Friday, February 29, 2008
posted by tasty_as_berry at 10:24 PM

مغامرات أو بالأحرى فناتق عزيز


عزيز يبلغ من العمر 7 سنوات

(1)

دانة تساحل أخوها : اللي ما بيسمع كلمة أختو شو بنئلوا !!

رد عليها عزيز بخبث ودهاء :
مو شاطر مو شاطر

( يعني لا تساحليني ما راح اسويلج اللي تبين )

(2)

أم عزيز : تدرس دانة يالله درسي وكتبي وإلا تبين تصيرين طرارة وخمامة !!
تليقف عزيز وكارونا وكانت واقفة ( كارونا اهية السيلانية ):
ويكرر كلام أمه أي صح درسي تبين تصيرين خدامة تغسلين الحمامات..!!

طبعا أم عزيز قالت بقلبها هذا اللي بينطق

لما راحت كارونا

الأم خذت عزيز وقالتله : يا يما جم مرة قلتلك لا تقول خدامة عيب وحرام
اهية مسكينة فقيرة هادة بيتها وديرتها علشان تشتغل واتييب فلوس لا تقول عنها جذي

وبعدها بأيام

راح عزيز المصرقع ويطامر عند كارونا ويقولها : انتي خدامة فقيره ما عندج فلوس

أم عزيز حست كارونا فيها شي قالت لها : اشفيج !؟

كارونا : ماما عزيز ما ادري اشفيه علي يقولي جذي مع ان ما كان يقول !!

الأم : عزووووووز تعال

(وقالت حق كارونا روحي داخل)

تعال تعال آنا شنو قايلتلك ذاك اليوم
هااا !!

آنا مو قايلتلك لا تقول حق كارونا خدامة شكو رايح لها وقايلها فقيره هااا

عزيز : بطل حلجه قام يبجي

الأم : وأنت يعني ويا ويهك يكون غني رايح تقولها فقيره وانت عندك فلوس !!

رد عزيز بكبرياء : أي عندي

الأم : من وينلك !!

راح عزيز ياب بوكه : شوفي عندي ( ويطلع 200 فلس ) كااا

الأم : يعني هاذي اسكت فلوس الحين أن عدتها يا ويلك فاهم

(ومن بعدها عزيز توبة )

(3)

آنا أبوس ايد عزيز وأقوله :
عزيز هل تقبل الزواج منييييي ؟

عطاني نظرة استهزاء جان يقولي : شكو !!

آنا : ليش ؟ عادي ؟

عزيز : شنو أحنا قاعدين في باباي مغامرة !!

طبعا آنا انسدحت من الضحك

(4)

عزيز : يما شلون المرأة اتييب ياهل ؟

الأم : الياهل يطلع من بطنها

عزيز : أي بس شلون صار في بطنها ؟

الأم تبلع ريجها : تتزوج وبعدين تصير حامل وتييب ياهل

عزيز : أي بس شلون يعني تصير حامل ؟

الأم : شوف حبيبي المرأة والريال لما أثنين يحبون بعض

الأبو: ينغزها ومعصب ( انتي هييي شقاعده تقولين )

الأم : اشفيك أصبر !!

الأم ردت تكمل حق عزيز : لما أثنين يتزوجون ويحبون بعض ويعيشون بسعادة الله يعطيهم عيال

عزيز: يعني بس جذي الله يعطيهم عيال ؟

الأم : أي يعني يقعدون يدعون يا ربي يعطيني ياهل أبي ياهل وعلشان اهمة زينين مع بعض ويحبون بعض الله يعطيهم ياهل ..

عزيز بلم اشوي : وقال إييييييييييه

( مثل اللي يعني ما اقتنع بس ما يقدر يقول شي )

(5)

أم عزيز تتصل على البيت تطفر اعيالها وتغير صوتها

أخذ عزيز التلفون من دانة اخته

وقال انتي منو منو تبين ؟

جان تقوله امه : من معاي من حاظرتك ؟

جان يرد عزيز بكل وقار : انا عبدالعزيز من جنوب السرة

لووووووووووول

قلتلها يعني لاسكلي وإلا يعني مثل جنوب أفريقيا خخخخ

ويستمر المسلسل

 
10 Comments:


At 11:32 PM, Blogger esTeKaNa

يختي يا زين الزيييييييين
زوقه زوقه
وخف طينه يا حلاااااااااته
اهم شي انه غني
ههههههههههههه
بس تدرين مبين عليه اسم الله عليه فطين
وذكي
الله يحفظة ويبلغكم فيه يارب
:)

 

At 8:31 PM, Blogger whitebeard

Allah ya7ftha lekom, aham shay yom etgolen la hal taqbal el zawaj mny oo ygoolch SHAKOO :P , Anyways nice to write about 3azooz for a change, also nice song oo keep up the good work.

Goooo 3azooz

 

At 11:35 PM, Blogger ولد الديرة

تحملت حكم كاولستان سبع اشهر

لكن يقتلني الياهل اللي مثل عزوز

يبي ربع و يفكنا؟

:P

 

At 1:13 PM, Blogger lonely

y7lelaah 3zooz

alaa y7'leeh 7g ahallh:)

very nice one sis

 

At 2:51 PM, Blogger tasty_as_berry

esTeKaNa
========

اهلين ..

أي اسمله عليه .. نبيه وعيار لوول بنفس الوقت

الله يسلمج ويخليج :*

whitebeard
===========

أهلا أهلا :)

الله يسلمك ويحفظك
أي حده ما شفت ويها يوم أقوله مثل اللي انحرج وتوهق لوووول

ميغسي بكو ،،،

ولد الديرة
============

عزوز عسل هالولد ما اقدر أقاومه ويقتلني خفة دمه

ولا يعجبك بعد من النوع الظغيط لوول

حياك الله

lonely
======

الله يسلمك ويخليك

يعطيك العافية
وحياك الله :)

 

At 6:36 PM, Blogger الخيلاء

عسسسسل

الله يخليه لكم و اتشوفونه معرس :)

 

At 10:18 AM, Blogger vancouver

قولي امين

عسى الله يحفظ عزوز ودانه وامهم وابوهم


الله يحفظه عليه حركات تينن
ولاسالفة انه غني بالميتين فلس
لوووووووول

استمتعت الصراحة بالبوست
:)

 

At 1:02 PM, Blogger Barrak

خوش فناتق

 

At 4:07 PM, Blogger tasty_as_berry

الخيلاء -vancouver - Barrak
=========================

مشكورين وايد وايد على التعليق
آنا مستانسة ان البوست عجبكم

وإني قدرت اوصل السوالف وغشمرة عزوز عدل :)

اعتذر عن التأخير في الرد
كلكم ذوق

الله يسلمكم ويخليكم
ويعطيكم العافية

 

At 4:59 AM, Blogger 3ateeja

كااااااااااااااااااااااااااااااااك
عبدالعزيز من جنوب السره
ظحكتيني
تعالي كنتي غاطه مثلي
ولكم باك حبيبت البي