Thursday, March 29, 2007
posted by tasty_as_berry at 1:46 PM

السلام عليكم ورحمة الله وبركاته ،،


وانا بالدوام كنت فاضية فقلت استغل الفرصة واكتب هالموضوع علشان تهب علينا الذكريات الداثرة واللي تفشل لووول والحلوة واللي تشوق خصوصا للي أهم من جيلي ومعاي على الخط :)

لاحظت شغله أن في كلمات كنت استخدمها قبل لكن الحين اعتبرها غريبة على لساني وما استخدمها نهائيا وهم لاحظت شي فيني اني وايد اتكلم لغة عربية فصحى لوووول وما ادري شنو السبب !! مع اني ما احب مادة العربي وكان علتي الوحيد بالمدرسة !!

يعني :


- لما يسوون احتفال ويطلقون ألعاب نارية .. الجراغي مال الياهال أقول عنا جراغي .. لكن اللي بالسما أقول عنهم ألعاب نارية ووايد يتطنزون علي !


- الشريط الكاسيت دايما أقول "الوجه الأول" أو "الوجه الثاني" جذي تعودت أقولها ... سول فويسوو كلا تتطنز علي تقولي انتي هييي وين قاعدين قولي "الويه الأول" لووول .. لكن انا ما استخدمها بالعامية بكلامي بس مع الاشرطة ..:)

- لما كنت صغيره كنت أقول عن الليت " تريك " .. بس الكلمة اندثرت وقمت احس انها غريبة .. لوول تطورت قمت أقول ليت .

- أول كنت أقول " بنكة " الحين عشتو ما أقول إلا مروحة لوووول لغة عربية فصـــــحى.

- ما اعرف أقول انا "بالطريج السريع" لازم أقول انا بالطريق السريع ليش لا تسألوني خخخخخ .

- طبعا لي يومكم ما أقول " ريموت كنترول " وطبعا هالشي من صغيرنا لي كبيرنا دايما نقول ( وين مال التلفزيون ؟ ) خخخخخ

- أذكر قبل كنا نشرب شي أسمه " ليكوزيد " كان حزتها بطل زجاج لونه برتقالي وملفوف بقرطاس شفاف برتقالي وطعمه مثل فيتامين سي الفوار واهو مشروب غازي ... وايد لما أسألهم عنا ما يعرفونه !!

لي هالدرجة ما كان معروف !!؟؟ ..
( وعلى فكرة ترى حصلته في مركز السلطان بس تغير شكله ويعتبر مشروب طاقة )

- وهم كنا نشتري بيض الحمام من الجمعية يونس صغير وشكله غريب بس الحين ما احصله :(

-امي وابوي كانوا يشترون لنا شغله من سوق الديرة قبل اللي اهو مثل لوحة فيها كراتين صغار ( حظك يا نصيبك) من الورق وأحنا كنا نشق الورق وناخذ اللي داخل .. وكنا انا واختي صغار كل واحد وحظه نختار او تنقسم بينا.:)

وحسافة الحين ماكو منها حق الياهال :/

وهم الغريب ان كل ما اسأل احد عنها نادر يكون يعرفها ..!


- ويوم كنا صغار نروح الجمعية مشي مع الخدامة وامي تعطينه (1 دينار) وحزتها كان كنتاكي كيفان مسوي عرض وجبة اطفال بنص دينار ( وهالعرض ما كان يشمل جميع فروع كنتاكي ) فكنا شنسوي نطلب هذي الوجبة، فيبقى (نص دينار) من فلوسنا ، " ربع " كنت اشتري فيه عصير سنوبي الملون مثل السبلاش جان تذكرونه :) !

والربع الثاني نخلصه بحلاو وكاكاو من الجمعية .. ونطيحله نقازيه الارنب الجائع الله يذكره بالخير .. أو الدوارف اللي ورا الجمعية خصوصا العنكبوته اللي تدور ..خخخخ

- يا أن اشكثر هبينا ( بالرولات ) .. لووول ..إحنا كنا كلا فناتق في بيت يدي ... أي لعبة يديده شريناها ووديناها وشيشنا عيال خوالي ..

