السلام عليكم
اول شي كالعادة احب اشكرج على صراحتج ووضوح افكارج اللي موجودة بالغالبية الا ان الفرق بينج وبينهم انج ماشالله عليج قادره تعبرين عنه

مدونتج فيها اكثر من موضوع لكن موضوع الزواج لأنه من اكثر المواضيع حساسية وصدقيني لو مدونتج فيها موضوع واحد عن الزواج بس تأثيره بيكون اكثر من غيره وبيشد اكثر

ومن منا لايطمح للسعادة والاستقرار

اقول عسى الله يوفق الجميع ويكتب اللي فيه الخير انشالله

والله كنت بروح أنام بس ما قدرت ما أعلق

أول شي برافو على كتابة هالموضوع

لما نكتب عن موضوع يعني أن فيه شيء يهمنا أو يستفزنا فليش ننكر خاصة أن التفكير بالزواج أو الحلم بالزواج مو شي معيب او مخجل انا مادري الناس شلون تفكر !!!؟ يعني عشان أحد يكتب عن الزواج ومهتم فيه يعني قاعد يطر شريك حياته !!!!؟ شنو هالتخلف

ياستي ولا يهمج يروح بلبل ييجي مية بلبل :p
قولي اللي بقلبج كله , ارضاء الناس غاية لا تدرك ولا يهمج أحد

أنا أفكر وايد بالشخص المناسب لي أو على قولتج الفارس الملثم هل فعلا راح اصادفه بحياتي والا يمكن ما اكون محظوظة كفاية ؟ والزواج هم أفكر فيه بس أحسه هم وأحاتيه مادري ليش ما أحس أن تجربة جميلة أحس فيها وايد التزامات ووايد أحاتيها بس أعترف على طول أني افكر بهالشي احسن شي فيني اني اعترف على طول بدون تحقيق
لول

السلام عليكم ورحمة الله وبركاته
اهلا اختي تستي بصراحة ما تعودنا على القطاعة
حيث انني في الأيام الأخيره زرت المدونه اكثر من مرة
عل وعسى ان اجد شيئا مما تخطه يداك
اصبح الموضوع ادمان قراءة
وهذا يرجع للإسلوب الذي تتمتعين بة
وهو ما يميز كتاباتك عن غيرك
حيث انك دائما تتطرقين للأمور الواقعية
والتي نعايشها دائما في حياتنا وقد تكون
هي محور الأساس
على العموم حبيت اقول لك عسى ربي
يوفقك انشاء الله للأمر اللي تطمحين له
ويرزقك ابن الحلال اللي يقدرك ويحطك بعينه
وانشاء الله تكونين مثالا للأم المثالية
بالتوفيق ان شاء الله

السلام عليكم
حقيقة كان رأسي تعليق طويل جدا ترددت في كتابته لكن التعليقات قبلي غطته او اغلبه
...
لا اعتقد ان هناك الكثيرين ممن يعتقدون ان الكتابه عن موضوع ما يعبر عن هوس داخل الشخص، سواء كان الموضوع هو الزواج او غيره، لكن حساسية الزواج بالنسبة لنا كموروث تقليدي يخلينا نتردد عن الكتابه اوالتعبير عن رأينا فيه، خصوصا عند البنات
...
كون مدونتك صريحة "جدا" بالنسبة لي في تطرقك لمواضيع نعرفها جميعا لكن بعضنا يراها طبيعية والبعض الآخر لا يحب الدخول فيها، واعتقد هذا من اهم الاسباب التي تجعلنا نعود لقراءة جديدك :)
..
كما قالت تويتي في تعليقها.. ارضاء الناس غاية لا تدرك، خصوصا في مجتمع مثل مجتمعنا تكثر فيه الخطوط الحمراء الغير منطقية, لذلك فالتعليقات التي تصلك نقدا لكتاباتك عن موضوع مثل هذا يجب ان لا تضايقك
..
لن تتغير حياتنا الى الافضل اذا وضعنا لانفسنا او فرضت علينا خطوط حمراء حتى لا نتحدث او نفكر في امور نهرب منها
لذلك فالأولى ان نضعها امامنا ونكثر التفكير فيها على الاقل للوصول لما نريد.
....
....

ربما اكون من القراء المقلين في التعليق هنا او في اي مدونة اخرى
لكن حين اجد ما اضيفه في تعليق اسهب فيه لين يطلع تعليق دفش حبتين...
يعني يا ظلمة يا سراجين.

