وحدة مو زينة ؟؟وان خلاص راحت عليها ..!! وما يحق لها تعيش حياتها ..!!

كلنا ندري الشخص يغلط ولا معصوم من العلاقات ..


وأنا المحبة من الله .. والحب مو حرام ....الله سبحانه وتعالى يقبل التوبة .. والله غفور رحيم ...


هل لي هالدرجة الريال قلبه مو كبير .... ولا فيه ذرة تسامح ... الرياييل ينحاشون أو يتحاشون وحتى يرفضون البنت التي كانت لها علاقة أوعلاقات ....

مع ان وفي غرارة نفسهم يدرون ويعلمون الكثير من البنات مروا في علاقة ... ولكن يفضلون عدم معرفتهم بهذا الشي ...



والمشكلة لما يقول " أصلا ماكو بنية ما كلمت " .... وإذا رديتي عليه وقلتيله خواتك بعد ...

يعصب ولا تناقشينه .... لان ما عنده حجي ولا عنده رد ...!!

البعض يفكر بمعنى الماضي انتهى والحاضر اهوه المهم .. وهذا هو التفكير السليم .. ( الرياييل السنعة)

والبعض اللي يحب وبعدين يدري بماضي البنت ويكون عنده علم سواء مصارحة منها أو بمحض الصدفة .. ويرفض بشدة ويروح يخطب ثانية لا يعلم عنها شي ..(( واللي من المحتمل يكون عندها وعندها وعندها وللحين مستمرة حتى ما تابت ))هل هذا شي منطقي ..!!

والا يعني أظل عبيط وجاهل أحسن ..!!

وبعض الرياييل يتزوج ... ويسوي حق مرته فلم رعب يبي ينبش من وراها يسألها : كلمتي .. حبيتي ؟؟ ...

يا ربي فهموني والله هذا أغبى سؤال بالعالم .. ممكن يسأله الريال حق حبيبته أو مرته ..

انزين انت خطبتها وملجت عليها ... يا أخي دام انت شكاك وماره عليك سوالف .. يعني شنو ما سألت عن البنت ..!!

يعني بالذمة .. الجواب شنو بفيدك فيه ..!! لو شنو ما راح اتعرف

الصج من الجذب ...!! لو شنو ..!!

المشكلة حتى لو قالت أنا ما كلمت بحياتي كلش ...( هم بقول أقص إيدي)أنزين ليش سائل من الأساس...!!

أنا ما اقول هالشي بمعناتة البنت اتخربط اتخربط ولا خلصت قالت انا تبت وخلاص .. ولا معناته إن كل البنات كان لهم علاقة ..مو هذا المغزى .. لكن هذا الواقع

يعني الريال ما يغلط ..!! ما عشم ..!! ما زنا .. إلى آخره ..ليش الريال لا كمل 30 ... البنت تقول يالله أحسن بعد مخربط وشابع ..!!بس لأن الريال شايل عيبه .. يعني شنو مو حرام ..!!


الله سبحانه وتعالى ما واسى بين العقوبات ( الزاني والزانية) ..!!

بسم الله الرحمن الرحيم

" الزانية والزاني فاجلدوا كل واحد منهما مائة جلدة ...وليشهد عذابهما طائفة من المؤمنين ... " صدق الله العظيم (النور24: 2-3)



طبعا انا ما قصدت أنها لدرجة توصل الزنا ... لكن حبيت أبين أن المرأة والرجل واحد بالعقوبات ..


قصة قصيرة :


مرة بنت تزوجت وكان لها علاقة من قبل ... وبعد ما تزوجت .. قعد معاها ريلها ويسولف معاها عن ضرورة المصارحة ... وأن الانسان مو معصوم من الخطأ والله يقبل التوبة ...


وراح يسولف عن ماضيه وكنت احب فتاة وجذي ... وأصر على زوجته بأن تخبره عن ماضيها وطمنها من هالناحية وان اهوه متفهم ولا يهمه ماضيها ..

فقالتله انا حبيت وخطبني من أهلي ورفضوه وهذا الكلام من زمان وخلاص نسيته ...

طبعا حقرها ... طنشها .. وانقلب 180ْ ... قالتله اشفيك ...!! بس ليش قلتلك اني حبيت .. انت الي قلتلي قولي ..!!

وبس طلقها ... بحجة أنا ما أبي اكون الثاني ...

وتزوج ثانية .... :( واللي من المحتمل اهوه العاشر !!

والرياييل يعلمون ويسمعون ويدرون باللي حاصل أن .. معظم الشباب يخلق للبنت جنة ..!!

وللأسف يستغلون كلمة الزواج ( اللي يااااااه اشكثر هالكلمة كبيرة وبحد ذاتها التزام ) ....لإغواء البنت ...

ليش ؟؟

صاروا مثل النمل يدور حلاوة ..... حتى مواقع الزواج بالنت ما خلوها ...!!

بحجة (اخاف بس في زواج بالنت )..... وانت اشعليك ... استح على ويهك !! مواقع التعارف يالله ما كثرهم ...


ليش هذا الانحطاط ... وأغلبهم متزوجين ... يحوسون بمواقع الزواج .. بس يدور وحدة يتعرف عليها ..

(انا وعبر الايميل أناشد أصحاب مواقع الزواج ... بحذفها وإلغائها ... لأنها لأسف مو قاعدة تستغل لغرضها الأساسي ... )


وبالنهاية ما اقول إلا فتحوا عقولكم المصينة وعاملوا الناس أحسن معاملة ... وراكم أهل وبيت وعيال ...


والسلام عليكم ورحمة الله وبركاته ،،،،
 
2 Comments:


At 6:04 AM, Anonymous Anonymous

Allah amir bel sitar! malah da3i sowalif qadeemah; what really matter is being loyal to him/her since day 1 of commitment

 

At 4:52 PM, Blogger tasty_as_berry

هلا والله

عدل كلامك وهذا اللي بوصله ... اللي فات مات ... المهم شخصية الانسان نفسه وإخلاصه ..

يعطيك العافية ،،،