أذكر " نحن والأطفال " أو " دبدوب " .. وااي والله وانا اكتب قلبي عورني :( .. يا أن طفولتنا اتينن وما اعتقد في محل ألعاب لحين بنفس مستواه !

المهم شرينه منا رول كان على سنوبي ولونه أصفر وأبيض وما كان ينربط خيوط لالا كان يتسكر نفس عزكم الله جوتي الرياضه مال الياهال ... وكنا طردي بالواجهات لووول وخصوصا واجهة رقم 12 مالت البرتقالة :))))

- أما عاد الجزيرة الخضراء كانت .... حدث ولا حرج .... دواعيسها الله وكيلكم علوووم كلها مواعد ... وأحنا كلا طايحين عليهم ومناشبينهم ...خخخخ

- أما النافورة الراقصة ... وإلا عاد صالة التزلج ... لالا يا جماعة والله ببجي ..:؛؛؛(

شكلي بخم الياهال وبروح اتزحلق معاهم ...يبيــــــله :)

- على طاري الواجهات البحرية .. مرة في وحدة تحوس وعندها قاري .. وآنا حاطه عيني عليه لووول ... أبي أركب شسوي !!

جان اروحلها يعني ذربة وأقولها : لو سمحتي ممكن أصير صديقتج ؟ خخخ
جان الجلبة ترد عليه بترفع تام وغرور وبنفس خايسة وتقول : لالالالالاء وتمشي عني

اندقرت دقرة حياتي وما عدتها ...لوووووول

- وأذكر مره كنا رايحين شاطيء العقيلة .. ما ادري إذا تذكرون التسريحة اللي هبوا فيها تربطين عنقوص والشباطه لازم تكون راخيه يعني اسكت من نعومة الشعر زلقت .. توحي بالبساطة لووول

وأنا عشتو مسويتها .. كنت بو 12 سنة شي جذي لاحقني واحد ويتحرس فيني ... وكل ساعة تال شباصتي مطيحها ليش انها على الطرف خخخخ ... وآنا ألف عليه معصبه وفيني ضحكة وأقوله : وبعدين وياك ..!!

بس طبعا تعصب العيارة .. وإلا انا حدي متشققة يتحرشون فيني لوووول

- يا ربي انا مراهقتي كانت مأساة لووول .... تذكرون الفنيلة الداخلية " الدانتيل " اللي نلبسها بس علشان يطلع الدانتيل من الغلبة نفتح اول زرارين علشان تبين خخخخ ... ويـــــع

- وإلا " الحجاب الكريب " .. قطيعة انا لحقت على هالحقبة المعفنة .. لوووول

- اما عاد " الزلووووف " .. شي شي .... كنت ألف زلفي على القلم علشان اسويه كيرلي وأعطيه سبريه ... خخخخ

طبعا في سوالف وايد لكن أترك الباجي لكم :)

تحياتي ،،،،




 
16 Comments:


At 5:30 PM, Anonymous Anonymous

missed ur posts

 

At 8:11 PM, Anonymous Anonymous

ذكريات تعور القلب وتونس وللأسف راحت بلا ردة
وبالنسبة للغة الفصحى انا متمسك بكلمة عفواً ؟!
للأستفسار استعملها وايد :)

و احس طفولتنا وايد احلى من هالايام
حتى الرسوم المتحركة اللي كنا نسميها باباي وناس تسميها ميكي مع ان ميكي وباباي بريئين براءة الذئب :)
يعني الحين كل شي صار خرابيط
وللا قبل كانت هادفة واذا مو هادفه ماتكون خربوطية

انا بالنسبة لطفولتي كنت بريئ ودلوع :)
بس ما اذكر اني تنقعت بالجمعية وللا بالفرع
كله ببيت يدي واذا وكان يعطينا انا واخوي العود وولد خالي فلوس ونروح جمعية النزهة مشي عشان نشتري من مطعم ومبي :)
الوحيد الباقي ليلحين
واذا صار عندنا فلوس وايد وايد يعني اكثر من 5 دنانير واقل من 10 دنانير :) كنا نروح مع السايق جمعية الفيحاء عشان نشتري العاب ننتيندو .
وببيت يدي الثاني بالسرة الفريج صغير فكنا نلعب صيدة مصيدة بالفريج كله :)
ووووو بس