سامحينا على الاطالة

صعبة جدا الحصول على الرجل المثالي..والاصعب منه البحث عن هذا الرجل

ولكن وفي المقابل تستطيعين ان تقولبي زوج المستقبل ليكون على الاقل مثاليا بنسبة كبيره

كونك لم تتزوجي ولم تعاشري وتعايني الحياة الزوجية رؤية العين وتكوني انتي في منتصفها كأم و زوجه ومنقذه احيانا..امر لايعيب ولكن من المفترض ان تعركي نفسك في مثل هذه الامور حتى تكتبي عن الرجل ماتكبينه

قد تكون كتاباتك نانتجة عن من هم حولك او عن تجارب صديقات لك ..الخ ولكن الكتابة برأي الحقيقه تنبع عندما تدخلين هذا المعترك معترك الحياة الزوجية..هنا يمكنك القول انك تعرفين الرجل

:)

الله اوفقك تستاهلين كل خير بس لاتنسينا بالعزيمه

Anonymous
=========

وعليكم السلام ورحمة الله وبركاته ،،

تسلم ومشكور ما تقصر .. كلا من ذوقك وطيبك .. وهذا اللي حطيته في بالي أن هالمواضيع دايما تجذب وهذا سبب من الاسباب اللي يخليني اختار هالنوعيه من المواضيع ..

أجمعين ويعطيك العافيه،،


tweety
=======

نومة العافيه قلب ..

انتي اللي فهماني :)

اتصدقين دايما يحكمون على الشخص لما يكتب عن موضوع معين أن عيب فيه !!

مع اني ممكن اتكلم في شغلات وايد .. والحمد الله عمري ما فكرت اكتب علشان ارضي أحد ..

لكن شنو سبب التسائل والحيرة أني اتكلم وايد في هالمواضيع .. ما اعتقد شي غلط وشي صعب ويحير !!

وآنا شنو ذابحني غير المحتاة والتفكير ..:)
على ئولتك يا اختي .. ربنا يعمل اللي فيه الخير ..

بالتوفيج :*


so_what!!!
==========

وعليكم السلام ورحمة الله وبركاته ،،

هلا والله :)

تسلم والله كلا من ذوقك يعطيك العافيه ما تقصر ... والله في مواضيع كثيره في بالي بس لهيت اشوي ...

والبرد مكسلني حيل لكن آنا قاعده احاول بين فتره وفتره اسوي تغيير حتى لو ارفع مواضيع قديمه .. لأني اعتقد أنها لم تأخذ حقها ..

لكن اوعدك أني راح اكتب بشكل متواصل بإذن الله ... ويشرفني وجودك وقرائتك للمدونه ..

مشكور وايد .. والله يوفقك وينولك اللي في بالك ..حياك الله

A9eEeLaH
========

هلا حبي ... انا بخير يسلمج قلب .. على قولتج ..

وهذا اللي مخوفني من الزواج لوووول .. أخاف لما اجربه أهون ..خخخخ

يختج مو طالبه غير الراحة والزواج اللي ما وراه راحة بلاه ..

تسلمين بعد قلبي ..ما عليج زود :***


moodless
=========

وعليكم السلام ورحمة الله وبركاته ،،،

هلا والله :)

خذ راحتك قول اللي بخاطرك .. حتى لو كان انتقاد ...

انا اعترف مواضيعي صريحة كوني كشخصية حتى بحياتي صريحة .. لكن كوني ما قلت شي ما يقلل من قدري انا مطمئنه ..

انا كتبت هذا الموضوع لأن مو شخص ولا اثنين ولا حتى ثلاث كانوا يتسائلون ويحتارون في طبيعه مواضيعي .. ما كانت تعليقات أبدا .. كانت من أصدقاء لي ..

انا نفسك مقلة في تعليقاتي لكني قريت الكثير من المواضيع ..ولما ما الاقي شي اضيفه اكتفي بالقراءة او فقط التعبير عن اعجابي :)

حياك الله ويعطيك العافيه ،،،


Krakatoa
==========

اهلين :)

صحيح صعب جدا جدا .. والاصعب مجرد التفكير فيه ..

صدقني انا ما اطلب زوج مثالي .. لأني مستحيل احصل عليه الكمال لله وحده ..

مثل ما قلت خبرتي تعتبر ولا شي لأني ما جربت علشان احكم على الريال كزوج ..