 

At 1:57 AM, Blogger Mamloo7a Q8ia

هههههههه
حلوة سالفة الزلووف
ههههه
انا الريموت اسميه الرعاص لا تساليني ليش ؟؟ ما ادري ؟؟
يا حلات طفولتنا كانت وايد حلوة وكل شي يونسنا مو مثل هالجيل ماكو شي يترس عينهم ويونسهم وعندهم كمية ملل رهيبة
بوست خفيف الظل
وذكرنا بماضي وذكريات جميلة

 

At 2:39 PM, Blogger tasty_as_berry

Anonymous
=========

thanks alot :)
only my posts !! ;P

We won't 4get U
================

اهلين :)

على طاري ومبي .... عجيب .. كنا لما نزور بالفيحاء متعة نروح الجمعية .. ونطلب بوري ..

لووول ... ذيك المره امي وابوي يسولفون أيام الملجه أبوي كلا يوديها ومبي خخخخخ :))) يعني شي

حتى السره والله قزيت فيها ..خخ أذكر البقالة اللي جبال مدرسة النجاة الخاصة سابقا كانت يم بيت يدي .. ويدي يعطينه خردة ورايحين رادين

خصوصا المعجون مع العود اللي يسوي تفاخيه بو ريحة قويه خخخ

يسلمو وحياك الله ،،،


Mamloo7a Q8ia
=============

هلا والله .. :)

حلوه "الرعاص ".. ما ادري ليش تذكرت معجون شي جذي خخخخخ ..

اي والله مثل ما قلتي .. تدرين والله أني اموت على سوق البحار أحس اهو الوحيد اللي كان في ريحة قبل وهم شالوه :(

أنا اشجع الأبهات والأمهات اللي يزعون سوالف قبل بعيالهم ..

أنا اموت على بنت أختي عمرها 3 سنين شلون تقول : يومـــاه ..

ودي جذي انتفها من قلب تقولها :)

حياج الله ،،،

 

At 4:31 PM, Blogger BlogLess

آآآآآخخخخ يا قلبي

ذكرتيني بالأيام الخوالي

عورتي قلبي على لعبة اليانصيب

ابوي كان يشتريها لنا والله لا يوريج
طق مطاقق عليها

ويطلع منها إذا تذكرين حيوانا نحطها بالماي وتكبر بعد ليلة كاملة

الله

والله متعة

يا ليت الطفولة تعود يوما
لأخبرها بما فعل الشباب

 

At 3:49 PM, Blogger tasty_as_berry

BlogLess
========

أهلين :)

سلامة قلبج .. زين اشوه انتي معاي على الخط .. أي والله أذكرها :)

سبحان الله ان في اشياء راسخه بالذاكره ان شاء الله دوم

حياج الله ،،

 

At 9:00 PM, Blogger loco

makoo a7la min el thekrayat walla! ;oma el thekryat chan ma adry e9ar feena! 7emdeela. nice post!

 

At 10:11 AM, Blogger Diver

و الله رجعتيلنا ايام الشباب

بس تدرين توني احس اني كبرت لما قريت الي كتبتيه و ان نص هالسوالف ما تصير او اختفت

مشكورة على ابتسامات التذكر و انا اقرا

 

At 12:09 PM, Blogger lawyer

وااااااااي من وين مطلعه هالسوالف من اي دفاتر
شالظييييييييييم


اي كلنااااااااا كنا جذي

بس ما عرفت مشروب الطاقه


تذكرون الاتحاد؟؟

و جاشنمال .؟؟؟

و شغل سنوبي ماكو الا عندهم

و الا جواتي لندن بو حديده
قطييييييييييعه

ظيم

و البكله الي من جدام

على فكره انا لي الحين اقول تريكااات

و خاشووقه

في احد يعرف شنو الخاشوقه

 

At 9:31 PM, Blogger ana_sokkarah

وااي ذكريات اتينن تيستي ذكرتينا بالطفولة عاد الشياب بقولون ألا ليت الشباب يعود يوما واحنا نقول ألا ليت الطفولة تعود يوما لأخبرها بمافعله الشبابو اخّييييييه ياتيستي عوار قلب الذكريات إللي انمحت من مصطلحات عيالنا ألحين إللي مايعرفون إلا التقليد والبلاوي الثانية

لووووووووووول ضحكتيني على الفنيله الدانتيل كانت شي ومو عندي أحد هاهاهااااي ولا حجاب الكريب عاد هذا آنا مالبسته ما أحبه آنا لحّقت على حجاب بوزنطه والمظله العنيفة اللي نسويها بالنشا لوووووووووول عالمراقه اللي تلوع الجبد بس تدرين كنّا شي والله وألحين نتذكر ونضحك شلون كنّا نسوي جذيه لووول علينا والله

الله يعطيج العافية على هالموضوع وصج رجعتي ذكرياتنا

 

At 3:08 PM, Blogger tasty_as_berry

loco
=====

أهلين :)

أي والله والأهم لما تكون على البال ..شكرا من ذوقك :)

حياك الله ،،،


Diver
======

هلا والله :)

تحس ودك ترجع لان زمن قبل كان بسيط ويونس بنفس الوقت .. دوم مستانس ان شاء الله

وحياك الله ،،،

lawyer
======

لوووووووول .. بهالسوالف أعجبج ..خخخ

إي الاتحاد كان عندنا شي شي ..خخخ .. لي يومج ما غيروا جياسته ..!!

أما الجوتي بو حديده جان تقصدين اللي في حديده مربعه تعكس من جدام تكرمين الجوتي .. لوووول هبيت فيه هبه .. بس أنا كنت شاريته من مصر اعتقد أن تقليد له .. لبسته أيام المتوسط .

أما البكله اللي نفرها نفرها بعدين نوديها ورا ونسوي بف لوول ونثبتها بماشات ... خخخ

الخاشوقه يعني قفشه جنا ..!!

بس هالمصطلح ما تعودت عليه

صبري علي يمكن انزل جزأ ثاني لووول مثل هالسوالف :)

يسلمو وحياج الله ،،،

ana_sokkarah
=============

هلا هلا هلا هلا بالطش والرش :)

انا صراحة عيوز ووايد ملتزمة بالعادات والتقاليد لوول وبورثها لعيالي مستقبلا

الحجاب بو مظله لووول أشوه انا طفته يمعوده الكريب اكشخ

الحجاب بو نشا هذا لي يومج نعاير اختي بصورها لووول

بس ترى كل ما نشوفين صوره وتحسينها داثره راح تذكرين احساسج حزتها أن انتي في قمة زهوج وفي ابها طلة ...:)))

انا كل ما اشوف صوري قبل والحين دايما اييني شعور اني صغرت ما كبرت يعني الشكل فرق الذوق كل شي :)

تسلمين حبيبتي :*

 

At 1:45 AM, Blogger PearL

looooooooooool

موتيني من الضحك

ذكرتيني بما مضى

بس ترى طفولتنا صج كانت تونس

اخخخ
ذكرتيني ب نحن والاطفال


عجييييييييب

 

At 12:29 PM, Blogger tasty_as_berry

PearL
=====

هلا والله

حيا الله من يانا :)

دوم مستانسة ان شاء الله حدها تونس .. ياهالنا الحين مملين

ونحن والاطفال حده عجيب

يسلمو :*

 

At 5:58 AM, Blogger AseeL

هذا الورق بو حظ شخباري انتي حدج قديمة!!

شكلج من جيلنا المقدام :P

 

At 3:26 PM, Blogger Nescafé

ههههههه البوست عجيب
موطبيعي اينن والله
مع ان مويديد بس ماقدرت امر بدون لااعلق عليه
وصج جان زين يكون في جزء ثاني

شكراً.. امتعتينا
:)

 

At 12:12 PM, Blogger tasty_as_berry

AseeL
=====

اهلين :)

أي شفت شلون .. سوالفنا قبل تونس مو الحين !!

يسلمو ،،،

Nescafé
=======

هلا بالطش والرش
تسلمين يا قلبي ... حاظرين للطيبين :)

حياج الله ،،،