لكن من حولي ابوي ريل اختي اخوي صديقاتي ... كان هذا الناتج .. وانا بكل تواضع أقول أني فتاة عاديه لا دكتوره ولا حتى تخصصي له شغل انا تسويق يعني بعيد ..

لكن مجرد راي أقوله ومو شرط يكون صحيح ..:)

اعتذر إذا كانت كتاباتي توحي بأني حدي متأكدةوواثقه من رايي انا اصرح لك واقولك ترى انا فتاة بسيطه ورايي على قدي :)

حيا الله .. نورت البلوق

غريب
====

عاش من شافك ... تسلم والله وبالوفيج لك وللاجميع حاظرين افا عليك انت اول واحد :)

حبيبتي إنتي كنت حاسّة بهالشغله يوم كنت بسنج وترى كل شي الله كاتبة بيصير ويوخيتي كان من أهدافي بالحياة إني أكوّن أسرة تدرين حلو شعور الأمومة واقترانج بزوجج روحيا يشاركج بكل شي..لكن بعد ماتقدم فيني العمر وبقالي سنه ونص وأصير 30 ماعاد فرق عندي تزوجت أو قعدت تأقلمت مع الوضع وحجي الناس مايهمني دامي مقتنعة بشي إسمه القسمة والنصيب وكتبة ربي لي

آنا ماأشوف إن فيج شي اسم الله عليج مبيّن من أسلوبج إنج إنسانه واعيه وراقيه وفاهمة ولاتشّكين بنفسج والله فوق وعارف وشايف إنتي شنو فلاتحاتين نصيبج بتاخذينه إنشاءالله

عموما الله يساعدج إنشاءالله ويرزقج بولد الحلال إللي يستاهلج

السلام عليكم
والله يا فتاة الخليج
اللي لفت نظري بمدونتج انه باين عليج وحدة مبلتعه و حجاويها اتينن
حبيت اعلق على بداية بوستج
و اللي ذكرتي فيه مدى اعتزازج و حبج لمدونتج عشان فيها قدرتي تكتبين اللي في بالج و تقولين رايج بكل اريحية
راح ازيد على كلامج يا طويلة العمر و اقول
ان المدونة مثل الصديقة العزيزة اللي تقولين فيها اللي تبينه و اهيا بدورها ما راح تقصر راح تكون حيادية و راح تعرض اراء و افكار متنوعة و مختلفة و ماافي اجمل من جذييي
الله يخليج لمدونتج و الله يخلي مدونتك لج يارب
و بهوووت شكريا على البوست و ناطرين اليديد

ana_sokkarah
=============

هلا يا عسل ..

والله يا سكره طول عمري قنوعه .. وعندي قناعة ان نصيب وراح ايي لي عندي ..

والزواج مو شي حتمي .. يعني مو كل شخص انتهت فيه الحياة كان متزوج ..

لكن الفكره كلها .. أني ليش اغبي رغبتي وليش ما اتكلم في الموضوع .. شنو المانع ..

ليش دايما يشفقون عليها ويقولون .. مسكينه ميتة على الزواج والريل :))

والريال والمرأه محتاجين وجودهم مع بعض وهذا شي طبيعي ..

وهل كوني أقول هالمواضيع في المدونه .. معناته اني في بحث عن الزوج في الانترنت !!! أو احاول كسب اعجاب شخص ..!!

لا يبئا علي العوض ومني العوض :)))

إذا كان هذا تفكير البعض .. فهذا ناتج عن المخ المصين لديهم ..


بحرينية
========

وعليكم السلام ورحمة الله وبركاته ،،

حيا الله أهل البحرين ..:)

تسلمين بعد جبدي ... انا مو مبلتعه انا فطينه وعقلي كبير .. فيه فرق :) لوووول

تسلمين حبيبتي كلج ذوق ..الله يخليج لأهلج .. وحياج الله بأي وقت ..

انتي بهوت .. بهوت ..خوبسورت لركيهو :)

تحياتي لج ،،،،

عزيزتي
الزواج مو اساسي علشان تعيشين سعيدة المهم اهو انك تلاقين شخص يساعدك على انك تكملين يومك يشاركك جزء من اهتماماتك والكثير من احلامك والاهم يخلي الامور تمر بسهولة اكبر من لما تكون على قلبك بروحة .
دايما انصح لا تزوجون علشان الزواج والسلام تزوجو الانسان اللي راح تكملون ايامكم معاه
اتمنى انك تلاقين نصك
والاهم انك تكونين سعيدة ومستقرة

Nachla
======

هلا والله

انا معاج بالضبط باللي قلتي وانتي تقدرين تقولين انج عدتي كلامي ..

انا ما ربطت السعادة بالزواج .. كثر ما تمنيت الزواج إلا مع شخص مناسب يوفرلي هوالسعادة والراحة :)

==============
المهم اهو انك تلاقين شخص يساعدك على انك تكملين يومك يشاركك جزء من اهتماماتك والكثير من احلامك
===========================

هذا بالضبط ما اتمناه ...

يعطيج العافيه ،،،

السلام عليكم
اهلا اختي تستي
بصراحة شفت الفيديو وتنقصته لك
http://www.youtube.com/watch?v=HeAqzSfF6Cw

so_what!!!
===========

وعليكم السلام ورحمة الله وبركاته،،،

اهلا فيك :)

تسلم والله من طيبك .. مشكور وايد وايد وايد ..

الفيديو حده عجيب .. ورومانسي ..

اتهقى في جذي .. يعني !! :))

يعطيك العافيه ،،،

صراحة بعد ما قرأت بوستج حسيت بمشاعر البنات اللي انا وحدة منهم وهوالرغبة بالزواج.. بس من وحدة لى وحدة يختلف الاحتياج

وترى واقع عزيزتي في ناس تتعذر بالدراسة أو أسباب أخرى ويكونون صادقين في هالشي وفي ناس تتعذر كذب

بس ترى الزواج للزواج مو شي، العبرة بمنو الشريك هل يناسبنا هل قلبنا يهف عليه ؟ اذا هل الأمور ما توافرت يصير الزواج تابوووت والعزوبية وايد احلى

تحرري من قفص التقاليد المتخلفة وعبرى عن رايج مثل ما تبين ...البنات والشباب بالنهاية اثنينهم ينتمون الى فصيلة البشر عندهم احاسيس واحتياجات واللي يقولج عيب خل يستريــــــــــــــــح

احنا نسمعج وخلى الكون كله يسمعج لا تحطين المجتمع حاجز تركي هالمفاهيم المستهلكة تولّي تكفيــــــــــــــــن

Miss Writer
============

اهلين :)

اي والله عدل كلامج يختلف من وحده لي وحده ..

صاجه في بنات لهم أسبابهم الخاصه وأسباب مقنعه بعد ..

لكن في نوعيه تشلخ عليج على الفاضي ..

والله صدقتي الواحد بعد التعب والشقا والدراسه والشغل يبي يشوف الراحة مع انسان يستاهل ..

أقولج شي واللـــــــه ثم والله إني لو أدور الزواج وبس كنت حصلت عليه من زمــــــــــان ..

لكن العمر موش بعزأه :)

فديتج والله ...ويعطيج العافيه :*

تعجبني جرأتك في طرح افكارك

barrak
=======

شكرا:) .. أحب اوصل المعنى بنفس الطريقه بيني وبين نفسي .. علشان يكون صادق اكثر :)

اسعدني مرورك .. نورت ،،،

سيدتي
أولاً لازم أقول أنني أشتقت إلى كتاباتك ومناقشتك

شوفي أختي يجب أن نقتنع أننا مجتمع متخلف الذي نعيش به
المجتمع الذي يبيح للرجل كل شيئ ويرى أن المرأة ليس لها صوت يسمع ولا أقول رأي

ما المانع أن تقول البنت انها بحاجة للزواج والرجل يحق له أن يتكلم في نفس الأمر ليل نهار
تكلمي وقولي ما شئتي مادام ما تتكلمين عنه لا يخالف قناعاتك أنتي وليس أحد آخر

ودمتي بخير

قبل قبل لايابوا طاري الزواج البنت تنزل راسها ....
قبل والاول تحول
وعقبها لاقالوا للبنت الفال لج تقول تو الناس او تسوي روحها ما تسمع
الحين يا وخيتي الامر مختلف...الحين قبل لا تكملين دعوتج تفج ييبها وتقول آآآآآآآآآآمين
حتى مره بقيت عيني....
قلت حق وحده ان شا الله يرزقج الريال الصالح
جان تقول انشااااااااااااااا الله من قلب
البنت كانت بأولى ثانوي وانا كنت اتحرش
هههههههه
ماكو بنت ما ترغب بالزواج...لكن البنت منا وخاصه اذا عدت سن الطفاقه تكون مكونه حياتها وشبه مستقره فيها ما تبي شي يمزع هذا الاستقرار ...فتطلب الزواج المستقر ليس الا....
ذكرتيني مره واحد احبه قالي بزوجج ولدي....تالي شكله تحسف وقالي ولدي ازغر منج بوايد عاد انا من باب الغشمره قلت له السيدة خديجه اصغر من الرسول عليه الصلاة والسلام....

:)

I don't see any problem of showing
our thoughts or dreams

be as u are

and good luck
:)

بالديسار
=========

أهلا أهلا .. شكرا شكرا ..

صدقت والله .. وللأسف أصبحوا الناس حكمهم سيء وفي غير محله !!

تسلم وما تقصر .. أنا مقتنعه والله والدليل أصراري دايما بالتحدث عن هذه الأمور :)

ورايكم كان بمثابه مصدر لزيادة الطاقة والتشجيع :)

تحياتي لك .. وحياك الله ،،،

3ateeja
=======

وانتي الصاجه للحين نستحي ونتلخبط ما ندري شنقول أن قلنا ان شاء الله طلعنا ملاقيف وإلا يتني الخزه من امي يعني ثقلي خخخخ

وما انكر ان في بنات أشكره من تسألينها قالتلج ليش عندج ريل ؟

لكن طبعا انحرج وأقولها تسلمين مشكوره وبس ..

تخيلي عاد شكلي وين ما اروح كل ما يابوا طاري الزواج نطيت .. وقلت آميين وإلا جان زين .. ويه ويه يا حسرتي .. ما اترقع !!

بس القصد بالبلوق يعني يطلع لساني ... لوول

أما الريال بدعتي فيه لووول ... احس ويها قام يقط الوان .. قالي هاذي اللي ابتلشت فيها !

شفتي شلون حتى الغشمره ما يفهمونها غشمره ... مشكــــله ..!

يسلمو ... وحياج الله ،،


طائر بلا وطن
============

ميغسي بكو ... بكو ..

عاد انا لما أكون مقتنعه من شي صعب أشيله من بالي :)

ان شاء الله هذا اللي بصير .. وبالتوفيج ،،،،،

مرحبا ..

موضوعكِ رهيب للسبب التالي ..

نحنُ معشر " الصبيان " ننكر رغبتنا في الزواج أيام الطفولة فقط بينما إذا نكبر لا يُخفي أحدنا على الآخر رغبته في الإستقرار و الحصول على حياة جميلة كحياة الأزواج

بينما النساء فأنت الوحيدة التي تقرين رغبتك بالزواج جهاراً على خلاف جميع من عرفتهم من نساء .. لا اعلم ان كانوا فيما بينهم يصارحون أنفسهم و يخبئون هذه الحقيقة عن الرجال أم أن الأمر سواء لهم ..

لكن من لا يُحب الزواج عند الكبر هو إما أن يكون شخص فيه خلل أو أنه شخص يخادع غيره ونفسه

و لاداعي لنذكر محاسن الزواج فهي معروفة .. لمن لايريد أن ينكرها

شكراً لك على الموضوع
وتقبلي خالص تحياتي

الشقندحي :)

ما ادري هل انا خرفت وإلا المدونة مخرفه بس اعتقد اني علقت في كذا بوست واختفوا !!!

=============

الإمبراطور سنبش
==============

هلا والله

شكرا شكرا

------------
نحنُ معشر " الصبيان " ننكر رغبتنا في الزواج أيام الطفولة فقط بينما إذا نكبر لا يُخفي أحدنا على الآخر رغبته في الإستقرار و الحصول على حياة جميلة كحياة الأزواج
---------

احس العكس ممكن وانتو صغار تفكرون بالعائلة وممكن تختار شريكة حياتك لأنها فطره ... لكن لما يكبر الريال يترك هذا الشي آخر اهتماماته ولا يفصح عنا خوفا من الألتزام

صحيح ترغبون فيه لكنها مسأله وقت بالنسبة لكم

واتفق معاك أن المرأه أحيانا تنكر هذا الشي .. لأنها مضطرة في مجتمع ملقوف ما يخلي أحد بحاله

لكن بينه وبين بعض نتحدث ونعلن رغبتنا

---------------
لكن من لا يُحب الزواج عند الكبر هو إما أن يكون شخص فيه خلل أو أنه شخص يخادع غيره ونفسه
---------------

اتفق معاك 100 %

حياك الله العفو ولو

يسلمو،،،،